Vijayawada : దశాబ్దాల ఇళ్ల పట్టాల సమస్యకు పరిష్కారం - ఈనెల 30న పట్టాల పంపిణీ

విజయవాడలో దశాబ్దాలుగా నలుగుతున్న ఇళ్ల పట్టాల సమస్యకు ఏపీ ప్రభుత్వం ముగింపు పలకనుంది. 'పేదలకు పట్టాభిషేకం' కింద సెప్టెంబర్ 30న సీఎం చంద్రబాబు 24,057 కుటుంబాలకు ఇళ్ల క్రమబద్ధీకరణ పట్టాలను పంపిణీ చేయనున్నారు.

విజయవాడ నగరంతో పాటు పరిసర ప్రాంత ప్రజల దశాబ్దాల కలను సాకారం చేస్తూ ఆంధ్రప్రదేశ్ ప్రభుత్వం కీలక నిర్ణయం తీసుకుంది.విజయవాడ నగరంలో ఎన్టీఆర్ హయాం నుంచి పెండింగ్‌లో ఉన్న ఇళ్ల పట్టాల సమస్యకు శాశ్వత పరిష్కారం చూపుతూ…. సెప్టెంబర్ 30న లబ్ధిదారులకు క్రమబద్ధీకరణ పట్టాలను పంపిణీ చేయడానికి ముఖ్యమంత్రి చంద్రబాబు ముహూర్తం ఖరారు చేశారు.

సంపూర్ణ హక్కులు….

ఇళ్ల క్రమబద్దీకరణ పట్టాలు

'పేదలకు పట్టాభిషేకం' పేరిట చేపట్టే ఈ భారీ కార్యక్రమంలో 24,057 కుటుంబాలకు పూర్తి స్థాయి యాజమాన్య హక్కులను కల్పించనున్నారు.రూ.9,800 కోట్ల విలువైన భూములకు విముక్తిఈ క్రమబద్ధీకరణ ప్రక్రియ ద్వారా సుమారు రూ.9,800 కోట్ల విలువైన భూమిపై పేదలకు సంపూర్ణ హక్కులు లభిస్తాయని ప్రభుత్వం అధికారిక ప్రకటనలో తెలిపింది.

బహిరంగ మార్కెట్ విలువ ప్రకారం చూస్తే…. ఈ స్థలాల విలువ దాదాపు రూ.24,297 కోట్లు ఉంటుందని అంచనా. ఈ నిర్ణయం వల్ల ఒక్కో లబ్ధిదారు కుటుంబానికి సుమారు రూ.40 లక్షల నుంచి రూ.45 లక్షల విలువైన ఆస్తిపై చట్టబద్ధమైన శాశ్వత హక్కులు దక్కుతాయి. విశాఖపట్నంలో విజయవంతంగా నిర్వహించిన ఇళ్ల పట్టాల పంపిణీ తరహాలోనే, ఇప్పుడు విజయవాడలోనూ ఈ బృహత్తర కార్యక్రమాన్ని ప్రభుత్వం చేపడుతోంది.

మొత్తం 617 ఎకరాల విస్తీర్ణం.. 30 లక్షల చదరపు గజాలుగతంలో ఎన్టీఆర్ ముఖ్యమంత్రిగా ఉన్న సమయంలో కేటాయించిన స్థలాలు, కొండ ప్రాంతాల్లోని ఇళ్లకు సంబంధించిన స్థలాలను ప్రభుత్వం ఇప్పుడు పూర్తిగా రెగ్యులరైజ్ చేస్తోంది. మొత్తం 617 ఎకరాల విస్తీర్ణంలోని (సుమారు 30 లక్షల చదరపు గజాలు) నివాస ప్రాంతాలకు సంబంధించి ఈ హక్కు పత్రాలను అందజేస్తారు.

తమ నివాసాలకు చట్టబద్ధమైన యాజమాన్య హక్కులు కల్పిస్తేనే తమ ఇళ్లకు భద్రత ఉంటుందని, భవిష్యత్తుకు భరోసా దక్కుతుందని కొండ ప్రాంత వాసులు దశాబ్దాలుగా పోరాడుతున్నారు. ఇటీవల జరిగిన జిల్లా స్థాయి ప్రజాప్రతినిధుల సమీక్షా సమావేశంలోనూ ఈ అంశంపై ప్రత్యేకంగా చర్చించిన అనంతరమే ప్రభుత్వం వేగంగా అడుగులు వేసింది.