అమరావతిలో సెంట్రల్‌ సెక్రెటేరియట్‌.. రాజధానికి కేంద్ర ప్రభుత్వం కీలక ప్రాజెక్ట్

అమరావతికి కేంద్ర ప్రభుత్వం కీలక ప్రాజెక్టు ప్రకటించింది. సెంట్రల్ సెక్రెటేరియట్ నిర్మాణానికి సంబంధించిన ప్రతిపాదనలకు కేంద్ర కెబినేట్ ఆమోదం తెలిపింది.

ఆంధ్రప్రదేశ్‌ నూతన రాజధాని అమరావతి అభివృద్ధిలో భాగంగా కేంద్ర ప్రభుత్వం ఒక చారిత్రాత్మక నిర్ణయం తీసుకుంది. అమరావతిలో భారీ ఎత్తున 'సెంట్రల్‌ సెక్రటేరియట్‌' (కేంద్ర సచివాలయం) నిర్మాణానికి కేంద్ర కేబినెట్‌ బుధవారం పచ్చజెండా ఊపింది. సెంట్రల్‌ పబ్లిక్‌ వర్క్స్‌ డిపార్ట్‌మెంట్‌ (CPWD) రూపొందించిన ప్రతిపాదనలకు ప్రధానమంత్రి నేతృత్వంలోని మంత్రిమండలి ఆమోదం తెలపడంతో ఈ ప్రతిష్టాత్మక ప్రాజెక్టుకు మార్గం సుగమమైంది.

అమరావతి

ఆంధ్రప్రదేశ్‌ రాజధాని అమరావతిలో సరికొత్త కేంద్ర ప్రభుత్వ కార్యాలయాల సముదాయం (CGGPOA) నిర్మాణానికి ఆర్థిక వ్యవహారాల కేబినెట్ కమిటీ (CCEA) ఆమోదం తెలిపింది. రాష్ట్ర నూతన రాజధానిలో పరిపాలనాపరమైన మౌలిక సదుపాయాలను బలోపేతం చేసేందుకు కేంద్రం తీసుకున్న ఒక కీలకమైన అడుగుగా ఇది నిలిచింది. కేంద్ర కేబినెట్ సమావేశం అనంతరం సమాచార, ప్రసార శాఖ మంత్రి అశ్విని వైష్ణవ్ ఈ నిర్ణయాన్ని వెల్లడించారు. కేంద్ర ప్రభుత్వానికి చెందిన పలు విభాగాలు, సంస్థలన్నీ ఒకే గొడుగు కిందికి వచ్చేలా, ఆధునిక సదుపాయాలతో కూడిన సమగ్ర కార్యాలయాల సముదాయాన్ని ఈ ప్రాజెక్టు ద్వారా నిర్మించనున్నట్లు ఆయన తెలిపారు.

ఈ ప్రాజెక్టును మొత్తం రూ. 2,534 కోట్లతో చేపట్టనున్నారు. దీనిని ప్రధానంగా రెండు విభాగాలుగా విభజించి నిధులను కేటాయించారు. కామన్‌ సెంట్రల్‌ సెక్రటేరియట్‌.. కేంద్ర ప్రభుత్వ వివిధ శాఖల కార్యాలయాల కోసం రూ. 1,299.08 కోట్లు ఖర్చు చేయనున్నారు.

ఉద్యోగుల నివాస సముదాయాలను నిర్మించనున్నారు. ఇక్కడ విధులు నిర్వహించే సిబ్బంది వసతి కోసం రూ. 1,234.91 కోట్లతో మల్టీస్టోరేజ్‌ (బహుళ అంతస్తుల) క్వార్టర్లను నిర్మిస్తారు. ఈ ప్రాజెక్టు కోసం ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (APCRDA) ఇప్పటికే 22.53 ఎకరాల భూమిని కేటాయించింది. ఇందులో 5.53 ఎకరాల్లో పరిపాలనా భవనాలను, మిగిలిన 17 ఎకరాల్లో ఉద్యోగుల వసతి గృహాలను నిర్మించనున్నారు.

అమరావతి కేవలం రాష్ట్ర పరిపాలనా కేంద్రంగానే కాకుండా, కేంద్ర ప్రభుత్వ కార్యకలాపాలకు కూడా ప్రధాన కేంద్రంగా మారనుందని ఏపీ ప్రభుత్వం చెబుతోంది. ఇది అమరావతి ముఖచిత్రాన్ని మార్చడమే కాకుండా, భవిష్యత్తులో మరిన్ని జాతీయ సంస్థల రాకకు పునాది వేస్తుంది.

ఈ భారీ నిర్మాణ రంగం ద్వారా వేలాది మందికి ఉపాధి లభిస్తుంది. అలాగే కేంద్ర ప్రభుత్వ ఉద్యోగులు ఇక్కడే నివాసం ఉండటం వల్ల స్థిరాస్తి రంగానికి, స్థానిక వ్యాపారాలకు పెద్ద ఎత్తున ఊతం లభిస్తుంది. కేంద్రం తీసుకున్న ఈ నిర్ణయం అమరావతి నిర్మాణాన్ని మరింత వేగవంతం చేయడమే కాకుండా, విభజన చట్టంలోని హామీల అమలు దిశగా ఒక కీలక అడుగుగా నిలుస్తుంది.

అమరావతి అభివృద్ధిలో ఇదొక చారిత్రాత్మకమైన మైలురాయి అని, ఈ కొత్త కార్యాలయాల సముదాయం అమరావతిని ప్రపంచ స్థాయి నగరంగా తీర్చిదిద్దాలనే దార్శనికతకు ఎంతో దోహదపడుతుందని ప్రభుత్వం అభిప్రాయపడింది.