AP Thalliki Vandanam Scheme : తల్లికి వందనం స్కీమ్ - రేపటి నుంచే ఖాతాల్లోకి నగదు, స్టేటస్ ఎలా చెక్ చేసుకోవాలంటే..?

AP Govt Thalliki Vandanam : తల్లికి వందనం స్కీమ్ నిధుల విడుదలకు రంగం సిద్ధమైంది. రేపు 64,76,590 మంది విద్యార్థులకు రూ.15,000 చొప్పున నిధులు జమమవుతాయి.

AP Govt Thalliki Vandanam : రాష్ట్రంలోని పేద విద్యార్థుల తల్లులకు అండగా నిలిచేందుకు ప్రభుత్వం ప్రతిష్టాత్మకంగా ప్రారంభించిన ‘తల్లికి వందనం’ పథకం అమలుకు ముహూర్తం ఖరారైంది. ఈ పథకం కింద లబ్ధిదారులకు ఆర్థిక సాయం అందించే నిధుల పంపిణీ ప్రక్రియ రేపటి నుంచి (జూలై 22) అధికారికంగా షురూ కానుంది. ఒకటో తరగతి నుంచి ఇంటర్మీడియట్ వరకు చదువుతున్న అర్హులైన ప్రతి విద్యార్థి తల్లి ఖాతాలో రూ.13,000 చొప్పున ప్రభుత్వం జమ చేయనుంది.

తల్లికి వందనం స్కీమ్ నిధులు

ఈ ఆర్థిక సాయం జూలై 22 నుంచి జూలై 24వ తేదీ వరకు మూడు రోజుల పాటు దశలవారీగా నేరుగా లబ్ధిదారుల బ్యాంక్ ఖాతాల్లోకి డిబిటి (DBT) పద్ధతి ద్వారా చేరనుంది. ఈ ప్రక్రియతో రాష్ట్ర వ్యాప్తంగా ఉన్న లక్షలాది మంది విద్యార్థుల కుటుంబాలకు ఎంతో మేలు చేకూరనుంది.

తల్లికి వందనం స్కీమ్ - స్టేటస్ ఎలా చెక్ చేసుకోవాలంటే..?

• ముందుగా https://bm-sgsw.ap.gov.in/BM/Schemeout లోకి వెళ్లాలి.
• ఆధార్ నెంబర్‌, స్కీమ్‌ టైప్(తల్లికి వందనం) , సెలెక్ట్ ఇయర్‌ ఉంటుంది.
• ఆధార్ ఉన్న చోట మీ విద్యార్థి ఆధార్ కార్డు నెంబర్‌ను ఎంటర్ చేయాలి.
• తర్వాత 2026-27 సంవత్సరాన్ని ఎంచుకోవాలి.
• పక్కనే ఉన్న డిటేల్స్‌పై క్లిక్ చేయాలి.
• తర్వాత మీ మొబైల్ నెంబర్‌కు ఓటీపీ వస్తుంది.
• దాన్ని స్కీన్‌పై కనిపిస్తున్న చోట ఎంటర్ చేయాలి.
• తర్వాత దాని కింద కనిపించే క్యాప్చాను ఎంటర్ చేయాలి.
• వెంటనే స్క్రీన్‌పై మీ స్కీమ్‌ వివరాలు కనిపిస్తాయి.

ఆన్‌లైన్‌లో మీకు వెతుక్కోవడం ఇబ్బందిగా ఉంటే…. మీ పరిధిలోని గ్రామ/వార్డు సచివాలయంలో ఉండే డిజిటల్‌ అసిస్టెంట్‌ను అడిగితే మీకు సంబంధించిన వివరాలు చెబుతారు.

నకిలీ లింకులతో జాగ్రత్త!

తల్లికి వందనం పథకం నిధుల పంపిణీ వేళ సైబర్ నేరగాళ్లు అమాయకులను బురిడీ కొట్టించేందుకు ప్లాన్ చేస్తున్నారని… వారి నకిలీ లింకుల పట్ల లబ్ధిదారులు అత్యంత అప్రమత్తంగా ఉండాలని పోలీస్ ఉన్నతాధికారులు హెచ్చరించారు.

"మీ ఖాతాలో తల్లికి వందనం డబ్బులు పడాలంటే వెంటనే ఈ లింక్‌పై క్లిక్ చేయండి" లేదా "వెంటనే ఈ యాప్ ఇన్‌స్టాల్ చేసుకుని వివరాలు నమోదు చేయండి" అంటూ మొబైల్ ఫోన్లకు వచ్చే అనుమానాస్పద ఫేక్ మెసేజ్‌లను ఎంతమాత్రం నమ్మవద్దని పోలీసులు స్పష్టం చేశారు. అటువంటి లింకులపై క్లిక్ చేస్తే ఫోన్ హ్యాక్ అయి, బ్యాంక్ అకౌంట్లలో ఉన్న సొమ్ము మొత్తం సైబర్ దొంగల పాలయ్యే ప్రమాదం ఉం‌దని ఆందోళన వ్యక్తం చేశారు.

• మీ బ్యాంక్ ఖాతా నంబర్, ఏటీఎం పిన్ (ATM PIN), ఆధార్ నంబర్, ముఖ్యంగా మీ ఫోన్‌కు వచ్చే ఓటీపీ (OTP) వివరాలను ఎట్టి పరిస్థితుల్లోనూ ఎవరికీ షేర్ చేయకూడదు.
• సామాజిక మాధ్యమాలు, వాట్సాప్ లేదా ఎస్‌ఎమ్‌ఎస్ (SMS) ద్వారా గుర్తుతెలియని వ్యక్తులు పంపే ఎటువంటి లింకులపైనా క్లిక్ చేయకూడదు.
• పథకం నిధుల జమకు సంబంధించి ఎలాంటి సాంకేతిక సమస్యలు ఎదురైనా కంగారు పడాల్సిన అవసరం లేదు.
• నిధులు రాకపోతే నేరుగా మీ పరిధిలోని గ్రామ/వార్డు సచివాలయాన్ని గానీ, లేదా సంబంధిత పాఠశాల ప్రధానోపాధ్యాయులను గానీ కలిసి మీ సందేహాలను నివృత్తి చేసుకోవాలి.