తెలంగాణకు వాతావరణశాఖ బిగ్ అలర్ట్ - ఈనెల 15 నుంచి ఉరుములతో కూడిన వర్షాలు! హెచ్చరికలు జారీ

తెలంగాణకు వాతావరణశాఖ బిగ్ అలర్ట్ ఇచ్చింది. అక్టోబర్ 15 నుంచి పలు జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉందని అంచనా వేసింది.

రాష్ట్రంలో వాతావరణంలో కీలక మార్పులు రానున్నాయి. ప్రస్తుతం ఎండల తీవ్రత ఉండగా… మరో రెండు మూడు రోజుల్లో పరిస్థితులు మారే అవకాశం ఉందని వాతావరణశాఖ అంచనా వేసింది. పలు జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు పడే సూచనలున్నాయని పేర్కొంది.

తెలంగాణకు ఐఎండీ బిగ్ అలర్ట్

ఈనెల 15 నుంచి వర్షాలు…

ఇవాళ్టి నుంచి అక్టోబర్ 15 ఉదయం 08:30 గంటల వరకు పొడి వాతావరణం నెలకొనే అవకాశం ఉందని వాతావరణ శాఖ పేర్కొంది. ఈ 2 రోజుల వ్యవధిలో ఎటువంటి తీవ్రమైన హెచ్చరికలు లేవు. కానీ అక్టోబర్ 15వ తేదీ నుంచి వర్షాలు పడనున్నాయి.

• అక్టోబర్ 15 ఉదయం 08:30 నుంచి అక్టోబర్ 16 ఉదయం 08:30 వరకు తెలంగాణలోని కొన్ని ప్రాంతాల్లో తేలికపాటి నుంచి ఒక మోస్తరు వర్షాలు కురిసే అవకాశం ఉంది. గంటకు 30 నుంచి 40 కిలోమీటర్ల వేగంతో వీచే ఈదురుగాలులు, ఉరుములు, మెరుపులతో కూడిన వర్షాలు పడే సూచనలు ఉన్నాయి. జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్-మల్కాజిగిరి, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల జిల్లాల్లో ఈ ప్రభావం ఎక్కువగా ఉంటుంది. ఈ జిల్లాలకు ఎల్లో హెచ్చరికలు జారీ అయ్యాయి.
• అక్టోబర్ 16 ఉదయం నుంచి అక్టోబర్ 17 ఉదయం వరకు తేలికపాటి నుంచి మోస్తరు వర్షాలు కురిసే అవకాశం ఉంది. జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లో గంటకు 30-40 కిలోమీటర్ల వేగంతో ఈదురుగాలులతో కూడిన వర్షాలు పడే అవకాశం ఉంది.
• అక్టోబర్ 17 నుంచి అక్టోబర్ 19 ఉదయం వరకు రాష్ట్రంలో పలుచోట్ల తేలికపాటి నుంచి ఒక మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది. ఈ సమయంలో కూడా ఉరుములు, మెరుపులు, ఈదురుగాలులు (గంటకు 30-40 కి.మీ) వీచే అవకాశం ఉన్నందున జాగ్రత్తగా ఉండాలని సూచించింది. పలు ప్రాంతాలకు ఎల్లో హెచ్చరికుల జారీ అయ్యాయి.