కార్తిక సోమవారం.. శివనామస్మరణతో మార్మోగుతున్న ఆలయాలు!

కార్తిక సోమవారం కావడంతో ఆంధ్రప్రదేశ్, తెలంగాణలో ఆలయాలు శివయ్య నామస్మరణతో మార్మోగుతున్నాయి. పెద్ద ఎత్తున భక్తులు శివాలయాలకు వస్తున్నారు.

కార్తిక మాసం ప్రారంభమైంది. ప్రత్యేకమైన కార్తిక సోమవారం కావడంతో భక్తులు ఆలయాలకు వచ్చి భక్తి శ్రద్ధలతో ప్రత్యేకంగా పూజలు నిర్వహిస్తున్నారు. కార్తిక మాసం ముదటి సోమవారం కావడంతో పంచాక్షరి మంత్రంతో శైవ క్షేత్రాలు మార్మోగుతున్నాయి. ఆలయాలు కార్తిక శోభను సంతరించుకున్నాయి. కార్తిక మాసం తొలి సోమవారం కావడంతో మహా శివుడి ఆలయాలకు భక్తులు పోటెత్తారు. ఉదయమే శివయ్యను దర్శించుకుని.. ఆలయాల్లో కార్తిక దీపాలను వెలగించారు.

కార్తిక సోమవారం ప్రత్యేక పూజలు

తెల్లవారుజామున నుంచే ఆలయాల వద్ద భక్తుల సందడి కనిపించింది. పవిత్ర దినమైన కార్తిక సోమవారం నాడు భక్తులు గంగా స్నానం చేసి.. భక్తి భావంతో శివాలయాలను దర్శించుకున్నారు. ఏపీలోని శ్రీశైలం, కాళహస్తితోపాటుగా ఇతర శివాలయాలు శివయ్య నామస్మరణతో మార్మోగుతున్నాయి. ఆంధ్రప్రదేశ్‌లోని శైవక్షేత్రాలు కార్తిక శోభను సంతరించుకున్నాయి. ఓం నమ: శివాయా పంచాక్షరీ మంత్రాన్ని జపిస్తున్నారు భక్తులు.

ఇక తెలంగాణలోని శైవక్షేత్రాల్లోనూ భక్తులతో కిటకిటలాడుతున్నాయి. వేములవాడ, కాళేశ్వరం, నల్గొండ ఛాయా సోమేశ్వర ఆలయం, చెరువుగట్టుతోపాటు రాష్ట్రంలోని శివాలయాలు శివయ్య నామస్మరణతో మార్మోగుతున్నాయి. కుటుంబ సమేతంగా ఆలయాలకు వచ్చిన భక్తులు పరమేశ్వరుడికి అభిషేకాలు చేస్తున్నారు. అనేక ఆలయాల్లో ప్రత్యేక ఏర్పాట్లు చేశారు. మహిళలు పెద్ద ఎత్తున కార్తిక దీపాలు వెలిగిస్తున్నారు.

కార్తిక సోమవాం రోజున ఉపవాసం ఆచరించిన వ్యక్తికి కైలాస ప్రవేశం ఉంటుందని నమ్మకం. ఈ రోజున వ్రతం చేయడం వలన సకల పాపాలు తొలగిపోతాయని చెబుతారు భక్తులు. కుటుంబంలో సుఖసంతోషాలు, అష్ట ఐశ్వర్యాలు కలుగుతాయని అంటారు.