తిరుమలలో నకిలీ ఆధార్‌లతో రూమ్‌ల దందా - దళారీ ముఠా గుట్టురట్టు! వెలుగులోకి కీలక విషయాలు

తిరుమల సీఆర్వో వద్ద నకిలీ ఆధార్ కార్డులతో గదులు పొంది భక్తులకు అధిక ధరలకు విక్రయిస్తున్న కేరళ వాసిని టీటీడీ విజిలెన్స్ అధికారులు పట్టుకున్నారు. కేసు నమోదు చేసి ముఠా కోసం పోలీసులు గాలిస్తున్నారు.

కలియుగ దైవం శ్రీవేంకటేశ్వర స్వామివారి దర్శనార్థం తిరుమలకు వచ్చే అమాయక భక్తులను మోసగిస్తూ అక్రమాలకు పాల్పడుతున్న దళారీ ముఠా కుట్రను టీటీడీ విజిలెన్స్ అండ్ సెక్యూరిటీ విభాగం అధికారులు చాకచక్యంగా భగ్నం చేశారు. నకిలీ గుర్తింపు పత్రాలను సృష్టించి వేరొకరి పేర్లతో సీఆర్వో (CRO) కార్యాలయం వద్ద వసతి గదులు పొందుతూ, వాటిని భక్తులకు అధిక ధరలకు అమ్ముకుంటున్న ఘరానా దందాను అధికారులు గుట్టురట్టు చేశారు.

తిరుమలలో నకిలీ ఆధార్‌లతో రూమ్‌ల దందా

ఆగస్టు 16న జరిగిన ఈ ఘటన వివరాల్లోకి వెళితే….. అప్పటికే ఒక గదిని పొందిన ఒక వ్యక్తి, మరో నకిలీ గుర్తింపు కార్డుతో మళ్లీ గది కోసం క్యూ లైన్‌లో నిలబడ్డాడు. అతడి అనుమానాస్పద కదలికలను గమనించిన సీఆర్వో కార్యాలయ సిబ్బంది వెంటనే అలర్ట్ అయి, అతడిని అదుపులోకి తీసుకున్నారు. అనంతరం విజిలెన్స్ అధికారులకు సమాచారం అందించారు.

విచారణలో కీలక విషయాలు….

అదుపులోకి తీసుకున్న వ్యక్తిని కేరళ రాష్ట్రం మలప్పురం జిల్లాకు చెందిన ఆషిక్ అలీ పి.ఎం. (32)గా విజిలెన్స్ అధికారులు గుర్తించారు. అతడి వద్ద నుంచి రెండు నకిలీ ఆధార్ కార్డులు, ఒక గది రిజిస్ట్రేషన్ స్లిప్, రూ.800 నగదుతో పాటు ఒక సెల్‌ఫోన్‌ను స్వాధీనం చేసుకున్నారు.

విజిలెన్స్ అధికారుల విచారణలో ఆషిక్ అలీ పలు కీలక విషయాలను వెల్లడించాడు. "రంజిత్ అనే దళారి నాకు ఒక్కో గదికి రూ.1,000 చొప్పున కమిషన్ ఇస్తానని చెప్పి ఈ పనిలో పెట్టాడు. నకిలీ గుర్తింపు పత్రాలను ఉపయోగించి క్యూ లైన్లలో నిలబడి గదులు పొందడం, వాటిని రంజిత్‌కు అప్పగించడం నా బాధ్యత. ఆ తర్వాత రంజిత్ ఆ గదులను తిరుమలకు వచ్చే భక్తులకు భారీ ధరలకు విక్రయిస్తాడు," అని ఆషిక్ నిజాలు ఒప్పుకున్నాడు. ప్రస్తుతం ఈ దళారీ ముఠాలోని ఇతర సభ్యుల కోసం శోధిస్తున్నారు.

టీటీడీ విజిలెన్స్ విభాగం ఇచ్చిన ఫిర్యాదు మేరకు తిరుమల-2 టౌన్ పోలీస్ స్టేషన్‌లో ఈ ఘటనపై కేసు నమోదు చేశారు. ఆషిక్ వద్ద లభించిన నకిలీ ఆధార్ కార్డులు ఎక్కడ తయారు చేయించారు? వాటి ప్రామాణికత ఏమిటి? అనే కోణంలో పోలీసులు దర్యాప్తు చేస్తున్నారు. సెల్‌ఫోన్ డేటా, సాంకేతిక ఆధారాల సాయంతో ఈ ముఠా వెనుక ఉన్న సూత్రధారులను పట్టుకునేందుకు గాలింపు చర్యలు చేపట్టారు.

టీటీడీ విజిలెన్స్ అధికారుల కీలక విజ్ఞప్తి

తిరుమలలో వసతి గదులు కేవలం శ్రీవారి దర్శనానికి వచ్చే సామాన్య భక్తుల సౌకర్యార్థం మాత్రమేనని టీటీడీ స్పష్టం చేసింది. భక్తులు ఎట్టి పరిస్థితుల్లోనూ దళారుల బారిన పడి గదులను కొనుగోలు చేయవద్దని హెచ్చరించింది.

• ఆధార్ కార్డులు, ఫొటోలు, ఫోన్ నంబర్లు వంటి వ్యక్తిగత వివరాలను అపరిచిత వ్యక్తులకు లేదా దళారులకు ఎట్టి పరిస్థితుల్లోనూ ఇవ్వకూడదు.

• వసతి గదులను కేవలం నేరుగా తిరుమలలోని సీఆర్వో (CRO) కౌంటర్లు, టీటీడీ అధికారిక వెబ్‌సైట్ లేదా టీటీడీ అధికారిక మొబైల్ యాప్ ద్వారా మాత్రమే పొందాలి.

• ఎవరైనా దళారులు డబ్బులు తీసుకుని గది ఇప్పిస్తామని సంప్రదించినా, లేదా వారి కదలికలు అనుమానాస్పదంగా అనిపించినా భక్తులు వెంటనే ఫిర్యాదు చేయాలి.

• ఫిర్యాదు చేయాల్సిన నంబర్లు : టీటీడీ విజిలెన్స్ అండ్ సెక్యూరిటీ కంట్రోల్ రూమ్ - 9866898630, టీటీడీ ఉచిత కాల్ సెంటర్ - 155257

శ్రీవారి దర్శనానికి వచ్చే భక్తులను మోసగించే దళారులపై, వారికి సహకరించే వ్యక్తులపై చట్టపరంగా కఠినమైన చర్యలు తీసుకుంటామని అధికారులు హెచ్చరించారు.