E-Paper
AP Municipal Elections : ఆంధ్రప్రదేశ్‌లో మళ్లీ మున్సిపల్ ఎన్నికలు.. నవంబర్ 26న పోలింగ్
AP Municipal Elections : ఆంధ్రప్రదేశ్‌లో మళ్లీ మున్సిపల్ ఎన్నికలు జరగనున్నాయి. కోర్టు వివాదాలు క్లియర్ కావడంతో పలు పురపాలక, నగరపాలక సంస్థలకు పోలింగ్ నిర్వహించాలని రాష్ట్ర ఎన్నికల సంఘం నిర్ణయించింది.
Prefer HTon Google
న్యాయపరమైన చిక్కుల్లో చిక్కుకొని వాయిదా పడుతూ వస్తున్న ఆంధ్రప్రదేశ్ స్థానిక సంస్థల ఎన్నికల ప్రక్రియ మళ్లీ తుది దశకు చేరింది. కోర్టు వివాదాలు తొలగిపోవడంతో మిగిలిపోయిన పలు నగరపాలక సంస్థలు, పురపాలక సంఘాలకు తక్షణమే ఎన్నికలు నిర్వహించాలని రాష్ట్ర ఎన్నికల సంఘం నిర్ణయం తీసుకుంది. దీనికి సంబంధించిన సమగ్ర పోలింగ్ ప్రణాళికను ఎస్ఈసీ అధికారికంగా ఖరారు చేసింది.
రాష్ట్రంలో ఇప్పటికే షెడ్యూల్ చేసిన మొదటి దశ పంచాయతీ ఎన్నికలతో పాటుగానే, ఈ మున్సిపాలిటీలు, కార్పొరేషన్లకు కూడా పోలింగ్ నిర్వహించాలని ఎన్నికల కమిషన్ నిర్ణయించింది. ఈ ఎన్నికల నిర్వహణకు సంబంధించి నవంబర్ 12వ తేదీన అధికారిక ఎన్నికల నోటిఫికేషన్‌ను విడుదల చేయనున్నారు. నోటిఫికేషన్ వెలువడిన అనంతరం నామినేషన్ల స్వీకరణ, పరిశీలన పూర్తి చేసి, నవంబర్ 26వ తేదీన ఓటింగ్ ప్రక్రియను నిర్వహించనున్నారు.
ఆయా స్థానిక సంస్థల పరిధిలో ఎన్నికల నిర్వహణ అధికారుల నియామకం, ఓటర్ల జాబితా తనిఖీ, రిజర్వేషన్ల ప్రక్రియను అధికారులు ఇప్పటికే పూర్తి చేశారు. లీగల్ క్లియరెన్స్ రావడంతో 4 ప్రముఖ మున్సిపల్ కార్పొరేషన్లలో ఎన్నికల వేడి మెుదలైంది. అవి శ్రీకాకుళం, కాకినాడ, రాజమహేంద్రవరం (రాజమండ్రి), మంగళగిరి - తాడేపల్లి.
రాష్ట్ర వ్యాప్తంగా వివిధ జిల్లాల్లో నిలిచిపోయిన 19 మున్సిపాలిటీల్లో పోలింగ్ నిర్వహించేందుకు ఎస్ఈసీ పచ్చజెండా ఊపింది. ఆముదాలవలస, రాజాం, పాలకొల్లు, భీమవరం, తాడేపల్లిగూడెం, తణుకు, చింతలపూడి, గుడివాడ, తాడిగడప, పొన్నూరు, నర్సరావుపేట, బాపట్ల, కందుకూరు, పొదిలి, కావలి, గూడూరు, అల్లూరు, శ్రీకాళహస్తి, బి.కొత్తకోటలో ఎన్నికలు జరగనున్నాయి.
గతంలో రాష్ట్రవ్యాప్తంగా నిర్వహించిన 13 నగరపాలక సంస్థలు, 92 పురపాలక సంఘాల ఎన్నికల్లో అధికార కూటమి పార్టీలు భారీ విజయాన్ని సాధించి తమ ఆధిక్యాన్ని చాటుకున్నాయి. అయితే వార్డుల పునర్విభజన, రిజర్వేషన్లు, ఇతర సాంకేతిక కారణాల వల్ల పలు కార్పొరేషన్లు, మున్సిపాలిటీల్లో ఎన్నికలు నిలిచిపోయాయి.
ఇటీవల న్యాయస్థానాల్లో ఈ వివాదాలను పరిష్కరించడంతో ఎలాంటి ఆటంకాలు లేకుండా ఎన్నికలు నిర్వహించేందుకు ఎన్నికల కమిషన్ సన్నాహాలు పూర్తి చేస్తోంది. దీనితో ఆయా పట్టణాల్లో రాజకీయ సమీకరణాలు ఒక్కసారిగా వేడెక్కాయి.
రాష్ట్రంలో 13,171 గ్రామ పంచాయతీలకు మూడు దశల్లో పోలింగ్ నిర్వహించేందుకు ఎస్ఈసీ రెడీ అయింది. వాటితోపాటుగానే.. మున్సిపల్ ఎన్నికలు నిర్వహించనుంది. గ్రామపంచాయతీలకు ఈ నెల 12న ఎన్నికల నోటిఫికేషన్లను విడుదల చేస్తుంది. తొలి దశ పోలింగ్ 26 నవంబర్, రెండో దశ పోలింగ్ 29, మూడో దశ పోలింగ్ 2 డిసెంబర్‌న జరుగుతాయి.
