E-Paper
కల్లాపి చల్లే పొడికి ఆత్మహత్యలకు లింకేంటి? కడప జిల్లాలో పోలీసుల సెర్చింగ్
ఇళ్లే ముందు కల్లాపి చల్లే పొడి తయారుచేసే కంపెనీలపై పోలీసులు సీరియస్ సెర్చింగ్ చేస్తున్నారు. దీనికి కారణం ఆత్మహత్యలతో లింక్ ఉండటమే. కడప జిల్లాలో చాలా కొన్ని ఆత్మహత్యలు కల్లాపి పౌడర్తో లింక్ ఉన్నాయి.
కడప పోలీసులు కల్లాపి పొడిని తయారు చేసే పలు కేంద్రాలపై సంయుక్త దాడులు నిర్వహించారు. అమ్మకానికి సిద్ధంగా ఉన్న సరుకును స్వాధీనం చేసుకున్నారు. అనేక ప్రాంతాల్లో తయారుచేస్తున్న కల్లాపి పౌడర్ కంపెనీల మీద ఫోకస్ చేశారు అధికారులు. దీనికి కారణం లేకపోలేదు.
ఇళ్ల ముందు వాకిలిలో చల్లడానికి సాధారణంగా ఆవుపేడ కలిపిన నీటిని ఉపయోగిస్తారు. దానికి చౌకైన ప్రత్యామ్నాయంగా వాడే కల్లాపి పొడిని సేవించడం వల్ల కడప జిల్లాలో ఇటీవల ఆత్మహత్యలు ఆందోళనకరంగా పెరగడమే పోలీసుల ఫోకస్కు ప్రధాన కారణమని సమాచారం. ఆశ్చర్యకరమైన విషయం ఏమిటంటే, ప్రొద్దుటూరులో ఉన్న ఇటువంటి ఐదు కర్మాగారాలు పసుపు, కుంకుమ పొడిని తయారు చేస్తున్నట్లు నటిస్తూ కార్యకలాపాలు సాగిస్తున్నాయని పోలీసులు తెలిపారు.
ఎస్పీ నాచికేత్ విశ్వనాథ్ షెల్కే ఆదేశాల మేరకు ప్రొద్దుటూరు తహసీల్దార్ డి. ఉదయ్ భాస్కర్ రాజు, ఏపీపీసీబీ పర్యావరణ ఇంజనీర్ సుధా కురుబ, డిప్యూటీ చీఫ్ ఇన్స్పెక్టర్ ఆఫ్ ఫ్యాక్టరీస్ (కడప) పి. చిన్నారావు, అసిస్టెంట్ డిస్ట్రిక్ట్ ఫైర్ ఆఫీసర్ (ప్రొద్దుటూరు) పి. బసివి రెడ్డి, విజిలెన్స్ అండ్ ఎన్ఫోర్స్మెంట్ ఇన్స్పెక్టర్ పి. శ్రీనివాస రెడ్డి, వ్యవసాయ అధికారి జి. లక్ష్మణ్ కుమార్లతో కూడిన బృందం ఈ కర్మాగారాలపై దాడులు చేసి వాటిని సీజ్ చేసింది.
పోలీసుల వివరాల ప్రకారం.. 2025 జనవరి 1 నుండి 2026 జూలై 6 మధ్య కడప జిల్లాలో మొత్తం 19 మంది ఈ కల్లాపి పొడిని సేవించి ఆత్మహత్య చేసుకున్నారు. ఈ పొడిలో క్యాన్సర్ కారక గుణాలు కలిగిన ఆరమైన్ ఓ(Auramine O) అనే ప్రమాదకర రసాయనం ఉంది. పొరపాటున దీనిని సేవిస్తే ప్రాణాంతకం అవుతుందని ఎస్పీ నాచికేత్ షెల్కే హెచ్చరించారు.
ఆవుపేడకు ప్రత్యామ్నాయంగా ప్రజలు ఈ ప్రమాదకర రసాయనాన్ని వాడకూడదని ఎస్పీ విజ్ఞప్తి చేశారు. అలాగే ఇటువంటి ఉత్పత్తులను తయారు చేసే కేంద్రాలు ఎక్కడైనా కనిపిస్తే వెంటనే సంబంధిత శాఖకు సమాచారం అందించాలని ప్రజలను కోరారు. ఇటీవలి కాలంలో కొందరు కల్లాపి పొడిని నీటిలో కలుపుకొని తాగి సూసైడ్ చేసుకున్నారు. దీంతో పోలీసులు ఈ విషయంపై ప్రత్యేకంగా దృష్టిపెట్టారు.
