ప్రైమ్ వీడియోలో ట్రెండింగ్లో ఉన్న ఈ థ్రిల్లర్ మూవీ చూశారా.. అదిరిపోయే మర్డర్ మిస్టరీ.. హంతకుడిని పట్టించే టాటూ
అమెజాన్ ప్రైమ్ వీడియో ట్రెండింగ్ మూవీస్లో ఒకటైన థ్రిల్లర్ మూవీ పుణె హైవే. నలుగురు స్నేహితులు, ఒక హత్య చుట్టూ తిరిగే ఈ సినిమాలో ఎన్నో ట్విస్టులు. ముఖ్యంగా క్లైమ్యాక్స్ ట్విస్ట్ ఆశ్చర్యపరుస్తుంది.
ప్రైమ్ వీడియోలోకి ఈ మధ్యే వచ్చిన థ్రిల్లర్ మూవీ పుణె హైవే (Pune Highway). ఈ ఏడాది మే 23న థియేటర్లలో రిలీజైన ఈ సినిమా.. జులై 4 నుంచి ఓటీటీలో స్ట్రీమింగ్ అవుతోంది. బాక్సాఫీస్ దగ్గర పెద్దగా సక్సెస్ సాధించకపోయినా.. ఇప్పుడు ప్రైమ్ వీడియోలో మాత్రం టాప్ ట్రెండింగ్ సినిమాల్లో ఒకటిగా దూసుకెళ్తోంది. మరి ఈ పుణె హైవే ఎందో చూడండి.
పుణె హైవే స్టోరీ ఏంటంటే?
పుణె హైవే ఓ మర్డర్ మిస్టరీ థ్రిల్లర్. ఈ మూవీ నలుగురు స్నేహితులు ప్రమోద్ (అమిత్ సాధ్), నటాషా (మంజరి ఫడ్నిస్), విష్ణు (జిమ్ సర్బ్), నికొలస్ థామస్ (అనువబ్ పాల్) చుట్టూ తిరుగుతుంది. వీళ్లలో ప్రమోద్ ఓ ప్రముఖ పొలిటీషియన్ మధుసూదన్ మన్సేఖర్ (శిశిర్ శర్మ)కు ఆప్తుడిగా ఉంటాడు. విష్ణు ఓ లాయర్ కాగా.. నికొలస్ సినిమా తీయాలనే పట్టుదలతో ఉంటాడు.
ఇక మన్సేఖర్ కూతురు అయిన మోనా మన్సేఖర్ (కేతకి నారాయణ్) హత్యకు గురవుతుంది. సినిమా మొదట్లోనే ఓ ముంబైకి 142 కి.మీ. దూరంలోని ఓ చెరువులో కుళ్లిపోయిన దశలో ఆమె మృతదేహం కనిపిస్తుంది. ఆ హత్య ఎవరు చేశారో తేల్చడానికి సీఐ ప్రభాకర్ పేటె (సుదీప్ మోదక్) రంగంలోకి దిగుతాడు.
మొదట అసలు ఆ మృతదేహం ఎవరిదో కనిపెట్టి ఆ తర్వాత దర్యాప్తు చేసే క్రమంలో అతనికి ఎంతో మంది అనుమానితులు కనిపిస్తారు. ఇలాంటి పరిస్థితుల్లో ఓ చిన్న టాటూ హంతకుడిని ఎలా పట్టిస్తుంది? ఈ హత్య ఆ నలుగురి స్నేహితుల జీవితాలను ఎలా మార్చేస్తుంది? అసలు హత్య ఎవరు, ఎందుకు చేశారన్నదే ఈ పుణె హైవే మూవీ స్టోరీ.
పుణె హైవే మూవీ రివ్యూ
పుణె హైవే ఓ మర్డర్ మిస్టరీ థ్రిల్లర్. ఈ సినిమాను బగ్స్ భార్గవ కృష్ణ, రాహుల్ ద కన్హ డైరెక్ట్ చేశారు. జులై 4న ప్రైమ్ వీడియోలోకి వచ్చిన ఈ సినిమా ప్రస్తుతం ట్రెండింగ్ మూవీస్ లో 4వ స్థానంలో ఉంది. మర్డర్ ఇన్వెస్టిగేషన్ పై ఇప్పటికే ఎన్నో సినిమాలు, వెబ్ సిరీస్ వచ్చాయి. ఆ సినిమాలు, సిరీస్ దారిలోనే ఈ పుణె హైవే సాగుతుంది.
ఎక్కడో జరిగిన ఓ హత్య నలుగురు స్నేహితుల జీవితాలను ఎలా మార్చేసిందన్న కథాంశంతో ఆసక్తికరంగా తెరకెక్కించే ప్రయత్నం చేశారు. సస్పెన్స్ ను చివరి వరకూ కొనసాగించాలన్న ఉద్దేశంతో అన్ని మర్డర్ మిస్టరీల్లాగే ఇందులోనూ మొదట్లో అనుమానితులను తెరపైకి తీసుకురావడం, వాళ్ల పాత్ర ఏమీ లేదని గుర్తించడం.. ఇలా సాగిపోతుంది.
స్టోరీ కాలంలో వెనక్కి, ముందుకు వెళ్తూ కొన్నిసార్లు అయోమయానికి గురి చేస్తుంది. అయితే చివరి వరకూ హంతకుడు ఎవరన్న ఆసక్తిని మాత్రం రేకెత్తిస్తూనే ఉంటుంది. ఓ చిన్న టాటూ ఆ హంతకుడిని ఎలా పట్టించిందన్న ట్విస్ట్ క్లైమ్యాక్స్ లో ఆశ్చర్యపరుస్తుంది. థ్రిల్లర్ మూవీస్ ఇష్టపడే వాళ్లు ఓసారి ఈ పుణె హైవే చూడొచ్చు. అయితే కేవలం హిందీ ఆడియో, ఇంగ్లిష్ సబ్ టైటిల్స్ తోనే మూవీ ప్రైమ్ వీడియోలో అందుబాటులో ఉంది.
