ఏపీ జాబ్ క్యాలెండర్ - 2026 అప్డేట్ : 10,060 ఉద్యోగాల భర్తీకి ముహూర్తం ఖరారు - ఈ తేదీల్లో నోటిఫికేషన్లు విడుదల

AP Job Calendar 2026: జాబ్ క్యాలెండర్-2026 అమలుకు ఏపీ సర్కార్ వేగం పెంచింది. మొత్తం 10,060 ప్రభుత్వ ఉద్యోగాలను నాలుగు దశల్లో భర్తీ చేయాలని నిర్ణయించింది. ఈ మేరకు మంత్రి నారా లోకేశ్ కీలక ఆదేశాలను జారీ చేశారు.

AP Job Calendar 2026 : నిరుద్యోగులకు రాష్ట్ర ప్రభుత్వం గుడ్ న్యూస్ చెప్పింది. జాబ్ క్యాలెండర్ - 2026 అమలులో భాగంగా ఉద్యోగ నోటిఫికేషన్లు జారీ చేయనుంది. ఆ దిశగా కార్యాచరణను సిద్ధం చేయాలని అధికారులకు ఆదేశాలు జారీ అయ్యాయి.

ఏపీ జాబ్ క్యాలెండర్ - 2026... సర్కార్ కీలక నిర్ణయం

జాబ్ క్యాలెండర్-2026 అమలుపై బుధవారం మంత్రుల బృందం ఉన్నత స్థాయి సమీక్ష నిర్వహించింది. రాష్ట్రంలోని వివిధ శాఖల్లో ఖాళీగా ఉన్న పోస్టుల భర్తీ ప్రక్రియను వేగవంతం చేయాలని ఈ సమావేశంలో నిర్ణయించారు. ప్రభుత్వ శాఖల అవసరాలను క్షుణ్ణంగా బేరీజు వేసుకుని పోస్టులను భర్తీ చేయాలని ముఖ్యమంత్రి స్పష్టం చేసినట్లు మంత్రుల బృందం వెల్లడించింది. వివాదాలకు తావు లేకుండా, ప్రతి ఏటా కచ్చితంగా జాబ్ క్యాలెండర్ విడుదల చేసేలా చర్యలు తీసుకోవాలని అధికారులు ఆదేశించారు. ఈ మేరకు మొత్తం 10,060 ఉద్యోగాల భర్తీకి గ్రీన్ సిగ్నల్ ఇచ్చారు.

దశలవారీగా నోటిఫికేషన్లు…

ఉద్యోగాల భర్తీ ప్రక్రియను పక్కా ప్రణాళికతో నాలుగు దశలుగా విభజించారు. ఇప్పటికే మొదటి దశలో వివిధ విశ్వవిద్యాలయాల్లో ఖాళీగా ఉన్న 1,523 లెక్చరర్ పోస్టుల భర్తీకి ప్రభుత్వం నోటిఫికేషన్ జారీ చేసింది. ఇక రెండో దశకు సంబంధించి కీలక నిర్ణయం తీసుకున్నారు. 3,168 పోస్టుల భర్తీకి వచ్చే సెప్టెంబర్ 15న అధికారిక నోటిఫికేషన్ విడుదల చేయనున్నట్లు ప్రభుత్వం ప్రకటించింది.

అక్టోబర్‌లో ఒకేసారి రెండు నోటిఫికేషన్లు

ఉద్యోగ నోటిఫికేషన్ల జారీని మరింత వేగవంతం చేయాలని విద్య, ఐటీ శాఖల మంత్రి నారా లోకేశ్ ఈ సందర్భంగా అధికారులను ఆదేశించారు. ఇందులో భాగంగా అక్టోబర్ 15వ తేదీన మూడో, నాలుగో దశల ఉద్యోగాల భర్తీకి ఒకేసారి నోటిఫికేషన్లు విడుదల చేయాలని స్పష్టం చేశారు. నిర్దేశిత షెడ్యూల్ ప్రకారం మూడో దశలో 2,388 పోస్టులను, నాలుగో దశలో 2,981 పోస్టులను భర్తీ చేయనున్నారు.

మంత్రి నారా లోకేష్ అధ్యక్షతన జరిగిన ఈ కీలక సమీక్షా సమావేశంలో మంత్రుల బృందంతో పాటు పలు శాఖల ఉన్నతాధికారులు పాల్గొన్నారు. వివిధ ప్రభుత్వ విభాగాల్లో ప్రస్తుతం ఉన్న ఖాళీల వివరాలను అధికారులు పవర్‌పాయింట్ ప్రజెంటేషన్ ద్వారా వివరించారు. శాఖల పనితీరు, తక్షణ అవసరాలకు తగినట్లుగా నియామకాలు చేపట్టాలని మంత్రి లోకేష్ అధికారులకు దిశానిర్దేశం చేశారు. నిరుద్యోగ యువతకు ఇచ్చిన హామీ మేరకు పారదర్శకంగా ఈ భర్తీ ప్రక్రియను పూర్తి చేయాలని ప్రభుత్వం భావిస్తోంది.