MBBS counselling : ఎంబీబీఎస్ ప్రవేశాల కోసం KNRUHS మొదటి విడత వెబ్ ఆప్షన్లు

MBBS counselling : తెలంగాణలోని వైద్య విద్యా కోర్సుల్లో ప్రవేశాల కోసం ఎదురుచూస్తున్న విద్యార్థులకు కాళోజీ నారాయణరావు ఆరోగ్య విజ్ఞాన విశ్వవిద్యాలయం వెబ్ ఆప్షన్స్ ప్రకటించింది. విద్యార్థులు ప్రవేశాల కోసం ఈ ప్రక్రియ పూర్తి చేయాలి.

కాళోజీ నారాయణ రావు యూనివర్సిటీ ఆఫ్ హెల్త్ సైన్సెస్(KNRUHS) 2026-27 విద్యా సంవత్సరానికి గాను కాంపిటెంట్ అథారిటీ కోటా కింద ఎంబీబీఎస్ ప్రవేశాల కోసం వెబ్ ఆధారిత కౌన్సెలింగ్ మొదటి దశను శుక్రవారం ప్రారంభమైంది. నోటిఫికేషన్ ప్రకారం.. అర్హులైన అభ్యర్థులు ఆగస్టు 29న ఉదయం 6 గంటల నుండి సెప్టెంబర్ 1న మధ్యాహ్నం వరకు అధికారిక కౌన్సెలింగ్ పోర్టల్ ద్వారా తమ వెబ్ ఆప్షన్లను వినియోగించుకోవచ్చు.

ప్రతీకాత్మక చిత్రం

ఈ కౌన్సెలింగ్ KNRUHSకు అనుబంధంగా ఉన్న ప్రభుత్వ, ప్రైవేట్ అన్‌ఎయిడెడ్ మైనారిటీ, నాన్-మైనారిటీ వైద్య కళాశాలల్లోని కాంపిటెంట్ అథారిటీ కోటా కింద ఉన్న ఎంబీబీఎస్ సీట్లకు వర్తిస్తుంది. ఈ ప్రక్రియలో ఈడబ్ల్యూఎస్, దివ్యాంగులు, పీఎంసీ, సీఏపీ, SCCL వర్గాల అభ్యర్థులు కూడా ఉంటారు.

ఆన్‌లైన్ రిజిస్ట్రేషన్ సమయంలో తమ సర్టిఫికెట్లను అప్‌లోడ్ చేసి సంబంధిత శాఖలతో తాత్కాలికంగా ధృవీకరించిన, ఆగస్టు 28న KNRUHS వెబ్‌సైట్‌లో ప్రచురించిన యూజీ వైద్య ప్రవేశాల తుది మెరిట్ జాబితాలో పేర్లు ఉన్న అభ్యర్థులు వెబ్ ఆప్షన్లను వినియోగించుకోవడానికి అర్హులు.

మొదటి దశలో వెబ్ ఆప్షన్లను వినియోగించుకోని వారికి తదుపరి కౌన్సెలింగ్ దశలలో ఆప్షన్లను వినియోగించుకోవడానికి అనుమతి ఉండదని KNRUHS అభ్యర్థులను హెచ్చరించింది. అదేవిధంగా తమ ఆప్షన్స్ ప్రకారం సీటు కేటాయించబడినప్పటికీ, కేటాయించిన కళాశాలలో చేరని అభ్యర్థులు తదుపరి రౌండ్లలో పాల్గొనడానికి అర్హులు కారు.

కేటాయించిన వైద్య కళాశాలలో అసలు ధృవపత్రాల తుది ధృవీకరణ జరుగుతుందని కూడా KNRUHS పేర్కొంది. ధృవీకరణ సమయంలో ఏదైనా తప్పులు కనిపిస్తే.. తాత్కాలిక కేటాయింపు రద్దుకు, విశ్వవిద్యాలయ నిబంధనల ప్రకారం తదుపరి చర్యలు ఉంటాయి.