స్థానిక ఎన్నికల్లో బీసీలకు 34 శాతం రిజర్వేషన్ల అంశంపై ఏపీ ప్రభుత్వం దాఖలు చేసిన పిటిషన్‌ను సుప్రీంకోర్టు కొట్టివేసింది. ఈ వ్యవహారంలో ఆంధ్రప్రదేశ్ హైకోర్టు ఇచ్చిన తీర్పును అత్యున్నత న్యాయస్థానం సమర్థించింది. స్థానిక పోరులో బీసీలకు 34 శాతం రిజర్వేషన్లు కల్పిస్తూ ప్రభుత్వం జారీ చేసిన రెండు జీవోలను రద్దు చేస్తూ ఉత్తర్వులు ఇచ్చింది.
జోక్యం చేసుకోలేం - సుప్రీంకోర్టు
జస్టిస్ దీపాంకర్ దత్తా, జస్టిస్ షీల్ నాగులతో కూడిన సుప్రీంకోర్టు ద్విసభ్య ధర్మాసనం ఈ కేసు విచారణ సందర్భంగా కీలక వ్యాఖ్యలు చేసింది. ఏపీ హైకోర్టు అత్యంత సహేతుకమైన ఉత్తర్వులను వెలువరించిందని…. అందులో తాము జోక్యం చేసుకోవాల్సిన అవసరం ఏమాత్రం లేదని ధర్మాసనం స్పష్టం చేసింది.డెడికేటెడ్‌ కమిషన్‌ నివేదికను అమలు చేస్తున్నట్లు ఎక్కడుందని వ్యాఖ్యానించింది.
34 శాతం కోటాతో మొత్తం రిజర్వేషన్లు 50 శాతం పరిమితిని దాటుతున్నాయంటూ ఏపీ ప్రభుత్వం జారీ చేసిన రెండు జీవోలను హైకోర్టు ఇటీవల కొట్టివేసిన సంగతి తెలిసిందే. దీంతో రాష్ట్ర ప్రభుత్వం సుప్రీంకోర్టును ఆశ్రయించింది. హైకోర్టు తీర్పులో జోక్యం చేసుకునేందుకు జస్టిస్ దీపాంకర్ దత్తా ధర్మాసనం నిరాకరించింది.
రాష్ట్రంలో ఎన్డీయే కూటమి ప్రభుత్వం అధికారంలోకి వచ్చాక…. ఆగస్టు 18న ముఖ్యమంత్రి చంద్రబాబు నాయుడు స్థానిక సంస్థల ఎన్నికల్లో వెనుకబడిన తరగతులకు 34 శాతం కోటా ఇస్తున్నట్లు ప్రకటించారు. ఎన్నికల్లో బీసీలకు నామినేటెడ్ పదవులతో పాటు స్థానిక ఎన్నికల్లో రిజర్వేషన్లు కల్పిస్తామని గతంలో ఇచ్చిన హామీ మేరకు ఈ నిర్ణయం తీసుకున్నట్లు కూడా పేర్కొన్నారు.
అయితే రాజ్యాంగబద్ధంగా 50 శాతం రిజర్వేషన్ల పరిమితి దాటుతుండటంతో హైకోర్టు దీనిని రద్దు చేయగా…. సుప్రీంకోర్టు కూడా హైకోర్టు నిర్ణయాన్ని సమర్థించింది. దీంతో స్థానిక సంస్థల ఎన్నికల్లో బీసీ రిజర్వేషన్ల ప్రక్రియపై మళ్లీ అనిశ్చితి ఏర్పడింది. సుప్రీంకోర్టు మార్గదర్శకాల ప్రకారం 50 శాతం పరిమితికి లోబడే రిజర్వేషన్లు ఖరారు చేసి స్థానిక ఎన్నికలకు వెళ్లాల్సి ఉంటుందని న్యాయ నిపుణులు పేర్కొంటున్నారు.