Andhrapradesh MBBS Seats : ఆంధ్రప్రదేశ్లో వైద్య విద్యను అభ్యసించాలనుకునే విద్యార్థులకు రాష్ట్ర ప్రభుత్వం తీపి కబురు అందించింది. రాష్ట్రంలోని రెండు ప్రభుత్వ వైద్య కళాశాలల్లో అదనంగా మరో 100 ఎంబీబీఎస్ (MBBS) సీట్ల కేటాయింపునకు జాతీయ వైద్య కమిషన్ (NMC) ఆమోదం తెలిపింది. ఈ మేరకు కేంద్ర ప్రభుత్వం నుంచి అనుమతులు లభించినట్లు రాష్ట్ర ఆరోగ్య, వైద్య శాఖ మంత్రి సత్య కుమార్ యాదవ్ శుక్రవారం ఒక ప్రకటనలో వెల్లడించారు.
ఈ కాలేజీల్లో సీట్లు పెంపు….
రాష్ట్ర ప్రభుత్వ విజ్ఞప్తి మేరకు జాతీయ వైద్య కమిషన్ ఈ అదనపు సీట్లను మంజూరు చేసింది. ఇందులో భాగంగా కడప ప్రభుత్వ వైద్య కళాశాలకు 75 సీట్లు, నెల్లూరులోని ఏసీఎస్ఆర్ (ACSR) ప్రభుత్వ వైద్య కళాశాలకు 25 సీట్లను అదనంగా కేటాయించారు.
మంత్రి సత్య కుమార్ యాదవ్ విడుదల చేసిన ప్రకటన ప్రకారం…. రాబోయే 2026-27 విద్యా సంవత్సరానికి గాను కడప ప్రభుత్వ వైద్య కళాశాలలో 75 సీట్లు, నెల్లూరు ఏసీఎస్ఆర్ ప్రభుత్వ వైద్య కళాశాలలో 25 సీట్లను పెంచుతూ ఎన్ఎమ్సీ 'లెటర్ ఆఫ్ పర్మిషన్' (LoP) జారీ చేసింది. ప్రభుత్వ వైద్య కళాశాలల్లో మౌలిక వసతులు, నాణ్యమైన విద్యా ప్రమాణాలను పరిశీలించిన తర్వాతే ఈ నిర్ణయం తీసుకున్నారు.
ఈ అదనపు సీట్ల కేటాయింపుతో ఆయా కాలేజీల్లో మొత్తం సీట్ల సంఖ్య గణనీయంగా పెరగనుంది. ఇప్పటివరకు కడప ప్రభుత్వ వైద్య కళాశాలలో 175 ఎంబీబీఎస్ సీట్లు అందుబాటులో ఉండగా… తాజా పెంపుతో ఆ సంఖ్య 250కి చేరుకుంది. అదేవిధంగా, నెల్లూరు ఏసీఎస్ఆర్ ప్రభుత్వ వైద్య కళాశాలలో ప్రస్తుతం ఉన్న 175 సీట్లు కాస్తా ఇకపై 200 సీట్లకు పెరగనున్నాయి. ఈ నిర్ణయంతో మరికొంత మంది స్థానిక విద్యార్థులకు ప్రభుత్వ రంగంలోనే ఉచితంగా వైద్య విద్యను అభ్యసించే సువర్ణావకాశం లభిస్తుంది.