ఏపీ తీరానికి కొట్టుకొచ్చిన బోటు.. అందులో నలుగురి మృతదేహాలు!

మురసు తుపాను బీభత్సం సృష్టించింది. దీని ప్రభావంతో ఓ మత్స్యకారుల బోటు ఏపీ తీరానికి కొట్టుకొచ్చింది. అయితే అందులో నలుగురి మృతదేహాలు కనిపించాయి.

మురసు తీవ్ర తుపాను ధాటికి ప్రకాశం జిల్లా తీరంలో తీవ్ర విషాదం చోటుచేసుకుంది. తుపాను సమయంలో సముద్రంలో గల్లంతైన తమిళనాడు మత్స్యకారుల బోటు కొత్తపట్నం బీచ్‌కు కొట్టుకొచ్చింది. అందులో నలుగురి మృతదేహాలు ఉన్నాయి. ఈ ఘటనకు సంబంధించి ప్రకాశం జిల్లా కలెక్టర్ పి.రాజాబాబు కీలక వివరాలను వెల్లడించారు.

ఏపీ తీరానికి కొట్టుకొచ్చిన నలుగురి మృతదేహాలు

ప్రకాశం జిల్లా కలెక్టర్ పి.రాజాబాబు తెలిపిన వివరాల ప్రకారం.. అక్టోబర్ 29న తమిళనాడు రాజధాని చెన్నై నుండి మత్స్యకారులు సముద్రంలోకి వేటకు వెళ్లారు. అయితే మురసు తీవ్ర తుపాను దూసుకొస్తున్న నేపథ్యంలో ప్రమాదం నుంచి తప్పుకునేందుకు వారి బోట్లను సమీపంలోని సురక్షిత తీరాలకు తరలించాలని అధికారులు సూచించారు.

ఆ సూచనల ప్రకారం తమిళనాడుకు చెందిన నాలుగు బోట్లు ఆంధ్రప్రదేశ్ తీర ప్రాంతాలకు చేరుకుని లంగరు వేశాయి. ఇందులో మూడు బోట్లు రామాయపట్నం పోర్టు వద్ద, ఒక బోటు నిజాంపట్నం పోర్టు వద్ద సురక్షితంగా నిలిపారు. నవంబర్ 2 నాటికి మత్స్యకారులు, వారి బోట్లు అన్నీ సురక్షితంగా ఉన్నాయని తమిళనాడు అధికారులు కూడా ప్రాథమికంగా ధ్రువీకరించారు.

పరిస్థితి సురక్షితంగానే ఉందనుకున్న వేళ నవంబర్ 3న అనూహ్య ఘటన జరిగింది. నిజాంపట్నం పోర్టు వద్ద లంగరు వేసిన బోటులోని తొమ్మిది మంది మత్స్యకారులు, రామాయపట్నంలో ఉన్న తమ సహచరులను కలిసేందుకు బయలుదేరారు. అయితే ఈ విషయాన్ని ఆంధ్రప్రదేశ్ లేదా తమిళనాడు అధికారులకు ముందస్తుగా ఎలాంటి సమాచారం ఇవ్వలేదు.

రామాయపట్నం వైపు వెళ్తున్న క్రమంలో, సముద్రంలో ఉధృతంగా వీస్తున్న ఈదురుగాలులు, అలల ధాటికి వారి బోటు చిక్కుకుపోయి తీవ్ర తుపాను తాకిడికి గల్లంతు అయింది. దీంతో బోటులోని తొమ్మిది మంది మత్స్యకారులు అలల ఉధృతిలో గల్లంతయ్యారు.

ప్రమాదంపై సమాచారం అందగానే భారత కోస్ట్ గార్డ్, స్థానిక మెరైన్ పోలీసుల సాయంతో సహాయక చర్యలు ప్రారంభించారు. గల్లంతైన తొమ్మిది మందిలో నలుగురి మృతదేహాలు ఉన్న బోటు ప్రకాశం జిల్లా కొత్తపట్నం తీరానికి కొట్టుకువచ్చాయి. నలుగురి మృతదేహాలను పోస్ట్‌మార్టం నిమిత్తం ఒంగోలులోని ప్రభుత్వ సర్వజన ఆసుపత్రి మార్చురీకి తరలించారు.

గల్లంతైన మిగిలిన ఐదుగురి ఆచూకీ కోసం కోస్ట్ గార్డ్ హెలికాప్టర్లు, పడవల ద్వారా గాలింపు చర్యలు ముమ్మరంగా సాగుతున్నాయని కలెక్టర్ తెలిపారు.

ప్రమాద తీవ్రతను దృష్ట్యా ప్రకాశం జిల్లా కలెక్టర్ తమిళనాడు విపత్తు నిర్వహణ, మత్స్యశాఖ అధికారులతో మాట్లాడారు. తమిళనాడు అధికారులు ఇప్పటికే ఆంధ్రప్రదేశ్‌కు బయలుదేరారు. చట్టపరమైన ప్రక్రియలు, పోస్ట్‌మార్టం పూర్తి కాగానే మృతదేహాలను తమిళనాడు అధికారులకు అప్పగిస్తామని అధికారులు స్పష్టం చేశారు.

తీవ్ర తుపాను మురసు ఈ వారం ప్రారంభంలో నెల్లూరు-నరసాపురం మధ్య, ఒంగోలు సమీపంలో తీరం దాటిన సంగతి తెలిసిందే. తీరం దాటే సమయంలో గంటకు 100 నుండి 120 కిలోమీటర్ల వేగంతో ఈదురుగాలులు వీచడంతో తీర ప్రాంతాల్లో వందలాది చెట్లు, విద్యుత్ స్తంభాలు కూలిపోయి తీవ్ర ఆస్తి, పంట నష్టం వాటిల్లింది.