బంగాళాఖాతంలో బలపడుతున్న అల్పపీడనం - ఏపీలో భారీ నుంచి అతి భారీ వర్షాలు! ఐఎండీ హెచ్చరికలివే

బంగాళాఖాతంలో ఏర్పడిన అల్పపీడనం వాయుగుండంగా మారే అవకాశం ఉంది. ఈ ప్రభావంతో ఏపీలో భారీ నుంచి అతిభారీ వర్షాలు కురిసే ఛాన్స్ ఉంది. మత్స్యకారులు వేటకు వెళ్లొద్దని అధికారులు హెచ్చరించారు.

ఉత్తర అండమాన్, దానికి ఆనుకుని ఉన్న తూర్పుమధ్య బంగాళాఖాతం ప్రాంతంలో అల్పపీడనం కేంద్రీకృతమైంది. ఇది రాబోయే 24 గంటల్లో వాయుగుండంగా, ఆ తరువాతి రోజుకు తీవ్ర వాయుగుండంగా బలపడే అవకాశం ఉందని వాతావరణశాఖ అంచనా వేసింది.

ఏపీకి ఐఎండీ బిగ్ అలర్ట్

ఆంధ్రప్రదేశ్ రాష్ట్ర విపత్తుల నిర్వహణ సంస్థ బులెటిన్ వివరాల ప్రకారం.... బుధవారం ఉదయానికి ఇది దక్షిణ ఒడిశా - ఉత్తరాంధ్ర తీరాలకు సమీపంలోని పశ్చిమమధ్య - వాయువ్య బంగాళాఖాతంలోకి చేరుకునే అవకాశముంది. దీని ప్రభావంతో రాష్ట్రవ్యాప్తంగా వాతావరణం వేగంగా మారే సూచనలున్నాయి.

నాలుగు రోజుల పాటు వర్షాలు

ఈ అల్పపీడన ప్రభావంతో ఇవాళ, రేపు రాష్ట్రంలో చెదురుమదురుగా భారీ వర్షాలు కురుస్తాయి. ఇక బుధ, గురువారాల్లో అక్కడక్కడ భారీ నుంచి అతి భారీ వర్షాలు పడే అవకాశం ఉంది.

ఇవాళ (21-09-2026) రోజున రాష్ట్రవ్యాప్తంగా మేఘావృతమైన వాతావరణం ఉంటుంది. ముఖ్యంగా అల్లూరి సీతారామరాజు, పోలవరం, నంద్యాల, వైఎస్సార్ కడప జిల్లాల్లో అక్కడక్కడ పిడుగులతో కూడిన మోస్తరు వర్షాలు పడతాయని అధికారులు అంచనా వేస్తున్నారు. మిగిలిన జిల్లాల్లో తేలికపాటి నుంచి మోస్తరు వర్ష సూచన ఉంది.

మత్స్యకారులకు హెచ్చరికలు....

కోస్తాంధ్ర తీరం వెంబడి గంటకు 50 నుంచి 60 కిలోమీటర్ల వేగంతో బలమైన ఈదురుగాలులు వీచే అవకాశం ఉంది. సముద్రం తీవ్ర అలజడిగా ఉంటుందని అధికారులు తెలిపారు. వర్షాలు, ఈదురుగాలుల నేపథ్యంలో ప్రజలందరూ తగిన జాగ్రత్తలు తీసుకోవాలని, అప్రమత్తంగా ఉండాలని APSDMA సూచించింది. ముఖ్యంగా మత్స్యకారులు ఎవరూ వేటకు వెళ్లకూడదని స్పష్టమైన హెచ్చరికలు జారీ చేసింది.