ఏపీపీఎస్సీ జాబ్ నోటిఫికేషన్.. సూపర్‌వైజర్ గ్రేడ్ - 1 పోస్టులకు దరఖాస్తులు

ఏపీ మహిళా అభివృద్ధి, శిశు సంక్షేమ సబార్డినేట్ సర్వీస్‌ పరిధిలోని సూపర్‌వైజర్ గ్రేడ్ - 1 పోస్టులకు ఏపీపీఎస్సీ నోటిఫికేషన్ జారీ చేసింది. నవంబర్ 5వ తేదీ వరకు దరఖాస్తులు చేసుకోవచ్చు.

ఆంధ్రప్రదేశ్ రాష్ట్రంలో ప్రభుత్వ ఉద్యోగం కోసం ఎదురుచూస్తున్న మహిళా అభ్యర్థులకు ఆంధ్రప్రదేశ్ పబ్లిక్ సర్వీస్ కమిషన్(ఏపీపీఎస్సీ) శుభవార్త అందించింది. ఏపీ మహిళా అభివృద్ధి, శిశు సంక్షేమ సబార్డినేట్ సర్వీస్‌ పరిధిలోని సూపర్‌వైజర్ గ్రేడ్ - 1 పోస్టుల భర్తీకి ప్రకటన విడుదల చేసింది. ఈ నోటిఫికేషన్ ద్వారా కేవలం మహిళా అభ్యర్థులకు మాత్రమే అవకాశం కల్పించారు. ఆన్‌లైన్ దరఖాస్తు ప్రక్రియ ప్రారంభమైంది. ఉద్యోగానికి సంబంధించిన అర్హతలు, వయోపరిమితి, జీతం, పరీక్షా విధానం వంటి పూర్తి వివరాలు తెలుసుకోండి.

ప్రతీకాత్మక చిత్రం

మొత్తం 31 ఖాళీలు ఉన్నాయి. జీతం రూ.37,640 నుంచి రూ. 1,15,500 వరకు ఉంటుంది. అప్లికేషన్ అక్టోబర్ 16వ తేదీ నుంచి ప్రారంభమైంది. నవంబర్ 5 (రాత్రి 11:59 గంటల వరకు) దాకా చేసుకోవచ్చు. అధికారిక వెబ్‌సైట్ psc.ap.gov.in‌లో అప్లై చేయాలి.

అభ్యర్థులు రికగ్నైజ్డ్ యూనివర్సిటీ నుంచి హోమ్ సైన్స్, సోషల్ వర్క్‌లో డిగ్రీ కలిగి ఉండాలి. లేదా సోషియాలజీ, ఫుడ్ సైన్స్ అండ్ న్యూట్రిషన్, క్లినికల్ న్యూట్రిషన్, అప్లైడ్ న్యూట్రిషన్ లేదా ఫుడ్ టెక్నాలజీ వంటి అనుబంధ విభాగాల్లో బి.ఎస్సీ డిగ్రీ ఉత్తీర్ణులై ఉండాలి. హోమ్ సైన్స్, సోషల్ వర్క్, సోషియాలజీ, ఫుడ్ సైన్స్ అండ్ న్యూట్రిషన్‌లలో ఉన్నత విద్య అర్హత ఉన్నవారు కూడా దరఖాస్తు చేసుకోవచ్చు.

వయస్సు: 01.07.2026 నాటికి కనిష్టంగా 18 ఏళ్లు, గరిష్టంగా 44 ఏళ్లు ఉండాలి. ఎస్సీ, ఎస్టీ, బీసీ, ఈడబ్ల్యూఎస్ అభ్యర్థులకు 5 ఏళ్లు, దివ్యాంగులకు 10 ఏళ్లు మినహాయింపు ఉంటుంది. ఏపీ ప్రభుత్వ ఉద్యోగులు/ఎక్స్-సర్వీస్‌మెన్ నిబంధనల ప్రకారం మినహాయింపు ఉంటుంది.

సూపర్‌వైజర్ గ్రేడ్ - 1 పోస్టుల ఎంపిక ఆన్‌లైన్ రాత పరీక్ష ఆధారంగా జరుగుతుంది. అనంతరం అభ్యర్థులు కంపాజిట్ కంప్యూటర్ ప్రొఫిషియెన్సీ టెస్ట్ (CPT)లో అర్హత సాధించాల్సి ఉంటుంది.

అప్లికేషన్ ప్రాసెసింగ్ ఫీజు రూ. 250, పరీక్ష రుసుము: రూ. 80, ఎస్సీ, ఎస్టీ, బీసీ, దివ్యాంగులు, వైట్ రేషన్ కార్డ్ కలిగిన అభ్యర్థులకు పరీక్షా రుసుము (రూ. 80) నుంచి మినహాయింపు ఉంటుంది. ముందుగా ఏపీపీఎస్సీ అధికారిక వెబ్‌సైట్ https://psc.ap.gov.in సందర్శించండి. కొత్త అభ్యర్థులైతే ఓటీపీఆర్ ఐడీ నమోదు చేసుకోండి. ఇప్పటికే ఉన్న ఓటీపీఆర్ ద్వారా లాగిన్ అయి ‘Online Application Submission’ ఆప్షన్‌ను ఎంచుకోండి. సూపర్‌వైజర్ గ్రేడ్-1 నోటిఫికేషన్ ఎంచుకుని, సమాచారాన్ని సరిచూసుకొని ఆన్‌లైన్ ఫీజు చెల్లించి సేవ్, సబ్మిట్ చేయండి.