ఇరిగేషన్‌ భూముల్లో సోలార్ ప్లాంట్లు.. వాటర్ రెగ్యులేటరీ కమిషన్ దిశగా అడుగులు!

ఇరిగేషన్‌ భూముల్లో సోలార్ ప్లాంట్లు ఏర్పాటు చేయాలని సీఎం చంద్రబాబు అన్నారు. మరోవైపు వాటర్ రెగ్యులేటరీ కమిషన్ మీద కూడా మాట్లాడారు.

ఆంధ్రప్రదేశ్‌ను సస్యశ్యామలం చేయడమే లక్ష్యంగా జలవనరుల శాఖ కార్యకలాపాల్లో ఊహించని విప్లవాత్మక మార్పులకు శ్రీకారం చుట్టారు ముఖ్యమంత్రి నారా చంద్రబాబు నాయుడు. రాష్ట్రంలో పెండింగ్‌లో ఉన్న సాగునీటి ప్రాజెక్టులు, ఎత్తిపోతల పథకాల మనుగడ, పర్యవేక్షణపై సచివాలయంలో ఉన్నతస్థాయి సమీక్షా సమావేశం నిర్వహించారు. ఈ భేటీలో జలవనరుల శాఖ మంత్రి నిమ్మల రామానాయుడుతోపాటు ఉన్నతాధికారులు పాల్గొన్నారు. ఈ సందర్భంగా సాగునీటి రంగంలో పారదర్శకత, స్వయంసమృద్ధి పెంచేందుకు సీఎం చంద్రబాబు పలు కీలక నిర్ణయాలు ప్రకటించారు.

సోలార్ ప్లాంటు

సాగునీటి శాఖ పరిధిలో వృథాగా ఉన్న వేలాది ఎకరాల భూములను ఆదాయ వనరుగా, పునరుత్పాదక ఇంధన కేంద్రాలుగా మార్చాలని ప్రభుత్వం భావిస్తోంది. ఇరిగేషన్ శాఖకు చెందిన ప్రతి ఎకరా స్థలాన్ని పూర్తిస్థాయిలో వినియోగించుకోవాలని సీఎం సూచించారు. ప్రాజెక్టుల పరివాహక ప్రాంతాలు, కాలువల గట్లు, ఖాళీ స్థలాల్లో సౌర విద్యుత్తు ప్లాంట్లను నిర్మించే సాధ్యాసాధ్యాలపై సమగ్ర ప్రణాళిక రూపొందించాలని అధికారులను ఆదేశించారు. దీనివల్ల ఎత్తిపోతల పథకాల నిర్వహణకు అవసరమయ్యే విద్యుత్ భారాన్ని తగ్గించుకునే అవకాశం లభిస్తుంది.

రాష్ట్రవ్యాప్తంగా ఉన్న ఎత్తిపోతల పథకాల పునరుద్ధరణ, నిరంతర నిర్వహణ, మరమ్మతుల బాధ్యతను జలహారతి కార్పొరేషన్‌కు అప్పగించాలని సీఎం నిర్ణయించారు. రైతులకు సాగునీరు అందించడంలో కీలకమైన లిఫ్ట్ ఇరిగేషన్ స్కీమ్‌లు నిరుపయోగంగా మారకుండా, సాంకేతిక లోపాలు త్యాగం కాకుండా నిరంతరం పర్యవేక్షించేలా ప్రత్యేక వ్యవస్థను ఈ కార్పొరేషన్ ద్వారా రూపొందిస్తున్నారు.

రాష్ట్రంలో నీటి వినియోగం, కేటాయింపులు, ప్రాజెక్టుల పర్యవేక్షణలో జవాబుదారీతనం కోసం నూతన కమిషన్‌ను అందుబాటులోకి తెచ్చే ఆలోచన చేస్తున్నారు. ప్రస్తుతం ఉన్న ఆంధ్రప్రదేశ్ విద్యుత్ నియంత్రణ మండలి తరహాలోనే నీటి రంగానికి కూడా వాటర్ రెగ్యులేటరీ కమిషన్‌ను తీసుకురావాలని సీఎం చంద్రబాబు ప్రతిపాదించారు.

నీటి పంపిణీలో పారదర్శకత, ప్రాజెక్టుల నిర్వహణ నిధుల కేటాయింపు, వివాదాల పరిష్కారాన్ని సులభతరం చేయడంపై ఈ కమిషన్ దృష్టి సారిస్తుంది. ఈ అంశంపై తక్షణమే నివేదిక ఇవ్వాలని అధికారులను చంద్రబాబు ఆదేశించారు. రాష్ట్రంలో కోట్లాది ఎకరాలకు సాగునీరు అందించేందుకు ప్రభుత్వం అత్యంత ప్రాధాన్యత కలిగిన 36 సాగునీటి ప్రాజెక్టుల నిర్మాణాలు, పెండింగ్ పనులను జాబితా చేసిందన్నారు. ఈ 36 ప్రాజెక్టులను రాబోయే రెండున్నరేళ్ల వ్యవధిలోనే పూర్తి చేసి ఆయకట్టుకు నీరు అందించాలని సీఎం ఆదేశించారు.

ప్రాజెక్టుల పూర్తికి ఎలాంటి నిధుల కొరత రానివ్వబోమని, పనుల ప్రగతిని ఎప్పటికప్పుడు తానే స్వయంగా సమీక్షిస్తానని సీఎం స్పష్టం చేశారు. పాడైపోయిన ఎత్తిపోతల పథకాలకు రూ.600 కోట్లకు పైగా అంచనాతో మరమ్మతులు చేపట్టి, వ్యవసాయ సీజన్ నాటికి సిద్ధం చేయడం ద్వారా గరిష్ఠ ఆయకట్టుకు నీరందించాలని ప్రభుత్వం ప్రణాళికలు రచిస్తోంది. ఒకవైపు పెండింగ్ ప్రాజెక్టుల వేగవంతం, మరొకవైపు ఇరిగేషన్ భూముల్లో ఇంధన ఉత్పత్తి ద్వారా ప్రభుత్వం ప్రణాళికలు వేస్తోంది.