ఆంధ్ర యూనివర్సిటీలో ఫార్ములా-1 రేసింగ్ కార్ ఎగ్జిబిషన్.. RB14 హంగామా!

Andhra University : ఆంధ్ర విశ్వవిద్యాలయంలో ఫార్ములా-1 రేసింగ్ కార్ ఎగ్జిబిషన్ జరగనుంది. విశాఖపట్నంలో RB14 హంగామా చేయనుంది.

విశాఖపట్నం వేదికగా ఆంధ్ర విశ్వవిద్యాలయం (AU) ఇంజనీరింగ్ కళాశాల (A) గ్రౌండ్‌లో ఆస్తికరమైన కార్యక్రమం జరగనుంది. ప్రపంచవ్యాప్తంగా కోట్ల మంది అభిమానులను సంపాదించుకున్న ప్రపంచ ప్రసిద్ధ ‘RB14 ఫార్ములా-1 రేసింగ్ కార్’ (RB14 F1 Car) ప్రదర్శనను ఈ నెల 20న నిర్వహించనున్నారు.

ప్రతీకాత్మక చిత్రం

ఏయూ బాస్కెట్‌బాల్ కోర్టులో ఉదయం 10 గంటల నుండి మధ్యాహ్నం 2 గంటల వరకు ఈ బృహత్తర ఎగ్జిబిషన్ జరగనుంది. ఈ ప్రదర్శనకు సంబంధించిన ప్రత్యేక పోస్టర్‌ను ఆంధ్ర యూనివర్సిటీ ఇంజనీరింగ్ కళాశాల ప్రిన్సిపల్ ప్రొఫెసర్ కె. వెంకట సుబ్బయ్య ఆవిష్కరించారు. ఏయూ యునైటెడ్ స్టూడెంట్ క్లబ్ ఆధ్వర్యంలో ఈ వేడుకను ఏర్పాటు చేస్తున్నారు. క్లబ్ నిర్వాహకులు అక్షయ్, యశ్వంత్, రవికాంత్ మాట్లాడుతూ... ఆంధ్రప్రదేశ్ రాష్ట్ర చరిత్రలోనే తొలిసారిగా ఒక ఫార్ములా-1 రేసింగ్ కార్ అధికారికంగా ప్రదర్శించబడటం ఇదే మొదటిసారని సంతోషం వ్యక్తం చేశారు. ఈ అరుదైన అవకాశాన్ని విద్యార్థులు, మోటార్ స్పోర్ట్స్ ప్రేమికులు ఉపయోగించుకోవాలని ఆహ్వానించారు.

ఏమిటీ RB14 రేసింగ్ కార్ ప్రత్యేకత?

రెడ్ బుల్ రేసింగ్ జట్టుకు చెందిన ఈ RB14 కారు 2018 మోటార్ స్పోర్ట్ ప్రపంచంలో విశేష పేరు తెచ్చుకుంది. ఇంజిన్ సామర్థ్యం ఇందులో 1.6 లీటర్ టర్బోచార్జ్డ్ V6 ఇంజిన్ ఉంటుంది. ఇది దాదాపు 900 హార్స్ పవర్ కంటే ఎక్కువ శక్తిని ఉత్పత్తి చేయగలదు. ఈ కారు గంటకు 340 కిలోమీటర్లకు పైగా గరిష్ట వేగంతో ప్రయాణించగలదు. కార్బన్ ఫైబర్ మోనోకోక్ ఛాసిస్, హై-స్పీడ్ ఏరోడైనమిక్ డిజైన్ మరియు రైడర్ భద్రత కోసం ప్రత్యేక ‘హాలో’ (Halo) వ్యవస్థను ఇందులో ఉపయోగించారు.

సాధారణంగా ఫార్ములా-1 రేసింగ్ కార్లను కేవలం టీవీలు లేదా అంతర్జాతీయ రేసింగ్ ట్రాక్‌లపై మాత్రమే చూస్తుంటాం. అయితే ఈ ఎగ్జిబిషన్ ద్వారా విద్యార్థులు చాలా దగ్గరగా ఈ కారును వీక్షించడమే కాకుండా, దాని అద్భుతమైన ఏరోడైనమిక్స్, ఇంజిన్ ఇంజనీరింగ్, అడ్వాన్స్డ్ టెక్నాలజీ గురించి ప్రత్యక్షంగా తెలుసుకోవచ్చు. విద్యార్థులలో ఇంజనీరింగ్, ఆటోమొబైల్ రంగాలపై ఆసక్తిని పెంపొందించడానికి ఈ తరహా కార్యక్రమాలు ఎంతో దోహదపడతాయని ఏయూ అధికారులు చెబుతున్నారు. విద్యార్థులందరూ పెద్ద సంఖ్యలో హాజరై ఈ సూపర్ కార్ ప్రదర్శనను తిలకించాలని నిర్వాహకులు పిలుపునిచ్చారు.