బంగాళాఖాతంలో అల్పపీడనం - ఏపీకి వర్ష సూచన, ఈ ప్రాంతాల్లో బలమైన ఈదురుగాలులు..!

వాయువ్య బంగాళాఖాతంలో అల్పపీడనం కొనసాగుతోంది. ఈ ప్రభావంతో వాతావరణంలో పలు మార్పులు మార్పులు చోటుచేసుకోనున్నాయి. ఏపీలో ఓవైపు తేలికపాటి వర్షాలు కురిసే అవకాశం ఉండగా…. మరోవైపు బలమైన ఈదురుగాలులు వీచే సూచనలున్నాయి.

బంగాళాఖాతంలో ఏర్పడిన వాతావరణ మార్పుల ప్రభావంతో ఆంధ్రప్రదేశ్, యానాం పరిసర ప్రాంతాల్లో రాగల ఐదు రోజుల పాటు భిన్నమైన వాతావరణ పరిస్థితులు నెలకొననున్నాయి. వాయువ్య బంగాళాఖాతం, దాని పరిసర ప్రాంతాలైన ఉత్తర ఒడిశా - పశ్చిమ బెంగాల్ తీరాలలో ఇవాళ ఉదయం ఒక అల్పపీడన ప్రాంతం ఏర్పడింది.

ఏపీలో వర్షసూచన

దీనికి అనుబంధంగా ఉన్న ఉపరితల ఆవర్తనం సముద్ర మట్టానికి సుమారు 7.6 కిలోమీటర్ల ఎత్తు వరకు విస్తరించి ఉంది. రాబోయే రెండు రోజుల్లో ఇది మరింత బలపడి… బలమైన అల్పపీడనంగా మారే అవకాశం ఉందని అమరావతి వాతావరణ కేంద్రం వెల్లడించింది. ఈ అల్పపీడనం ఉత్తర ఒడిశా, పశ్చిమ బెంగాల్ మీదుగా పశ్చిమ దిశగా కదిలే అవకాశం ఉంది.

ప్రస్తుతం సముద్ర మట్టం వద్ద ఉన్న రుతుపవన ద్రోణి జమ్మూ, డెహ్రాడూన్, పాట్నా మీదుగా బంగాళాఖాతంలోని అల్పపీడన కేంద్రం వరకు విస్తరించి ఉంది. ఏపీ వైపు దిగువ ట్రోపో ఆవరణంలో వాయువ్య దిశ నుంచి బలమైన గాలులు వీస్తున్నాయి. ఈ పరిస్థితుల వల్ల రాష్ట్రంలో వర్షాలు కురిసే అవకాశం ఉంది. అంతేకాకుండా కొన్నిచోట్ల వడగాలుతో పాటు బలమైన ఈదురుగాలులు వీస్తాయి.

ఏపీ వెదర్ రిపోర్ట్ - అంచనాలు :

ఉత్తర కోస్తాంధ్ర - యానాం : ఇవాళ (జూలై 15): తేలికపాటి నుంచి మోస్తరు వర్షాలు ఒకటి లేదా రెండు చోట్ల కురిసే అవకాశం ఉంది. గంటకు 40-50 కిలోమీటర్ల వేగంతో బలమైన ఈదురుగాలులు వీస్తాయి. అలాగే ఒకటి రెండు ప్రాంతాల్లో వడగాల్పులు వీచే వీలుంది.

• రేపు (జూలై 16): కొన్ని చోట్ల తేలికపాటి నుంచి మోస్తరు వర్షాలు పడవచ్చు. గంటకు 40-50 కిలోమీటర్ల వేగంతో ఈదురుగాలులతో పాటు వడగాల్పుల తీవ్రత ఉంటుంది.
• ఎల్లుండి (జూలై 17): కొన్ని చోట్ల తేలికపాటి వర్షాలు పడే అవకాశం ఉండగా… గాలి వేగం అదే స్థాయిలో కొనసాగుతుంది. వాతావరణంలో వేడి, తేమ పెరిగి ఉక్కపోత తీవ్రంగా ఉంటుంది.

దక్షిణ కోస్తాంధ్ర : ఈరోజు (జూలై 15): పొడి వాతావరణం ఉంటుంది. బలమైన ఈదురుగాలులు వీస్తాయి. ఒకటి రెండు చోట్ల వడగాల్పులు వీచే అవకాశం ఉంది.

• రేపు (జూలై 16): ఒకటి లేదా రెండు చోట్ల తేలికపాటి కురిసే అవకాశం ఉంది. 40-50 కిలోమీటర్ల వేగంతో ఈదురుగాలులు వీస్తాయి.
• ఎల్లుండి (జూలై 17): తేలికపాటి జల్లులు కురుస్తాయి. గాలి వేగం గంటకు 40-50 కిలోమీటర్ల వరకు ఉంటుంది. ఉక్కపోతతో కూడిన అసౌకర్యకర వాతావరణం ఉంటుంది.

రాయలసీమ: ఈరోజు (జూలై 15): పొడి వాతావరణం ఉంటుంది. బలమైన గాలులతో పాటు ఒకటి రెండు చోట్ల వడగాల్పులు వీచే అవకాశం ఉంది.

• రేపు (జూలై 16): ఒకటి లేదా రెండు చోట్ల తేలికపాటి వర్షాలు పడవచ్చు. 40-50 కిలోమీటర్ల వేగంతో గాలులు వీస్తూ, వడగాల్పుల తీవ్రత ఉంటుంది.
• ఎల్లుండి (జూలై 17): తేలికపాటి వర్షాలు కురిసే అవకాశం ఉంది. గాలుల వేగం గంటకు 30-40 కిలోమీటర్లకు తగ్గినప్పటికీ… ఉక్కపోత తీవ్రత ఎక్కువగా ఉంటుంది.