తిరుమల నిత్య హారతిపై కర్ణాటక సీఎం ప్రపోజల్ రిజెక్ట్.. టీటీడీ ఛైర్మన్ కామెంట్స్

తిరుమల నిత్య హారతిపై కర్ణాటక సీఎం డీకే శివకుమార్ కామెంట్స్ వైరల్ అయిన విషయం తెలిసిందే. ఈ విషయంపై టీటీడీ ఛైర్మన్ బీఆర్ నాయుడు స్పందించారు.

కలియుగ వైకుంఠం తిరుమల శ్రీవేంకటేశ్వర స్వామి ఆలయంలో ప్రతిరోజూ ఉదయం జరిగే మొదటి హారతి (నిత్య హారతి) దర్శనానికి సంబంధించి కర్ణాటక ప్రభుత్వం ప్రతిపాదించిన సరికొత్త వీఐపీ ప్రొటోకాల్‌ను తిరుమల తిరుపతి దేవస్థానం(TTD) ట్రస్ట్ బోర్డు తీవ్రంగా తోసిపుచ్చింది. శతాబ్దాలుగా వస్తున్న ఆలయ సాంప్రదాయాలు, ఆగమ శాస్త్ర నియమాలను పొరుగు రాష్ట్రానికి చెందిన కార్యనిర్వాహక ఉత్తర్వులతో మార్చడం సాధ్యం కాదని టీటీడీ చైర్మన్ బి.ఆర్.నాయుడు స్పష్టం చేశారు.

తిరుమల శ్రీవారి ఆలయం

ఇటీవల తిరుమల పర్యటన ముగించుకున్న అనంతరం కర్ణాటక ముఖ్యమంత్రి డి.కె.శివకుమార్ బెంగళూరులో మాట్లాడుతూ ఈ వ్యాఖ్యలు చేశారు. తిరుపతిలో ప్రతిరోజూ ఉదయం ఇచ్చే నిత్య హారతిలో కర్ణాటక ప్రముఖులు పాల్గొనేలా ప్రోటోకాల్‌లో మార్పులు చేస్తామని డీకే శివకుమార్ అన్నారు. ఇప్పటివరకు కేవలం కర్ణాటక ముఖ్యమంత్రి లేదా రాష్ట్ర ప్రభుత్వం తరఫున ఒక ప్రత్యేక అధికారి మాత్రమే ఈ హారతిని వీక్షించే అవకాశం ఉండేదని, కానీ ఇకపై తమ రాష్ట్రానికి చెందిన మంత్రులు, ఎమ్మెల్యేలు, ఎంపీలు, సీనియర్ అధికారులు, న్యాయమూర్తులు ఎవరు వెళ్లినా ఆ ప్రొటోకాల్ వర్తించేలా తమ ప్రభుత్వం ఒక అధికారిక జీవో జారీ చేస్తుందని శివకుమార్ ప్రకటించారు. కర్ణాటక ప్రజాప్రతినిధులు చాలామంది దర్శనం కాకుండానే వెనుతిరుగుతున్నారని, అందుకే ఈ నిర్ణయం తీసుకున్నట్లు ఆయన సమర్థించుకున్నారు.

కర్ణాటక ముఖ్యమంత్రి చేసిన ఈ వ్యాఖ్యలపై టీటీడీ తీవ్రంగా స్పందించింది. ఇది ఏమాత్రం ఆలోచించకుండా చేసిన వ్యాఖ్యగా, దేవాలయ పరిపాలనా విషయాల్లో పొరుగు రాష్ట్రం చేసిన అధికార అతిక్రమణగా బోర్డు అభివర్ణించింది.

తిరుమల గర్భగుడిలో జరిగే ఈ నిత్య హారతి దర్శన భాగ్యం అనేది చారిత్రాత్మకంగా మైసూర్ మహారాజులకు కల్పించిన ప్రత్యేక హక్కు. తిరుమల ఆలయ అభివృద్ధికి వారు చేసిన సేవలు, విరాళాలకు గుర్తింపుగా ఈ గౌరవం దక్కింది. ఇది ఒక నిర్దిష్టమైన వంశ పారంపర్య సంప్రదాయం, నాన్-ట్రాన్స్‌ఫరబుల్ ప్రివిలేజ్ (బదిలీ చేయడానికి వీల్లేని హక్కు). 1956లో కర్ణాటక రాష్ట్రం ఏర్పడిన తర్వాత మైసూర్ మహారాజుల ప్రతినిధిగా ఒక్క స్పెషల్ ఆఫీసర్‌కు మాత్రమే దీనిని కొనసాగించారు.

తిరుమల ఆలయం ఆంధ్రప్రదేశ్ పరిధిలో ఉంటుందని, ఇది పూర్తిగా టీటీడీ బోర్డు నియమ నిబంధనలు, ఆగమ శాస్త్రాలకు లోబడి పనిచేస్తుందని గుర్తు చేశారు బీఆర్ నాయుడు. పొరుగు రాష్ట్ర కేబినెట్ తీసుకునే ఏకపక్ష నిర్ణయాలు ఇక్కడ చెల్లవని స్పష్టం చేశారు.

ఒకవేళ కర్ణాటక ప్రతిపాదనను అంగీకరిస్తే భవిష్యత్తులో ఇతర రాష్ట్రాల నుండి కూడా ఇటువంటి డిమాండ్లు వచ్చే ప్రమాదం ఉంది. రాజకీయ లబ్ధి కోసం తిరుమల పవిత్రతను, వీఐపీ సంస్కృతిని గర్భగుడి వరకు తీసుకురావద్దని టీటీడీ బోర్డు సభ్యులు డి.కె. శివకుమార్‌కు హితవు పలికారు. ఈ వ్యవహారంపై రాజకీయంగానూ తీవ్ర దుమారం రేగుతోంది.