విజయవాడ డివిజన్‌లో టికెట్ చెకింగ్ డ్రైవ్‌.. మూడు రోజుల్లోనే రూ.1.22 కోట్లు!

దక్షిణ మధ్య రైల్వేలోని విజయవాడ డివిజన్‌లో టికెట్ చెకింగ్ డ్రైవ్‌లో అత్యధిక ఆదాయం నమోదైంది. మూడు రోజుల్లోనే సౌత్ సెంట్రల్ రైల్వే రూ.1.22 కోట్లు సంపాదించింది.

దక్షిణ మధ్య రైల్వేలోని విజయవాడ డివిజన్ అక్టోబర్ 13 నుండి 15 వరకు నిర్వహించిన ప్రత్యేక ఇంటెన్సివ్ డ్రైవ్‌లో అత్యధిక టికెట్ చెకింగ్ ఆదాయాన్ని నమోదు చేసింది. 17,017 కేసుల నుండి మొత్తం రూ.1.22 కోట్లు సంపాదించింది. ఈ డివిజన్ అక్టోబర్ 13న రూ. 37.03 లక్షలు, అక్టోబర్ 14న రూ. 40.26 లక్షలు, అక్టోబర్ 15న ఆల్‌టైమ్ గరిష్టంగా రూ.45.03 లక్షలు ఆర్జించింది. ఇది డివిజన్ చరిత్రలో టికెట్ల తనిఖీ ద్వారా ఒకే రోజు అత్యధిక ఆదాయంగా అధికారులు చెప్పారు.

ప్రతీకాత్మక చిత్రం

మూడు రోజుల పాటు జరిగిన ఈ ప్రత్యేక డ్రైవ్‌లో ప్రతిరోజూ రైళ్లు, స్టేషన్లలో 716 మంది టికెట్ తనిఖీ సిబ్బందిని నియమించారు. అధికారులు పూర్తిస్థాయిలో తనిఖీలు చేశారు. ఈ టీమ్స్ టికెట్ లేకుండా ప్రయాణించినందుకు 7,928 కేసులు, సరైన రైలులో ప్రయాణించినందుకు 9,034 కేసులు, బుకింగ్ చేయకుండా సామాను తీసుకెళ్తున్న కేసులను నమోదు చేశాయి. వీటికి వరుసగా రూ.72.28 లక్షలు, రూ.49.96 లక్షలు, రూ.0.09 లక్షల జరిమానాలు విధించారు.

విజయవాడ డివిజన్ డివిజనల్ రైల్వే మేనేజర్ మోహిత్ సోనాకియా.. టీమ్ పనితీరును అభినందించారు. ఈ రికార్డు పనితీరు తమ టికెట్ చెకింగ్ సిబ్బంది కృషి, అప్రమత్తతకు, వాణిజ్య విభాగం కచ్చితమైన సమన్వయానికి నిదర్శనం అన్నారు. తనిఖీల ద్వారా కొత్త బెంచ్‌మార్క్‌ను పెట్టినందుకు మొత్తం బృందాన్ని అభినందనలు తెలిపారు. బాధ్యతాయుతమైన ప్రయాణం చేయాలని ప్రయాణికులను కోరారు.

ప్రయాణీకులు రైల్వే అధికారులతో సహకరించాలని, చెల్లుబాటు అయ్యే టిక్కెట్లతో ప్రయాణించాలని విజయవాడ డివిజన్ సీనియర్ డివిజనల్ కమర్షియల్ మేనేజర్ బి. ప్రశాంత కుమార్ విజ్ఞప్తి చేశారు. ప్రయాణికులు తమ ప్రయాణ సమయంలో అసౌకర్యాన్ని నివారించడానికి ఎల్లప్పుడూ సరైన టిక్కెట్లు లేదా పాస్‌లతో ప్రయాణించాలని అభ్యర్థించారు. జరిమానాలు పడకుండా సౌకర్యవంతమైన ప్రయాణం చేయాలన్నారు.