ఏపీ ఎయిర్‌పోర్టుల్లో బార్లు.. 24 గంటలూ ఓపెన్.. ఒక్క ఈ విమానాశ్రయంలో తప్ప!

రాష్ట్రవ్యాప్తంగా విమానాశ్రయాల్లో బార్‌లు, మద్యం దుకాణాలను ఏర్పాటు చేసేందుకు ఎక్సైజ్ లైసెన్సులు మంజూరు చేసేందుకు ఆంధ్రప్రదేశ్ ప్రభుత్వం మార్గదర్శకాలను జారీ చేసింది. ఒక్క విమానాశ్రయం మినహా మిగతా ఎయిర్‌పోర్టుల్లో ఇవి ఏర్పాటు కానున్నాయ్.

ఆంధ్రప్రదేశ్‌లోని విమానాశ్రయాలలో బార్లు, మద్యం దుకాణాల ఏర్పాటుకు లైసెన్సులు మంజూరు చేస్తూ ఏపీ ప్రభుత్వం కీలక మార్గదర్శకాలను జారీ చేసింది. అయితే ఈ నూతన విధానం నుండి ఆధ్యాత్మిక క్షేత్రమైన తిరుపతి విమానాశ్రయానికి మినహాయింపు ఇచ్చారు. ఈ మేరకు రెవెన్యూ (ఎక్సైజ్-II) ప్రిన్సిపల్ సెక్రటరీ ముకేశ్ కుమార్ మీనా 'జీవో ఎంఎస్ నెం. 386' విడుదల చేశారు.

ఏపీ ఎయిర్‌పోర్టుల్లో బార్లు

విమానాశ్రయ ప్రాంగణంలో బార్ లేదా మద్యం దుకాణం ఏర్పాటు చేయాలనుకునే దరఖాస్తుదారులను సంబంధిత ఎయిర్‌పోర్ట్ ఆపరేటర్లు ప్రభుత్వానికి సిఫార్సు చేయాల్సి ఉంటుంది.

బార్ లైసెన్స్ కోసం ఎయిర్‌పోర్ట్ ఆపరేటర్ సిఫార్సు చేసిన అభ్యర్థులు రూ. 5 లక్షల నాన్-రిఫండబుల్ (తిరిగి ఇవ్వబడని) ఫీజుతో పాటు 'ఫామ్-1B' లో సంబంధిత ఎక్సైజ్ డిప్యూటీ కమిషనర్‌కు దరఖాస్తు చేసుకోవాలి. విచారణ అనంతరం జిల్లా ఎక్సైజ్ అధికారి 'ఫామ్-2B' ద్వారా బార్ లైసెన్స్ మంజూరు చేస్తారు.

మద్యం దుకాణాల కోసం ఆపరేటర్ సిఫార్సు చేసిన దరఖాస్తుదారులు రూ. 2 లక్షల నాన్-రిఫండబుల్ ఫీజుతో 'ఫామ్ A-3(B)' లో దరఖాస్తు చేసుకోవాలి. ఎక్సైజ్ అధికారుల పరిశీలన తర్వాత లైసెన్స్ జారీ అవుతుంది.

ఎయిర్‌పోర్ట్ ఆపరేటర్‌కు, సదరు లైసెన్స్ దారునికి మధ్య కుదిరిన ఒప్పందం (MoU) లేదా అగ్రిమెంట్ గడువు ముగిసే వరకు ఈ లైసెన్స్ అమలులో ఉంటుంది. విమానాశ్రయాల్లోని ప్రయాణికుల రద్దీ ఆధారంగా వార్షిక రిటైల్ ఎక్సైజ్ పన్ను నిర్ధారించారు.

సంవత్సరానికి 20 లక్షలు లేదా అంతకంటే ఎక్కువ మంది ప్రయాణికులను నిర్వహించే విమానాశ్రయాలలో బార్‌ల కోసం వార్షిక రిటైల్ ఎక్సైజ్ పన్నును రూ. 25 లక్షలుగా, తక్కువ ప్రయాణీకుల రద్దీ ఉన్న విమానాశ్రయాలలో రూ. 15 లక్షలుగా నిర్ణయించారు. మద్యం దుకాణాల కోసం వార్షిక పన్నును రూ. 1 కోటిగా నిర్ణయించారు. విమానాశ్రయాలకు వచ్చే ప్రయాణికుల సంఖ్య ఆధారంగా మూడేళ్ల తర్వాత ఈ విధానాన్ని సమీక్షిస్తామని ప్రభుత్వం తెలిపింది.

విమానాశ్రయ కార్యాచరణ నియమావళి, భద్రతా నిబంధనలు, శాంతిభద్రతల అవసరాలకు లోబడి, బార్‌లు, మద్యం దుకాణాలు ఇరవై నాలుగు గంటలూ పనిచేయడానికి అనుమతిస్తారు.