Tirumala : తిరుమల శ్రీవారికి బంగారు పగడాల హారాలు విరాళం

హైదరాబాద్‌కు చెందిన భక్తురాలు శ్రీమతి కమల గురువారం తిరుమల శ్రీ వేంకటేశ్వరస్వామికి రూ.25 లక్షల విలువైన రెండు బంగారు పగడాల హారాలను కానుకగా అందించారు. TTD అదనపు ఈవో వెంకయ్య చౌదరికి వీటిని అందజేశారు.

కలియుగ ప్రత్యక్ష దైవమైన తిరుమల శ్రీ వేంకటేశ్వరస్వామి వారి నిత్య కైంకర్యాలు, ఆభరణాల సమర్పణలో భక్తులు తమ భక్తిప్రపత్తులను చాటుకుంటూనే ఉంటారు. ఈ క్రమంలోనే(ఇవాళ) గురువారం రోజు శ్రీవారికి ఒక అపూర్వమైన విరాళం అందింది. హైదరాబాద్‌కు చెందిన శ్రీమతి కమల అనే భక్తురాలు స్వామివారికి దాదాపు రూ.25 లక్షల విలువైన రెండు బంగారు పగడాల హారాలను కానుకగా సమర్పించారు.

శ్రీవారికి బంగారు పగడాల హారాలు విరాళం

టీటీడీ అధికారులకు అప్పగింత..

తన కుటుంబ సభ్యులతో కలిసి తిరుమలకు విచ్చేసిన కమల…. శ్రీవారి ఆలయంలోని ప్రసిద్ధ రంగనాయకుల మండపంలో ఈ కానుకలను టీటీడీ (తిరుమల తిరుపతి దేవస్థానం) అదనపు ఈవో సి.హెచ్.వెంకయ్య చౌదరికి అందజేశారు.

అత్యంత సుందరంగా రూపొందించిన ఈ రెండు బంగారు పగడాల హారాలను స్వీకరించిన అనంతరం టీటీడీ అదనపు ఈవో వెంకయ్య చౌదరి, దాత కుటుంబ సభ్యులకు స్వామివారి వేద ఆశీర్వచనం అందించేలా ఏర్పాట్లు చేశారు. ఆ తర్వాత వారికి శ్రీవారి తీర్థ ప్రసాదాలను అందజేసి…. వారి భక్తిశ్రద్ధలను అభినందించారు.

తిరుమల శ్రీవారికి రోజువారీగా దేశ విదేశాల నుంచి వచ్చే వేలాది మంది భక్తులు నగదు, స్వర్ణాభరణాలు, వెండి వస్తువులను కానుకలుగా సమర్పిస్తుంటారు. గురువారం రోజు సమర్పించిన ఈ పగడాల హారాలు శ్రీవారి ఆభరణాల జాబితాలో ప్రత్యేకాకర్షణగా నిలవనున్నాయి.