E-Paper
తిరుమల శ్రీవారి నవరాత్రి బ్రహ్మోత్సవాలు - విద్యుత్ కాంతులతో సుందర శోభ
Tirumala Navaratri Brahmotsavam 2026 : తిరుమల శ్రీవేంకటేశ్వరస్వామి వారి నవరాత్రి బ్రహ్మోత్సవాలు అక్టోబర్ 12 నుంచి 20వ తేదీ వరకు అత్యంత వైభవంగా జరగనున్నాయి. ఆధ్యాత్మిక అనుభూతిని అందించేలా, నగరాన్ని దివ్యమైన విద్యుత్ కాంతులతో సుందరంగా అలంకరించేందుకు టీటీడీ భారీ ఏర్పాట్లు చేపట్టింది.
Prefer HTon Google
Tirumala Navaratri Brahmotsavam 2026 : తిరుమల శ్రీవారి నవరాత్రి బ్రహ్మోత్సవాలు అక్టోబర్ 12 నుంచి ప్రారంభం కానున్నాయి. ఈ నేపథ్యంలో టీటీడీ ఇప్పటికే ఏర్పాట్లు సిద్ధం చేసింది. ఇక తిరుపతి నగరాన్ని విద్యుత్ కాంతులతో సుందరంగా అలంకరించేందుకు విస్తృత ఏర్పాట్లు చేపట్టింది. భక్తులకు ఆహ్లాదకర వాతావరణం కల్పించడంతో పాటు, రద్దీకి అనుగుణంగా అన్ని సౌకర్యాలు సిద్ధం చేయనుంది.
వరుస సెలవుల కారణంగా ఈసారి తిరుపతికి భక్తుల రద్దీ విపరీతంగా పెరిగే అవకాశం ఉంది. దానికి అనుగుణంగా ప్రణాళికాబద్ధంగా ఏర్పాట్లు పూర్తి చేయాలని టిటిడి జేఈవో డా. ఎ. శరత్ అధికారులను ఆదేశించారు.
17 సర్కిళ్లు, 14 ప్రధాన రహదారులకు విద్యుత్ కాంతులు
తిరుపతిలోని టీటీడీ ఆలయాలు, పరిపాలనా భవనాలతో పాటు నగరంలోని 17 కీలక సర్కిళ్లు, 14 ప్రధాన రహదారులు, 20 స్వాగత తోరణాలు (ఆర్చ్‌లు) మరియు 8 ప్రధాన పార్కింగ్ ప్రాంతాల్లో ఆకట్టుకునేలా ప్రత్యేక విద్యుత్ అలంకరణలు చేయాలని జేఈఓ ఆదేశించారు. ముఖ్యంగా గరుడ సర్కిల్, నంది సర్కిల్ వంటి ప్రధాన కూడళ్లతో పాటు తిరుపతి నుంచి అలిపిరి వైపు వెళ్లే రహదారులను విద్యుత్ దీపాలతో సర్వాంగ సుందరంగా తీర్చిదిద్దాలన్నారు. టీటీడీ పరిపాలనా భవనం, శ్రీనివాసం, విష్ణునివాసం, మాధవం విశ్రాంతి గృహాలు, లగేజ్ కౌంటర్ల వద్ద ప్రత్యేక అలంకరణలు రూపుదిద్దుకోనున్నాయి.
పార్కింగ్ స్థలాల్లో ఫ్లడ్ లైట్లు, ఎల్ఈడీ బోర్డులు…
ప్రధాన ప్రాంతాల్లో భక్తి భావాన్ని పెంపొందించే ఎల్ఈడీ తోరణాలు, ఆకర్షణీయమైన డిజైన్లు, రంగురంగుల డిజిటల్ బోర్డులను అందుబాటులోకి తీసుకురానున్నారు. వాహన చోదకులకు వీలుగా పార్కింగ్ ప్రాంతాల్లో ఫ్లడ్‌లైట్లు ఏర్పాటు చేయడంతో పాటు, పబ్లిక్ అడ్రస్ సిస్టమ్ ద్వారా భక్తులకు నిరంతరం సమాచారాన్ని అందిస్తారు. బ్రహ్మోత్సవాలు జరిగే తొమ్మిది రోజుల పాటు నగరంలోని ప్రధాన కూడళ్లలో ప్రత్యక్ష ప్రసారాలు మరియు సమాచారం కోసం ఎల్ఈడీ బోర్డులను వినియోగిస్తారు.
