గంజాయి అమ్మేవారిని పట్టిస్తే రూ.5 వేలు, తాగేవారిని పట్టిస్తే రూ.1,500

గంజాయి విక్రయాలపై ఉక్కుపాదం మోపుతున్నారు పోలీసులు. గంజాయి తెచ్చేవారిని, విక్రయించేవారిని పట్టిస్తే రూ.5 వేలు, గంజాయి తాగేవారిని పట్టిస్తే రూ.1,500 ఇస్తామని ప్రకటించారు.

విజయవాడ నగరంలో గంజాయి విక్రయాలు, వాడకంపై పోలీసులు సీరియస్‌గా ఉన్నారు. మాదకద్రవ్యాల మూలాలను మట్టుబెట్టేందుకు ఎన్టీఆర్ జిల్లా పోలీస్ కమిషనరేట్, ఈగల్ విభాగం సంయుక్తంగా ‘ఈగల్ ఛాలెంజ్’ పేరిట ప్రత్యేక కార్యక్రమాన్ని ప్రారంభించాయి. అజిత్ సింగ్ నగర్‌లోని సెయింట్ ఆన్స్ పాఠశాలలో నిర్వహించిన ఈ కార్యక్రమంలో సీపీ ఎస్.వి.రాజశేఖరబాబు, ఈగల్ ఐజీ ఆకే రవికృష్ణ పాల్గొని కీలక వివరాలు వెల్లడించారు.

గంజాయి

గంజాయిని నగరానికి తీసుకువచ్చినా లేదా విక్రయిస్తున్నా పోలీసులకు సమాచారం అందిస్తే రూ.5,000 నగదు పారితోషికం అందిస్తారు. గంజాయి తాగుతున్న వారి వివరాలు తెలిపిన వారికి రూ.1,500 రివార్డు ఇస్తారు.

స్థానిక పోలీస్ స్టేషన్ పరిధిలో ఇటీవల 469 మందికి డ్రగ్ టెస్టులు నిర్వహించగా 128 మందికి పాజిటివ్ వచ్చింది. గంజాయి తాగే 129వ వ్యక్తిని పట్టించి చూపించిన వారికి అజిత్‌సింగ్‌నగర్ సీఐ చంద్రశేఖర్ రూ. 1,500 తక్షణ బహుమతి ప్రకటిస్తున్నట్లు తెలిపారు.

గంజాయి రవాణా, విక్రయాలకు పాల్పడుతున్న 32 మంది తీవ్రమైన నేరస్థులపై కఠినమైన పిట్ ఎన్డీపీఎస్ చట్టాన్ని ప్రయోగించినట్లు సీపీ వెల్లడించారు. ‘డ్రగ్స్ వద్దు బ్రో’ అనే నినాదంతో రాష్ట్రవ్యాప్తంగా దాదాపు 40 వేల విద్యాసంస్థల్లో ‘ఈగల్ క్లబ్స్’ ఏర్పాటు చేశామని ఐజీ ఆకే రవికృష్ణ తెలిపారు.

రాష్ట్రవ్యాప్తంగా గంజాయి, డ్రగ్స్ ఎక్కువగా వినియోగించే 849 కేంద్రాలను (హాట్‌స్పాట్లు) గుర్తించి నిఘా పెట్టారు. ప్రత్యేకంగా ఏర్పాటు చేసిన 1972 కాల్ సెంటర్‌కు బాధితుల తల్లిదండ్రుల నుంచి పెద్ద సంఖ్యలో ఫిర్యాదులు వస్తున్నాయని, దాని ఆధారంగా తక్షణ చర్యలు తీసుకుంటున్నామని ఈగల్ ఎస్పీ మహేశ్వరరాజు వివరించారు.

గంజాయి బారిన పడకుండా యువతను, విద్యార్థులను కాపాడుకోవడమే లక్ష్యంగా ఈ తనిఖీలు, అవగాహన కార్యక్రమాలు కొనసాగుతాయని అధికారులు స్పష్టం చేశారు. ఈగల్‌ బృందం ఏడాదిగా చేపట్టిన కార్యక్రమాల గురించి ఈగల్‌ ఎస్పీ మహేశ్వరరాజు తెలిపారు.

నేటి సమాజంలో ముఖ్యంగా యువత, విద్యార్థులు క్షణికానందం, మానసిక ఒత్తిడి లేదా స్నేహితుల ఒత్తిడికి లోనై గంజాయి బారిన పడుతున్నారు. ఇది కేవలం ఒక వ్యక్తి ఆరోగ్యానికే కాకుండా, కుటుంబ జీవితానికి, సమాజ భవిష్యత్తుకు తీవ్ర విఘాతం కలిగిస్తోంది. గంజాయి అలవాటు పడటం వల్ల నాడీ వ్యవస్థ దెబ్బతింటుంది. జ్ఞాపకశక్తి తగ్గడం, ఏకాగ్రత లోపించడం, మానసిక ఆందోళన, డిప్రెషన్, భ్రమలకు గురికావడం వంటి తీవ్ర సమస్యలు తలెత్తుతాయి. ఇది శ్వాసకోశ సమస్యలకు, గుండె సంబంధిత జబ్బులకు కూడా దారితీస్తుంది.

తల్లిదండ్రులు పిల్లల ప్రవర్తనలో వస్తున్న మార్పులను నిశితంగా గమనించాలి. వారితో స్నేహపూర్వకంగా ఉంటూ, మంచి చెడులను వివరించాలి. కళాశాలలు, పాఠశాలల్లో మత్తు పదార్థాల దుష్ప్రభావాలపై క్రమం తప్పకుండా అవగాహన సదస్సులు నిర్వహించాలి. మీ పరిసరాల్లో గంజాయి విక్రయాలు లేదా వినియోగం జరుగుతున్నట్లు తెలిస్తే వెంటనే టోల్ ఫ్రీ నంబర్ 1972 ద్వారా పోలీసులకు సమాచారం అందించాలి.