తిరుమల శ్రీవారి ఆలయంలో నేత్రపర్వంగా దీపావళి ఆస్థానం - స్వామివారికి పట్టువస్త్రాల సమర్పణ

Tirumala Deepavali Asthanam 2026 : దీపావళి పండగ సందర్భంగా తిరుమల శ్రీవారి ఆలయంలో శోభాయమానంగా దీపావళి ఆస్థానం నిర్వహించారు. మలయప్ప స్వామివారికి నూతన పట్టువస్త్రాలు సమర్పించి ప్రత్యేక పూజలు చేశారు.

Tirumala Deepavali Asthanam 2026 : కాంతిమయ పండుగ దీపావళి శుభసందర్భాన్ని పురస్కరించుకుని తిరుమలేశుని సన్నిధిలో దీపావళి ఆస్థాన వేడుకను ఆదివారం అత్యంత వైభవంగా నిర్వహించారు. ప్రపంచ వ్యాప్తంగా ఉన్న శ్రీవారి భక్తులకు ఆధ్యాత్మిక ఆనందాన్ని పంచుతూ…. ఆలయ సంప్రదాయాల ప్రకారం ఈ ఉత్సవం నేత్రపర్వంగా సాగింది.

స్వామివారికి పట్టువస్త్రాల సమర్పణ…

దీపావళి ఆస్థానం (Image Source TTD)

వేడుకల్లో భాగంగా శ్రీదేవి, భూదేవి సమేత శ్రీ మలయప్ప స్వామివారితో పాటు ఆలయ సర్వసేనాధిపతి శ్రీ విష్వక్సేనుల వారి ఉత్సవ మూర్తులను బంగారు వాకిలి వద్ద ఉన్న గరుడాళ్వార్ సన్నిధిలో ప్రత్యేకంగా అమర్చిన సర్వభూపాల వాహనంపై వేంచేపు చేశారు. అనంతరం స్వామివార్లకు, అమ్మవార్లకు శాస్త్రోక్తంగా ప్రత్యేక పూజలు, ఆస్థాన నిర్వహణ ప్రక్రియను అర్చకస్వాములు జరిపారు.

ఈ విశేష పర్వదినం సందర్భంగా మూలవిరాట్‌తో పాటు ఉత్సవ మూర్తులకు నూతన పట్టువస్త్రాలను సమర్పించారు. తిరుమల ధర్మకర్తల మండలి నిర్దేశిత అథారిటీ ఛైర్మన్, ఈవో ఎమ్. రవిచంద్ర ప్రపంచవ్యాప్తంగా ఉన్న శ్రీవారి భక్తులందరికీ దీపావళి శుభాకాంక్షలు తెలియజేశారు.

ఈ ఆధ్యాత్మిక కార్యక్రమంలో తిరుమల పెద్ద జీయర్ స్వామి, చిన్న జీయర్ స్వామివార్లతో పాటు ఆలయ అధికారులు, అర్చకులు, పెద్ద సంఖ్యలో సిబ్బంది పాల్గొన్నారు.

ముగిసిన శ్రీ కల్యాణ వేంకటేశ్వరస్వామివారి పవిత్రోత్సవాలు :

శ్రీనివాసమంగాపురంలోని శ్రీ కల్యాణ వేంకటేశ్వరస్వామివారి ఆలయంలో మూడు రోజుల పాటు శాస్త్రోక్తంగా నిర్వహించిన పవిత్రోత్సవాలు శనివారం పూర్ణాహుతితో వైభవంగా ముగిశాయి.

చివరి రోజు ఉదయం స్వామివారికి సుప్రభాతం, తోమాలసేవ, కొలువు నిర్వహించారు. అనంతరం యాగశాలలో వైదిక కార్యక్రమాల తరువాత శ్రీదేవి, భూదేవి సమేత శ్రీ కల్యాణ వేంకటేశ్వరస్వామివారి ఉత్సవమూర్తులకు స్నపన తిరుమంజనం నిర్వహించారు. పాలు, పెరుగు, తేనె, కొబ్బరినీళ్లు, పసుపు, చందనంతో విశేష అభిషేకం చేశారు.