కారు సీటు కింద రూ. 9 కోట్ల బంగారం - సినీ ఫక్కీలో ఛేజ్ చేసి పట్టుకున్న డీఆర్ఐ!

విశాఖపట్నం సమీపంలో హైవేపై సినిమా ఫక్కీలో ఛేజ్ చేసి రూ. 8.98 కోట్ల విలువైన విదేశీ బంగారాన్ని డీఆర్ఐ అధికారులు పట్టుకున్నారు. కోల్‌కతా నుంచి హైదరాబాద్‌కు తరలిస్తున్న ఇద్దరిని అరెస్ట్ చేశారు.

విశాఖలో అర్ధరాత్రి వేళ జాతీయ రహదారిపై సినీ ఫక్కీలో ఛేజ్ చేసి రూ. 8.98 కోట్ల విలువైన అక్రమ బంగారాన్ని రెవెన్యూ ఇంటెలిజెన్స్ డైరెక్టరేట్ (DRI) అధికారులు స్వాధీనం చేసుకున్నారు. కోల్‌కతా నుంచి హైదరాబాద్‌కు సీక్రెట్ గా రవాణా చేస్తున్న 5,832.90 గ్రాముల విదేశీ బంగారాన్ని సీజ్ చేశారు. కారులో ప్రయాణిస్తున్న ఇద్దరిని అరెస్ట్ చేశారు.

బంగారం పట్టివేత

కోల్‌కతా మార్గంలో విదేశీ బంగారం అక్రమ రవాణా జరుగుతోందన్న స్పష్టమైన ముందస్తు సమాచారంతో డీఆర్ఐ అధికారులు జాతీయ రహదారిపై కాపు కాశారు. అనుమానాస్పదంగా వెళ్తున్న ఒక కారును గురిపెట్టి…. కొంతదూరం ఛేజ్ చేసి చివరకు అడ్డుకున్నారు. కారులో ఉన్న ఇద్దరు ప్రయాణికులను అదుపులోకి తీసుకుని తొలుత ప్రశ్నించగా వారు ఏమీ తెలియనట్లు నటించారు.

కారు సీటు కింద సీక్రెట్ గా…..

కారులో ఉన్నవారి సమాధానాలపై అనుమానం రావడంతో అధికారులు కారును క్షుణ్ణంగా తనిఖీ చేశారు. కారు ముందు భాగంలో ప్యాసింజర్ సీటు కింద కాలి ఖాళీ స్థలంలో ప్రత్యేకంగా తయారు చేసిన సీక్రెట్ బాక్సులో ఉన్నట్లు అధికారులు గుర్తించారు. తెరిచి చూడగా అందులో మూడు ప్యాకెట్లలో ప్యాక్ చేసి ఉన్న 5,832.90 గ్రాముల స్వచ్ఛమైన (24 క్యారెట్ల, 999 ప్యూరిటీ) విదేశీ బంగారం బయటపడింది. బహిరంగ మార్కెట్లో ఈ బంగారం విలువ సుమారు రూ. 8.98 కోట్లు ఉంటుందని అధికారులు అంచనా వేశారు.

కీలక విషయాలు….

పట్టుబడిన నిందితులను సమగ్రంగా విచారించగా కీలక విషయాలు వెలుగులోకి వచ్చాయి. ఈ బంగారాన్ని బంగ్లాదేశ్ సరిహద్దుల ద్వారా భారతదేశంలోకి అక్రమంగా ప్రవేశపెట్టారని, అక్కడి నుంచి కోల్‌కతా మీదుగా రోడ్డు మార్గంలో హైదరాబాద్‌లోని వ్యాపారులకు చేరవేసేందుకు తీసుకెళ్తున్నామని నిందితులు అంగీకరించారు.