E-Paper
మరో నాలుగు రోజులు పొడి వాతావరణం - ఈనెల 16 నుంచి తెలంగాణలో వర్షాలు!
తెలంగాణలో రాగల ఐదు రోజుల పాటు ప్రధానంగా పొడి వాతావరణం నెలకుంటుందని వాతావరణ శాఖ వెల్లడించింది. అక్టోబర్ 16 నుంచి రాష్ట్రంలో అక్కడక్కడ తేలికపాటి నుండి మోస్తరు వర్షాలు పడే అవకాశం ఉందని తెలిపింది.
Prefer HTon Google
రాష్ట్రంలో రాబోయే రోజుల్లో మళ్లీ మార్పులు రానున్నాయి. ప్రస్తుతం ఎండల తీవ్రత ఎక్కువగా ఉండగా... మరికొన్నిరోజుల్లో మళ్లీ వర్షాలు కురిసే అవకాశం ఉందని వాతావరణశాఖ అంచనా వేస్తోంది. ఫలితంగా ఉక్కపోతతో పాటు ఎండల తీవ్రత తగ్గే సూచనలున్నాయి.
హైదరాబాద్ వాతావరణ కేంద్రం రిపోర్ట్ ప్రకారం.... రాష్ట్రంలో రాబోయే కొన్ని రోజుల పాటు వాతావరణంలో గణనీయమైన మార్పులు చోటుచేసుకోనున్నాయి. అక్టోబర్ 15వ తేదీ వరకు కూడా పూర్తిగా పొడి వాతావరణమే ఉంటుంది. ఎలాంటి హెచ్చరికలు జారీ కాలేదు.
అక్టోబర్ 16 నుంచి తేలికపాటి వర్షాలు…
ఇక అక్టోబర్ 16 ఉదయం నుండి అక్టోబర్ 18 ఉదయం వరకు వాతావరణంలో మార్పులుంటాయి. ముఖ్యంగా రాష్ట్రంలోని కొన్ని ప్రాంతాల్లో తేలికపాటి నుండి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. కానీ ఎలాంటి హెచ్చరికలు అయితే జారీ లేవు.
గడిచిన వారం రోజులుగా ఎండలు మండు వేసవిని తలపిస్తున్నాయి. దీంతో ప్రజలు అవస్థలకు గురవుతున్నారు. పగటిపూట వాతావరణం నిప్పుల కొలిమిలా మారుతోంది. రాత్రి వేళల్లో ఉక్కపోతతో ప్రజలు అల్లాడుతున్నారు. గాలిలో తేమ శాతం పడిపోవడంతో వేడి తీవ్రత అధికంగా పెరిగింది. కొన్ని జిల్లాల్లో సాధారణం కన్నా రెండు నుంచి మూడు డిగ్రీల వరకు ఉష్ణోగ్రతలు ఎక్కువగా నమోదవుతుండటం కలవరపాటుకు గురిచేస్తోంది. మరోవైపు నైరుతి రుతుపవనాలు కూడా తెలంగాణపై నుంచి పూర్తిగా నిష్క్రమించినట్లు నిపుణులు అంచనా వేస్తున్నారు.
