ఒడిశా ఎగువ ప్రాంతాల్లో కురుస్తున్న భారీ వర్షాలు, అర్నాబ్ తుపాను ప్రభావంతో శ్రీకాకుళం జిల్లా జలదిగ్బంధంలో చిక్కుకుంది. జిల్లాలోని ప్రధాన నదులైన బాహుదా, నాగావళి, వంశధార నదులు ఉగ్రరూపం దాల్చాయి. బాహుదా నది ప్రమాదకర స్థాయిని దాటి ప్రవహిస్తుండటంతో అధికారులు అత్యంత ప్రమాదకరమైన మూడో ప్రమాద హెచ్చరికను జారీ చేశారు.
ఒడిశాలోని బాఘలాటి డ్యామ్ నుంచి భారీగా నీటిని దిగువకు విడుదల చేయడంతో శ్రీకాకుళం జిల్లా ఇచ్ఛాపురం వద్ద బాహుదా నదికి వరద నీరు భారీగా వచ్చి చేరుతోంది. ప్రస్తుతం ఇచ్ఛాపురం వద్ద దాదాపు 75,000 క్యూసెక్కుల వరద నీరు ప్రవహిస్తోంది. వరద ఉధృతి పెరగడంతో ఇచ్ఛాపురం వద్ద జాతీయ రహదారిపైకి నీరు చేరి రాకపోకలకు తీవ్ర విఘాతం ఏర్పడింది. మండలంలోని పలు లోతట్టు ప్రాంతాలు జలమయమవ్వడమే కాకుండా, మరో మూడు గ్రామాలు తీవ్ర వరద ముప్పును ఎదుర్కొంటున్నాయి.
పరిస్థితిని సమీక్షించిన శ్రీకాకుళం జిల్లా కలెక్టర్ స్వప్నిల్ దినకర్ పుండ్కర్, లోతట్టు ప్రాంతాల ప్రజలు వెంటనే పునరావాస కేంద్రాలకు తరలివెళ్లాలని పిలుపునిచ్చారు. అత్యవసర పరిస్థితులను ఎదుర్కొనేందుకు వీలుగా ఇప్పటికే అన్ని సదుపాయాలతో పునరావాస కేంద్రాలను సిద్ధం చేశారు. గర్భిణులు, వృద్ధులు, చిన్నపిల్లలు మరియు అనారోగ్యంతో బాధపడుతున్న వారిని ముందస్తుగానే సురక్షిత ప్రాంతాలకు తరలించాలని వైద్య, రెవెన్యూ సిబ్బందిని కలెక్టర్ ఆదేశించారు. రెవెన్యూ, పోలీస్, విపత్తు నిర్వహణ బృందాలు క్షేత్రస్థాయిలో పరిస్థితిని నిరంతరం పర్యవేక్షిస్తున్నాయి.
బాహుదా మాత్రమే కాకుండా భారీ వర్షాల వల్ల నాగావళి, వంశధార నదులు కూడా తీవ్రంగా ప్రవహిస్తున్నాయి. నాగావళి నదిపై ఉన్న నారాయణపురం ఆనకట్ట వద్ద, వంశధార నదిపై ఉన్న గొట్టా బ్యారేజీ వద్ద అధికారులు మొదటి ప్రమాద హెచ్చరికను జారీ చేశారు. ఈ రెండు నదీ పరివాహక ప్రాంతాల్లోని మొత్తం 167 గ్రామాలకు (నాగావళి తీరంలో 53, వంశధార తీరంలో 114) జిల్లా యంత్రాంగం ముందస్తు హెచ్చరికలు జారీ చేసింది.
నారాయణపురం ఆనకట్ట 1 లక్ష నుంచి 1.80 లక్షల క్యూసెక్కుల వరద నీరు వచ్చే అవకాశం ఉంది. గొట్టా బ్యారేజీకి 60,900 నుంచి 1.10 లక్షల క్యూసెక్కుల నీరు వచ్చే అవకాశం ఉందని అధికారులు అంచనా వేశారు.
{{/usCountry}}నారాయణపురం ఆనకట్ట 1 లక్ష నుంచి 1.80 లక్షల క్యూసెక్కుల వరద నీరు వచ్చే అవకాశం ఉంది. గొట్టా బ్యారేజీకి 60,900 నుంచి 1.10 లక్షల క్యూసెక్కుల నీరు వచ్చే అవకాశం ఉందని అధికారులు అంచనా వేశారు.
{{/usCountry}}వాగులు, వంకలు, పొంగిపొర్లుతున్న రహదారులను దాటే ప్రయత్నం ఎట్టి పరిస్థితుల్లోనూ చేయవద్దు. నదీ తీరాలకు లేదా వంతెనల వద్దకు వెళ్లి వరద నీటిని చూడటం, రికార్డ్ చేయడం లేదా రీల్స్ చేయడం లాంటివి చేయరాదు. అత్యవసర సహాయం కోసం స్థానిక అధికారులు లేదా కంట్రోల్ రూమ్ నంబర్లను సంప్రదించాలి. రెవెన్యూ, విపత్తు నిర్వహణ అధికారులు ఇచ్చే ఆదేశాలను పాటిస్తూ, సురక్షిత ప్రాంతాలకు సహకరించాలని విజ్ఞప్తి.