ఆంధ్రప్రదేశ్ రాష్ట్రంలో వాతావరణం ఒక్కసారిగా మారిపోయింది. బంగాళాఖాతంలో ఏర్పడిన ఉపరితల ద్రోణికి తోడు ఈశాన్య రుతుపవనాల ప్రభావం తోడవడంతో రాష్ట్ర వ్యాప్తంగా పలు ప్రాంతాల్లో వర్షాలు కురిసే అవకాశం ఉంది.
ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) ప్రకటనలోని వివరాల ప్రకారం…. ముఖ్యంగా పిడుగులు పడే తీవ్రత ఎక్కువగా ఉండే అవకాశం ఉంది. ఇవాళ (అక్టోబర్ 14, 2026) రోజున రాష్ట్రంలోని పలు జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు కురుసే సూచనలున్నాయి.
ఈ జిల్లాలకు వర్ష సూచన…
ప్రధానంగా పార్వతీపురం మన్యం, అల్లూరి సీతారామరాజు, పోలవరం, విశాఖపట్నం, డాక్టర్ బీఆర్ అంబేడ్కర్ కోనసీమ, పశ్చిమ గోదావరి, ఏలూరు, కృష్ణా, ప్రకాశం, శ్రీ పొట్టి శ్రీరాములు నెల్లూరు మరియు చిత్తూరు జిల్లాల్లో అక్కడక్కడ తేలికపాటి నుంచి మోస్తరు వర్షాలు పడే అవకాశం ఉంది. ఇక రాష్ట్రంలోని మిగిలిన జిల్లాల్లో అక్కడక్కడ తేలికపాటి జల్లులు పడే సూచనలున్నాయి.
పిడుగుపాటు ప్రమాదం పొంచి ఉన్నందున వర్షం కురిసే సమయంలో బహిరంగ ప్రదేశాల్లో ఉండే ప్రజలు, రైతులు, పశువుల కాపరులు తీవ్ర జాగ్రత్తలు వహించాలని ఏపీ విపత్తుల నిర్వహణ సంస్థ స్పష్టం చేసింది.
- వర్షం పడుతున్న సమయంలో ఎట్టి పరిస్థితుల్లోనూ చెట్లు, కరెంట్ స్తంభాలు, ఇనుప స్తంభాలు లేదా భారీ హోర్డింగ్స్ కింద నిలబడవద్దు.
- పొలాల్లో పనిచేసే రైతులు, శ్రామికులు సురక్షితమైన పక్కా భవనాల్లో ఆశ్రయం పొందాలి.
- ప్రయాణాల్లో ఉన్నవారు అప్రమత్తంగా ఉంటూ, ఉరుములు మెరుపులు ప్రారంభమైనప్పుడు సురక్షిత ప్రాంతాలకు చేరుకోవాల్సి ఉంటుంది.
అమరావతి వాతావరణ కేంద్రం తెలిపిన వివరాల ప్రకారం…రేపు (15-10-2026) కోస్తాంధ్ర, యానాంలో ఒకటి లేదా రెండు చోట్ల భారీ వర్షాలు కురిసే సూచనలు ఉన్నాయి. రాయలసీమతో సహా ఇతర ప్రాంతాల్లో ఉరుములు, మెరుపులు, గంటకు 40-50 కి.మీ (గరిష్ఠంగా 60 కి.మీ) వేగంతో ఈదురుగాలులు వీచే అవకాశం ఉంది. అక్టోబర్ 16 నుంచి 18వ తేదీ వరకు కోస్తాంధ్ర, యానాం, రాయలసీమలోని కొన్ని ప్రాంతాల్లో ఉరుములు, మెరుపులతో కూడిన భారీ వర్షాలు నమోదయ్యే అవకాశం ఉంది. ఈ సమయంలో గాలుల వేగం గంటకు 40-50 కి.మీ (గరిష్ఠంగా 60 కి.మీ) వరకు ఉండవచ్చు.