E-Paper
ఈనెల 13న బంగాళాఖాతంలో అల్పపీడనం - కోస్తాంధ్ర తీరాల వైపు కదిలే సూచనలు!
ఉత్తర అండమాన్ సముద్రంలో ఉపరితల ఆవర్తనం ఏర్పడే అవకాశం ఉంది. ఇది మంగళవారం నాటికి ఆగ్నేయ బంగాళాఖాతంలో అల్పపీడనంగా మారే సూచనలున్నాయని ఐఎండీ అంచనా వేస్తోంది.
Prefer HTon Google
వాతారవణంలో కీలక మార్పులు చోటు చేసుకునే అవకాశం ఉంది. మళ్లీ ఏపీలో వర్షాలు పడే సూచనలు కనిపిస్తున్నాయి. ఈ మేరకు వాతావరణశాఖ ముఖ్యమైన వివరాలను పేర్కొంది.
ఉత్తర అండమాన్ సముద్రంలో ఉపరితల ఆవర్తనం ఏర్పడే అవకాశం ఉందని.. అది తీవ్ర రూపం దాల్చే సూచనలున్నాయని అంచనా వేసింది. ఈ ప్రభావంతో మంగళవారం నాటికి ఆగ్నేయ బంగాళాఖాతంలో అల్పపీడనం రూపుదిద్దుకోనుందని వెల్లడించింది.
ఈ అల్పపీడన వ్యవస్థ తదుపరి 3 నుంచి 4 రోజుల్లో మరింత బలపడే అవకాశం ఉంది. ఇది పశ్చిమ-వాయువ్య దిశగా ప్రయాణిస్తూ, ఉత్తర తమిళనాడు మరియు దక్షిణ కోస్తాంధ్ర తీరాల వైపు వేగంగా కదిలే సూచనలు కనిపిస్తున్నాయని పేర్కొంది.
వాయుగుండంగా మారే అవకాశం…?
బంగాళాఖాతంలో ఏర్పడబోయే ఈ అల్పపీడన తీవ్రతపై విభిన్న అంచనాలు వ్యక్తమవుతున్నాయి. ఇది బుధవారం నాటికి మరింత తీవ్రమై వాయుగుండం గా మారే అవకాశం ఉందని కొన్ని ప్రధాన వాతావరణ నమూనాలు (Weather Models) సూచిస్తున్నాయి. అయితే మరికొన్ని మోడల్స్ మాత్రం ఇది అల్పపీడనంగానే కొనసాగుతుందని అంచనా వేస్తున్నాయి.
ఈ వాతావరణ వ్యవస్థ దిశ, తీవ్రతపై రాబోయే 24 నుంచి 48 గంటల్లో మరింత స్పష్టత వచ్చే అవకాశం ఉందని అధికారులు స్పష్టం చేశారు. తెలుగు రాష్ట్రాల తీర ప్రాంత ప్రజలు, ముఖ్యంగా మత్స్యకారులు అప్రమత్తంగా ఉండాలని ఏపీ విపత్తుల నిర్వహణ సంస్థ సూచించింది.
మరోవైపు గడిచిన నాలుగైదు రోజులుగా తెలుగు రాష్ట్రాల్లో ఎండల తీవ్రత ఎక్కువగా ఉంటోంది. ఉక్కపోత సమస్యతో జనం ఇబ్బందిపడుతున్నారు. ఆశించిన స్థాయిలో వర్షాలు లేకపోవటం, ఎల్ నినో ప్రభావం ఎక్కువగా ఉండటంతో…. చాలా ప్రాంతాల్లో ఇబ్బందికర పరిస్థితులు కనిపిస్తున్నాయి. అయితే తాజాగా రాబోయే అల్పపీడన ప్రభావంతో భారీ వర్షాలు కురిస్తే…. చాలా మార్పులు రావొచ్చని నిపుణులు అంచనా వేస్తున్నారు.
