పొగాకు రైతులకు రూ.50,000 వడ్డీ లేని రుణం.. క్వింటాల్‌‌పై రూ.1000 సాయం!

పొగాకు రైతులకు ఆంధ్రప్రదేశ్ ప్రభుత్వం గుడ్‌న్యూస్ చెప్పింది. రూ.50,000 వడ్డీ లేని రుణం అందించేందుకు నిర్ణయించింది.

ఆంధ్రప్రదేశ్‌లోని పొగాకు రైతులకు ఆర్థికంగా చేయూతనిచ్చేందుకు చంద్రబాబు ప్రభుత్వం కీలక ప్రతిపాదనలు ప్రకటించింది. ప్రతి పొగాకు రైతుకు రూ.50,000 చొప్పున సున్నా వడ్డీతో రెండేళ్ల కాలపరిమితికి రుణం అందించనున్నట్లు రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు వెల్లడించారు. దీనితో పాటు ప్రభుత్వం తరఫున క్వింటాల్‌ పొగాకుపై రూ.1,000 అదనపు సాయం అందజేస్తామని, పంట విక్రయించిన 9 రోజుల్లోనే డబ్బు నేరుగా రైతుల ఖాతాల్లో జమ అయ్యేలా చర్యలు తీసుకుంటున్నామని స్పష్టం చేశారు.

పొగాకు రైతులకు వడ్డీ లేని రుణం

గుంటూరులోని పొగాకు బోర్డు ప్రధాన కార్యాలయంలో సోమవారం నాడు పంట కొనుగోళ్లు, మద్దతు ధరలు, రైతులు ఎదుర్కొంటున్న సమస్యలపై ఉన్నత స్థాయి సమీక్షా సమావేశం జరిగింది. ఈ భేటీలో మంత్రులు గొట్టిపాటి రవికుమార్, డోలా శ్రీబాల వీరాంజనేయస్వామితో పాటు ప్రకాశం జిల్లా ప్రజాప్రతినిధులు, పొగాకు బోర్డు ఉన్నతాధికారులు, రైతు ప్రతినిధులు పాల్గొన్నారు.

వచ్చే సీజన్‌లో పొగాకు ఉత్పత్తిని 80 మిలియన్ కిలోలకు కట్టడి చేయాలని ప్రభుత్వం నిర్ణయించిందని మంత్రి అచ్చెన్నాయుడు అన్నారు. గ్రేడింగ్ పేరుతో వ్యాపారులు రైతులను మోసం చేయకుండా అడ్డుకునేందుకు ఐదుగురు సభ్యులతో ప్రత్యేక కమిటీని ఏర్పాటు చేశారన్నారు. నాణ్యత ఆధారంగానే సరైన ధర దక్కేలా ఈ కమిటీ పర్యవేక్షిస్తుందని చెప్పారు.

పొగాకు విక్రయించిన 9 రోజుల వ్యవధిలోనే రైతుల ఖాతాల్లోకి సొమ్ము జమ అయ్యేలా ప్రత్యేక వ్యవస్థను అందుబాటులోకి తెస్తున్నారని చెప్పారు. రైతుల సంక్షేమం కోసం ప్రభుత్వం తీసుకుంటున్న చర్యలపై ప్రతిపక్షాలు కావాలని రాజకీయం చేస్తున్నాయని అచ్చెన్నాయుడు మండిపడ్డారు. గత వైకాపా పాలనలో పొగాకు మద్దతు ధరలు ఘోరంగా పడిపోయినా వైయస్ జగన్ ప్రభుత్వం పట్టించుకోలేదని విమర్శించారు. జగన్ హయాంలో మార్క్‌ఫెడ్ ద్వారా కేవలం 11 మిలియన్ కిలోల పొగాకు మాత్రమే కొనుగోలు చేశారని గుర్తుచేశారు. తెలుగుదేశం పాలనలోనే పొగాకు రైతులకు ఎల్లప్పుడూ న్యాయం జరిగిందని, ఈ వాస్తవాన్ని రైతులు గుర్తించాలని కోరారు. నాణ్యత సాకుతో వ్యాపారులు ధరలు తగ్గించి రైతులను నిలువుదోపిడీ చేస్తే ఉపేక్షించేది లేదని హెచ్చరించారు.