E-Paper
తిరుమలలో బ్రహ్మోత్సవ వైభవం - హనుమంత వాహనంపై కోదండరాముడిగా శ్రీ మలయప్ప!
Tirumala Navaratri Brahmotsavam 2026 : తిరుమల శ్రీవారి నవరాత్రి బ్రహ్మోత్సవాల్లో ఆరో రోజు స్వామివారు హనుమంత వాహనంపై భక్తులకు అభయమిచ్చారు. సాయంత్రం పుష్పక విమానం, రాత్రి గజవాహనంపై దర్శనమివ్వనున్నారు.
Prefer HTon Google
Tirumala Navaratri Brahmotsavam 2026 : కలియుగ ప్రత్యక్ష దైవం తిరుమల శ్రీ వెంకటేశ్వరస్వామివారి నవరాత్రి బ్రహ్మోత్సవాలు అత్యంత వైభవంగా కొనసాగుతున్నాయి. బ్రహ్మోత్సవాల ఆరో రోజైన శనివారం ఉదయం శ్రీ మలయప్పస్వామివారు కోదండ రాముని అలంకారంలో భక్తులకు దర్శనమిచ్చారు. ధనుస్సు, బాణాలు ధరించి, తన పరమభక్తుడైన హనుమంతునిపై ఊరేగుతూ భక్తులను అనుగ్రహించారు. భక్తజనుల గోవింద నామస్మరణలతో మాడ వీధులు మారుమోగిపోయాయి.
వాహనసేవ ముందర వివిధ ప్రాంతాల నుంచి వచ్చిన భక్తబృందాలు చెక్కభజనలు, కోలాటాలు, జానపద నృత్యాలతో స్వామివారిని కీర్తించారు. మంగళవాయిద్యాల దివ్య మంగళ ధ్వనుల నడుమ వాహన సేవ కోలాహలంగా సాగింది. మాడ వీధుల్లో వేచి ఉన్న వేలాది మంది భక్తులు అడుగడుగునా కర్పూర హారతులు సమర్పించి స్వామివారిని దర్శించుకుని తారకమంత్ర స్మరణ చేశారు.
భగవద్భక్తికి ప్రతీక – హనుమంత వాహనం
శ్రీవారి వాహనసేవల్లో హనుమంత వాహనానికి విశిష్టమైన స్థానం ఉంది. భగవద్భక్తులలో అగ్రగణ్యుడైన ఆంజనేయుడు శ్రీరామునిపై అచంచలమైన భక్తిప్రపత్తులకు నిదర్శనం. చతుర్వేద పండితుడు, అపార పరాక్రమశాలి అయిన ఆంజనేయుడిపై శ్రీ మలయప్పస్వామివారు విహరిస్తూ భక్తులకు విశేష ఆధ్యాత్మిక అనుభూతిని అందించారు. గురుశిష్యులైన శ్రీరాముడు, హనుమంతుడి మధ్య ఉన్న దివ్య బంధాన్ని ఈ వాహనసేవ భక్తులకు స్మరింపజేస్తుంది.
ఇక ఇవాళ సాయంత్రం 4 గంటల నుంచి 5 గంటల వరకు శ్రీ మలయప్పస్వామివారు అరుదైన పుష్పక విమానంపై వేడుకగా విహరించనున్నారు. ఇక రాత్రి 7 గంటలకు రాజసానికి ప్రతీక అయిన గజవాహనంపై స్వామివారు భక్తులకు దివ్య దర్శనం ఇవ్వనున్నారు.
ఈ ఉదయపు వాహనసేవలో తిరుమల శ్రీశ్రీశ్రీ పెద్దజీయర్‌స్వామి, శ్రీశ్రీశ్రీ చిన్నజీయర్‌స్వామి, తిరుమల తిరుపతి దేవస్థానం (టీటీడీ) ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి, బోర్డు సభ్యులతో పాటు పలువురు అధికారులు, ప్రముఖులు, భక్తులు భారీ సంఖ్యలో పాల్గొన్నారు.
