బీఎస్ఎన్ఎల్ స్వాతంత్య్ర దినోత్సవ ఆఫర్లు.. ఏపీలో కొత్త టవర్లు, 4జీ సేవల విస్తరణ!

BSNL : బీఎస్ఎన్ఎల్ ఆంధ్రప్రదేశ్ సర్కిల్ స్వాతంత్య్ర దినోత్సవ ప్రత్యేక ఆఫర్లను ప్రకటించింది. అంతేకాదు రాష్ట్రవ్యాప్తంగా స్వదేశీ 4జీ కనెక్టివిటీ, శాటిలైట్ కమ్యూనికేషన్, డిజిటల్ సేవలను విస్తరించే ప్రణాళికలను వివరించింది.

భారత స్వాతంత్య్ర దినోత్సవాన్ని పురస్కరించుకుని బీఎస్ఎన్ఎల్(BSNL) ఆంధ్రప్రదేశ్ సర్కిల్ సరికొత్త ఆఫర్లను ప్రకటించింది. దీంతో పాటు రాష్ట్రవ్యాప్తంగా స్వదేశీ 4జీ నెట్‌వర్క్ విస్తరణ, శాటిలైట్ కమ్యూనికేషన్, అత్యాధునిక డిజిటల్ సేవల అభివృద్ధికి సంబంధించిన కీలక ప్రణాళికలను వెల్లడించింది. బీఎస్‌ఎన్‌ఎల్ చీఫ్ జనరల్ మేనేజర్ ఎం. శేషాచలం ఈ వివరాలను పంచుకున్నారు. ముఖ్యంగా మారుమూల గ్రామీణ ప్రాంతాల్లో కూడా కనెక్టివిటీని బలోపేతం చేయడమే తమ ప్రధాన లక్ష్యమని ఆయన స్పష్టం చేశారు. మొబైల్, ఫైబర్ (FTTH) వినియోగదారుల కోసం బీఎస్‌ఎన్‌ఎల్ ఆకర్షణీయమైన ప్లాన్లను అందుబాటులోకి తెచ్చింది.

బీఎస్‌ఎన్ఎల్

రూ.1 ఫ్రీడమ్ 2.0 ఆఫర్ (Freedom 2.0 Offer): ఈ సిమ్ తీసుకుంటే రోజుకు 1 GB డేటా, 100 SMSలు, అపరిమిత కాలింగ్ సౌకర్యం లభిస్తాయి. ఈ ప్లాన్ వ్యాలిడిటీ 24 రోజులు. మరోవైపు రూ. 2,399 వార్షిక ప్లాన్‌తో అదనంగా 47 రోజులు లభిస్తాయి, దీంతో వ్యాలిడిటీ 412 రోజులకు చేరుతుంది.

రూ.1,111 ఫైబర్ ఫ్రీడమ్ ప్లాన్: 200 Mbps స్పీడ్‌తో 5,000 జీబీ డేటా లభిస్తుంది. దీనితో పాటు 25కి పైగా ప్రీమియం ఓటీటీ ప్లాట్‌ఫారమ్‌లు, అపరిమిత వాయిస్ కాలింగ్ లభిస్తాయి.

రూ.499 ఫైబర్ బేసిక్ ప్లాన్ (60 Mbps): మొదటి నెల సేవలు పూర్తిగా ఉచితం. అంతేకాకుండా తరువాతి మూడు నెలల కాలంలో మొత్తం రూ.300 డిస్కౌంట్ లభిస్తుంది.

ఆత్మనిర్భర్ భారత్ కార్యక్రమంలో భాగంగా బీఎస్‌ఎన్‌ఎల్ పూర్తి స్వదేశీ 4జీ సాంకేతికతను వినియోగిస్తోంది. ఆంధ్రప్రదేశ్‌లో ప్రస్తుతం 6,850 టవర్లు, 15,000 బిటిఎస్ కేంద్రాలు పనిచేస్తున్నాయి. దేశవ్యాప్తంగా మరో 26,300 కొత్త బిటిఎస్ సైట్ల కోసం ఆర్డర్లు ఇచ్చారు.

ఏపీలోని 2,641 మారుమూల గ్రామాలకు కనెక్టివిటీ అందించేందుకు ఇప్పటివరకు 1,359 టవర్లను నిర్మించారు. ఇందులో అరకులో 581, ఉమ్మడి తూర్పుగోదావరి, అల్లూరి సీతారామరాజు జిల్లాల్లో 391, చిత్తూరులో 112 టవర్లు ఉన్నాయి. మరో 814 సైట్ల ద్వారా 1,206 గ్రామాలకు సేవలు విస్తరించనున్నారు. ఇప్పటికే 367 చోట్ల పనులు ప్రారంభమవ్వగా, మార్చి 2027 నాటికి ఈ ప్రాజెక్టును పూర్తి చేయాలని లక్ష్యంగా పెట్టుకున్నారు.

సాధారణ నెట్‌వర్క్ సిగ్నల్స్ లేని ప్రాంతాల్లో కూడా వాయిస్ కాలింగ్ కోసం బీఎస్‌ఎన్‌ఎల్ Global Satellite Phone Service ను అందిస్తోంది. బీఎస్‌ఎన్‌ఎల్ 'సెల్ఫ్‌కేర్ యాప్' ద్వారా టాంగో ఆధారిత BSNL Entertainment TV ని ఉచితంగా వీక్షించవచ్చు.

'మేడ్ ఇన్ ఇండియా' టెలికాం పరికరాల ప్రోత్సాహానికి 'పాలీక్యాబ్'తో ఒప్పందం చేసుకుంది. Hardware-as-a-Service మోడల్‌తో పాటు FTTH, OTT, e-SIM, యూనివర్సల్ SIM సేవలను విస్తరిస్తోంది. సర్కిల్, డిస్ట్రిక్ట్ లెవెల్ ఎన్ఓసీల ద్వారా నెట్‌వర్క్ సేవలను 24 గంటలూ పర్యవేక్షిస్తున్నారు.

గత ఆర్థిక సంవత్సరంలో బీఎస్‌ఎన్‌ఎల్ జాతీయస్థాయిలో రూ.24,500 కోట్లు, ఏపీ సర్కిల్ పరిధిలో రూ.1,089 కోట్ల ఆదాయాన్ని సమకూర్చుకుంది. ఈ ఏడాది జాతీయంగా రూ.30,000 కోట్లు, ఏపీలో రూ.1,307 కోట్ల రాబడిని లక్ష్యంగా నిర్దేశించుకుంది.

ఆంధ్రప్రదేశ్‌లో 104 ఫ్రాంచైజీ ప్రాంతాలు ఖాళీగా ఉన్నాయి. ఆసక్తి గలవారు ఫ్రాంచైజీలు, TIPలు, DSAలు, రూరల్ డిస్ట్రిబ్యూటర్లుగా చేరే అవకాశం కల్పిస్తున్నారు. అలాగే కార్పొరేట్/ఎంటర్‌ప్రైజ్ కస్టమర్ల కోసం ఒక నెల రోజుల ఉచిత ILL ట్రయల్, రెట్టింపు బ్యాండ్‌విడ్త్, 12 నెలల అడ్వాన్స్ పేమెంట్‌పై 13 నెలల సేవలందిస్తున్నట్లు బీఎస్ఎన్ఎల్ అధికారులు తెలిపారు.