శ్రీశైలం మల్లన్నను దర్శించుకున్న ప్రధాని మోదీ.. ప్రత్యేక పూజలు

ప్రధానమంత్రి నరేంద్ర మోదీ శ్రీశైలం మల్లన్నను దర్శించుకున్నారు. ఈ సందర్భంగా ప్రత్యేక పూజలు చేశారు.

కర్నూలు పర్యటనలో భాగంగా శ్రీశైలం క్షేత్రాన్ని ప్రధాని మోదీ దర్శించుకున్నారు. ఈరోజు ఉదయం ప్రత్యేక విమానంలో కర్నూలు చేరుకున్న ప్రధానికి ఘన స్వాగతం లభించింది. అక్కడ నుంచి సీఎం చంద్రబాబు, డిప్యూటీ సీఎం పవన్ కల్యాణ్‌తో కలిసి హెలికాప్టర్‌లో సున్నిపెంటకు చేరుకున్నారు. తర్వాత రోడ్డు మార్గంలో శ్రీశైలం వెళ్లారు. ఆలయానికి వచ్చిన ప్రధానికి అర్చకులు పూర్ణకుంభంతో స్వాగతం పలికారు.

శ్రీశైలం మల్లన్నను దర్శించుకున్న ప్రధాని మోదీ

అనంతరం సీఎం, డిప్యూటీ సీఎంతో కలిసి ప్రధాని మోదీ శ్రీ భ్రమరాంబ, మల్లికార్జున స్వామివార్లను దర్శించుకున్నారు. మల్లికార్జునస్వామికి పంచామృతాలతో రుద్రాభిషేకం కూడా చేశారు. అమ్మవారి కుంకుమార్చన సేవలోనూ ప్రధాని పాల్గొన్నారు. దర్శనం తర్వాత ప్రధానికి స్వామివారి తీర్థ ప్రసాదాలను అందజేశారు.

మల్లన్న దర్శనం అనంతరం.. శ్రీశైలంలో శివాజీ స్ఫూర్తి కేంద్రాన్ని సందర్శించారు ప్రధాని మోదీ. రాజ దర్బార్ గోడల మీద ఛత్రపతి శివాజీ చరిత్రను తెలిపే శిల్పాలను ఆసక్తిగా తిలకించారు. శివాజీ విగ్రహాన్ని నమస్కరించి కాసేపు పరిశీలించారు. శివాజీ దర్బార్‌ హాల్‌, ధ్యాన మందిరాలను చూశారు. ధ్యానముద్రలో ఉన్న శివాజీ, అమ్మవారి విగ్రహాలను దర్శనం చేసుకున్నారు. కేంద్రం నిర్వహణ బాగుందని ట్రస్టు నిర్వాహకులను అభినందించారు. ప్రధాని వెంట సీఎం చంద్రబాబు, డిప్యూటీ సీఎం పవన్ కల్యాణ్ కూడా ఉన్నారు.

ప్రధాని పర్యటన నేపథ్యంలో శ్రీశైలం పరిసర ప్రాంతాల్లో కట్టుదిట్టమైన భద్రతా ఏర్పాటు చేశారు అధికారులు. సున్నిపెంట దగ్గర సుమారు 1500 మంది సిబ్బందితో భద్రతాను పర్యవేక్షిస్తున్నారు. మధ్యహ్నా 2:30 గంటలకు కర్నూలు బయల్దేరి వెళ్తారు. అక్కడ జరిగే బహిరంగ సభలో పాల్గొంటారు.