తీరం దాటుతున్న అర్నబ్ తీవ్ర తుపాను ధాటికి పలు ప్రాంతాల్లో ప్రజలు తీవ్ర ఇబ్బందులు ఎదుర్కొంటున్నారు. ఇలాంటి విపత్తు సమయంలో బాధితులకు త్వరితగతిన సహాయం అందించేందుకు రాష్ట్ర ప్రభుత్వ సమాచార రవాణా విభాగం (RTGS) వినూత్న చర్యలు చేపట్టింది. బాధితులు తమ ప్రాంతాల్లో ఎదురవుతున్న వివిధ సమస్యలను నేరుగా అధికారుల దృష్టికి తీసుకెళ్లేందుకు 'మనమిత్ర' వాట్సాప్ గవర్నెన్స్ సేవలను అందుబాటులోకి తీసుకువచ్చింది.
తుపాన్ ప్రభావం వల్ల భారీ గాలులు, వర్షాల కారణంగా విద్యుత్ సరఫరా నిలిచిపోవడం, చెట్లు లేదా గోడలు కూలిపోవడం, నివాస ప్రాంతాల్లోకి నీరు చేరడం, రాకపోకలకు అంతరాయం ఏర్పడటం వంటి ఏ సమస్య ఎదురైనా ప్రజలు ఈ వాట్సాప్ నంబర్ ద్వారా అధికారులకు ఫిర్యాదు చేయవచ్చు.
మనమిత్ర వాట్సాప్ సేవలను వినియోగించుకునే విధానం:
- మీ మొబైల్‌లోని వాట్సాప్ ద్వారా 9552300009 నంబర్‌కు 'Hi' (హాయ్) అని మెసేజ్ పంపాలి.
- చాట్‌లో కనిపిస్తున్న ఆప్షన్లలో 'సేవలు' (Services) అనే విభాగాన్ని ఎంచుకోవాలి.
- అనంతరం 'అర్నబ్ సైక్లోన్ ఇష్యూస్' (Arnab Cyclone Issues) ఆప్షన్‌పై క్లిక్ చేయాలి.
- తర్వాత 'రిపోర్ట్ ఇష్యూ' (Report Issue) ఎంచుకుని 'కన్ఫర్మ్' (Confirm) చేయాలి.
- వెంటనే 'రిజిస్ట్రేషన్' ఆప్షన్‌ను ఎంచుకోవాల్సి ఉంటుంది.
- చివరిగా మీ పేరు, జిల్లా, మండలం నమోదు చేసి, మీ ప్రాంతంలో ఎదురవుతున్న సమస్యను వివరంగా టైప్ చేయాలి.
- ప్రజలు తమ ప్రాంతంలోని సమస్యకు సంబంధించిన ఫొటోలను కూడా ప్రత్యక్షంగా అప్‌లోడ్ చేసే వెసులుబాటును ఇందులో కల్పించారు.
- మీరు పంపిన ఫిర్యాదు వెంటనే సంబంధిత క్షేత్రస్థాయి అధికారికి చేరుతుంది. వారు తక్షణమే స్పందించి సమస్యను పరిష్కరిస్తారు.
తుపాన్ ప్రభావిత ప్రాంతాల్లో ఉన్న ప్రజలందరూ ఈ వాట్సాప్ గవర్నెన్స్ సదుపాయాన్ని వినియోగించుకుని సురక్షితంగా ఉండాలని, అత్యవసర సాయం కోసం వెంటనే సమాచారం అందించాలని ఆర్టీజీఎస్ అధికారులు విజ్ఞప్తి చేశారు.