Vijayawada Palasa Special Trains : వారాంతాల్లో రైళ్లలో పెరిగే ప్రయాణికుల రద్దీని అదుపు చేయడానికి, సాధారణ ప్రయాణికులకు ఇబ్బందులు కలగకుండా సౌత్ కోస్ట్ రైల్వే (దక్షిణ తీర రైల్వే) కీలక నిర్ణయం తీసుకుంది. విజయవాడ నుంచి పలాస మధ్య దువ్వాడ మీదుగా ప్రత్యేక జన సాధారణ్ ఎక్స్‌ప్రెస్ రైళ్లను అందుబాటులోకి తెచ్చింది. అక్టోబరు 3, 4 తేదీలలో (శని, ఆదివారాల్లో) రెండు వైపులా చెరో రెండు సర్వీసుల చొప్పున ఈ ప్రత్యేక రైళ్లను నడపనున్నట్లు అధికారులు ప్రకటించారు.
టైమింగ్స్ వివరాలు….
- విజయవాడ - పలాస స్పెషల్ (రైలు సంఖ్య: 07452): ఈ రైలు అక్టోబరు 3, 4 తేదీల్లో ఉదయం 07:30 గంటలకు విజయవాడలో బయలుదేరుతుంది. మధ్యాహ్నం 14:00 గంటలకు దువ్వాడ చేరుకుని….. అక్కడి నుంచి 14:02 గంటలకు పలాస వైపు పయనమవుతుంది. అదే రోజు సాయంత్రం 18:00 గంటలకు పలాస చేరుకుంటుంది.
- పలాస - విజయవాడ స్పెషల్ (రైలు సంఖ్య: 07451): తిరుగు ప్రయాణంలో ఈ రైలు అక్టోబరు 3, 4 తేదీల్లో సాయంత్రం 18:45 గంటలకు పలాసలో బయలుదేరుతుంది. రాత్రి 22:15 గంటలకు దువ్వాడ చేరుకుని, 22:17 గంటలకు బయలుదేరి మరుసటి రోజు ఉదయం 05:30 గంటలకు విజయవాడ చేరుకుంటుంది.
ఈ ప్రత్యేక రైళ్లు ప్రయాణికుల సౌకర్యార్థం మార్గమధ్యలో నూజివీడు , ఏలూరు , తాడేపల్లిగూడెం, రాజమండ్రి , అనపర్తి , సామర్లకోట, అన్నవరం , తుని, ఎలమంచిలి, అనకాపల్లి, పెందుర్తి, కొత్తవలస, విజయనగరం, చిపురుపల్లి, పొందురు, శ్రీకాకుళం రోడ్, కోటబొమ్మాళి, నౌపడ స్టేషన్లలో ఆగుతాయి.
సాధారణ ప్రయాణికులు, చివరి నిమిషంలో ప్రయాణాలు పెట్టుకునే వారిని దృష్టిలో ఉంచుకుని ఈ రైలులోని అన్ని కోచ్‌లను అన్‌రిజర్వ్‌డ్విభాగంలోనే కేటాయించారు. ఈ రైలులో మొత్తం 10 సాధారణ ద్వితీయ శ్రేణి కోచ్‌లు, 2 సెకండ్ క్లాస్ లగేజ్ కమ్ బ్రేక్ వ్యాన్లు ఉంటాయి. ముందస్తు రిజర్వేషన్ లేకపోయినా కౌంటర్‌లో సాధారణ టికెట్ తీసుకుని ప్రయాణించే వెసులుబాటును రైల్వే శాఖ కల్పించింది. ప్రయాణికులు ఈ అవకాశాన్ని వినియోగించుకోవాలని అధికారులు సూచించారు.