అమరావతి మాస్టర్ ప్లాన్.. రోడ్ల నెట్‌వర్క్ కోసం సీఆర్‌డీఏ గ్రామ సభలు!

అమరావతి మాస్టర్ ప్లాన్‌లో భాగంగా గ్రామ స్థాయి రవాణా, అనుసంధాన ప్రణాళికలను రూపొందించేందుకు సీఆర్డీఏ రాజధాని పరిధిలోని గ్రామాల్లో గ్రామ సభలను ప్రారంభించింది. రోడ్ల నెట్‌వర్క్ గురించి స్థానిక ప్రజలకు అవగాహన కల్పించడం, అలాగే తుది నిర్ణయాలు తీసుకునే ముందు వారి నుంచి సూచనలు సేకరిస్తారు.

ఆంధ్రప్రదేశ్ రాజధాని అమరావతి నిర్మాణ పనుల్లో ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (APCRDA) మరొక కీలక ముందడుగు వేసింది. అమరావతి మాస్టర్ ప్లాన్‌లో భాగంగా రాజధాని పరిధిలోని గ్రామాల రవాణా వ్యవస్థ, అనుసంధాన ప్రణాళికలను రూపొందించేందుకు సీఆర్‌డీఏ గ్రామ సభలను అధికారికంగా ప్రారంభించింది.

అమరావతి

రాజధాని పరిధిలోని నార్త్-వెస్ట్ గ్రిడ్ పరిధిలో ఉన్న అబ్బరాజుపాలెం, రాయపూడి గ్రామాల్లో మెుదటి గ్రామ సభలను నిర్వహించారు.

అమరావతి బృహత్ ప్రణాళిక ప్రకారం రాజధాని నగరంతో స్థానిక గ్రామాలను ఏ విధంగా అనుసంధానించాలి, గ్రామీణ రహదారుల నెట్‌వర్క్‌ను ఎలా అభివృద్ధి చేయాలి అనే విషయాలపై ప్రజలకు అవగాహన కల్పించడమే ఈ సమావేశాల ప్రధాన లక్ష్యం.

ప్రతిపాదిత రహదారుల నెట్‌వర్క్, గ్రామాల విలీనం, రహదారుల వెడల్పు ప్రక్రియలపై స్థానిక నివాసితులకు సీఆర్‌డీఏ అధికారులు మ్యాప్‌ల ద్వారా సమగ్రంగా వివరించారు. ఫైనల్ ప్రణాళికలను ఖరారు చేయడానికి ముందు రైతులు, స్థానిక ప్రజల నుండి సలహాలు, సూచనలు, అభ్యంతరాలను స్వీకరించారు.

మాస్టర్ ప్లాన్ అమలులో స్థానికులకు ఎలాంటి ఇబ్బందులు కలగకుండా, వారి అవసరాలకు అనుగుణంగా మార్పులు చేర్చేందుకు ఈ రకమైన సంప్రదింపులు దోహదపడతాయని అధికారులు తెలిపారు. రాజధాని అమరావతి పనులను వేగవంతం చేయడంలో భాగంగా పటిష్టమైన మౌలిక వసతుల కల్పనకు ప్రభుత్వం ప్రాధాన్యతనిస్తోంది. ఇందులో భాగంగానే రాజధాని అంతర్గత రహదారులు, ప్రధాన ట్రంక్ రోడ్లు, గ్రామీణ రహదారుల సమగ్ర అనుసంధానానికి ఈ విలేజ్ సర్క్యులేషన్ అండ్ ఇంటిగ్రేషన్ ప్లాన్ ఎంతో కీలకం కానుంది.