తిరుమలలో కారీరిష్టి, వరుణయాగం - ఈనెల 30 నుంచి ప్రత్యేక కార్యక్రమాలు! సెప్టెంబర్ 3 వరకు షెడ్యూల్ ఇదే

Varuna Yagam Tirumala : లోకకళ్యాణం, సమృద్ధిగా వర్షాలు కురవాలనే సంకల్పంతో తిరుమలలో కారీరిష్టి, వరుణయాగం, పర్జన్యశాంతి హోమాలను టీటీడీ నిర్వహించనుంది. ఆగస్టు 30 నుంచి సెప్టెంబర్ 3 వరకు ధర్మగిరిలో ఇవి జరుగుతాయి.

Varuna Yagam Tirumala : ఆంధ్రప్రదేశ్ రాష్ట్రంతో పాటు దేశమంతా సుభిక్షంగా ఉండాలని, సకాలంలో సమృద్ధిగా వర్షాలు కురిసి పంటలు బాగా పండాలని తిరుమల తిరుపతి దేవస్థానం (టీటీడీ) మహత్తర సంకల్పాన్ని చేపట్టింది. ప్రపంచవ్యాప్తంగా ఉన్న ప్రజలందరూ ఆయురారోగ్యాలు, సుఖసంతోషాలతో వర్ధిల్లాలని శ్రీ వేంకటేశ్వరస్వామివారిని ప్రార్థిస్తూ ప్రత్యేక ఆధ్యాత్మిక క్రతువులకు శ్రీకారం చుట్టింది. ఈ మేరకు ఆగస్టు 30 నుంచి సెప్టెంబర్ 3వ తేదీ వరకు తిరుమలలో వరుణయాగ, పర్జన్యశాంతి సహిత కారీరిష్టి యాగాలను వైభవంగా నిర్వహించనున్నట్లు టీటీడీ అధికారులు ప్రకటించారు.

తిరుమలలో కారీరిష్టి, వరుణయాగం

ధర్మగిరి వేద విజ్ఞాన పీఠంలో ఏర్పాట్లు….

తిరుమలలోని ప్రశాంత వాతావరణంలో నెలకొన్న ధర్మగిరి వేద విజ్ఞాన పీఠం వేదికగా ఈ ప్రత్యేక యాగ ప్రక్రియలన్నీ కొనసాగుతాయి. మొత్తం 32 మంది ప్రముఖ వేద, శ్రౌత, స్మార్త పండితులు అత్యంత నిష్ఠతో ఈ యాగ కార్యక్రమాల్లో పాల్గొని మంత్రోచ్ఛారణలు చేస్తారు. ధర్మగిరి వేద విజ్ఞాన పీఠం ప్రిన్సిపాల్ శ్రీ కుప్పా శివ సుబ్రహ్మణ్య అవధాని ప్రత్యక్ష పర్యవేక్షణలో ఈ ఆధ్యాత్మిక క్రతువులకు సంబంధించిన విస్తృత ఏర్పాట్లు వేగంగా జరుగుతున్నాయి.

యాగ కార్యక్రమాలు - టైమింగ్స్ వివరాలు:

ఆగస్టు 30 (ఆదివారం) : యాగ ప్రక్రియలో భాగంగా మొదటి రోజు సాయంత్రం 7.00 గంటల నుంచి రాత్రి 8.00 గంటల వరకు ధర్మగిరి వేద విజ్ఞాన పీఠంలో వైభవంగా అంకురార్పణ, గణపతి పూజ, పుణ్యాహవాచనం, ఋత్విక్ వరణం వంటి ప్రాథమిక ఆధ్యాత్మిక కార్యక్రమాలను నిర్వహిస్తారు.

• ఆగస్టు 31 నుంచి సెప్టెంబర్ 3 వరకు : ఈ నాలుగు రోజుల పాటు ప్రతిరోజూ ఉదయం 9.30 గంటల నుంచి మధ్యాహ్నం 12.30 గంటల వరకు ధర్మగిరిలో వరుణయాగం, కారీరిష్టి, పర్జన్యశాంతి హోమాలు శ్రద్ధాభక్తులతో సాగుతాయి. వీటితో పాటు ఏడు వేదశాఖల పారాయణం, శ్రీమద్రామాయణం, సుందరకాండ, మహాభారతంలోని విరాటపర్వం, వర్షాన్ని కురిపించే శక్తి కలిగిన ఋష్యశృంగ ధ్యాన పారాయణాలను వేద పండితులు జపిస్తారు.
• గోగర్భం డ్యామ్ వద్ద ప్రత్యేక అనుష్ఠానం : యాగ రోజుల్లో ప్రతిరోజూ పవిత్రమైన గోగర్భం డ్యామ్ జలాశయం వద్ద వరుణ, పర్జన్య మంత్ర అనుష్ఠానాలను పండితులు ప్రత్యక్షంగా నిర్వహిస్తారు.
• సాయంత్రం వేళల్లో అగ్నిహోత్రం : ప్రతిరోజు సాయంత్రం 6.00 గంటల నుంచి రాత్రి 8.00 గంటల వరకు ధర్మగిరి ప్రాంగణంలో అగ్నిహోత్ర అనుష్ఠానం మరియు ఏడు వేదశాఖల పారాయణ ఘట్టాలు కొనసాగుతాయి.
• సెప్టెంబర్ 3 (పూర్ణాహుతి) : యాగాల ముగింపు సందర్భంగా సెప్టెంబర్ 3వ తేదీ ఉదయం 11.00 గంటల నుంచి మధ్యాహ్నం 12.00 గంటల వరకు వేద విజ్ఞాన పీఠంలో అత్యంత శాస్త్రోక్తంగా మహా పూర్ణాహుతి కార్యక్రమాన్ని నిర్వహించి, స్వామివారికి నివేదనలు అర్పిస్తారు.

వర్షాలు సమృద్ధిగా కురిసి, జలాశయాలు నిండి, దేశం ధాన్యరాశులతో తులతూగాలని తలపెట్టిన ఈ ప్రత్యేక యాగాల ద్వారా శ్రీవారి అనుగ్రహం ప్రజలందరికీ లభిస్తుందని టీటీడీ పండితులు వెల్లడించారు.