బిగ్ బాస్ 9 తెలుగు: నువ్వూ నీ ఓవరాక్షన్-లవ్ కంటెంట్ కోసమే వచ్చావ్-రీతుకు ఇచ్చిపడేసిన అయేషా-ఈ వారం నామినేషన్లలో 8 మంది

బిగ్ బాస్ 9 తెలుగు ఏడో వారానికి చేరుకుంది. గత వారం హౌస్ నుంచి అనూహ్యంగా భరణి ఎలిమినేట్ అయ్యాడు. ఈ వారం నామినేషన్లలో 8 మంది కంటెస్టెంట్లు ఉన్నారు. నామినేషన్ ప్రక్రియ సందర్భంగా రీతు చౌదరీకి అయేషా గట్టిగా ఇచ్చిపడేసింది.

బిగ్ బాస్ 9 తెలుగు పోరు ఏడో వారానికి చేరుకుంది. ఆరో వారం హౌస్ నుంచి సీనియర్ నటుడు భరణి అనూహ్యంగా ఎలిమినేట్ అయ్యాడు. ఇప్పుడు ఏడో వారం నామినేషన్ ప్రక్రియ మొదలైంది. ఈ వారం హౌస్ నుంచి ఎలిమినేట్ అవ్వడానికి 8 మంది కంటెస్టెంట్లు నామినేట్ అయ్యారు. ఈ నామినేషన్లలో రీతు, అయేషా మధ్య పెద్ద గొడవే జరిగింది.

బిగ్ బాస్ 9 తెలుగు నామినేషన్లలో అయేషా, రీతు (youtube/screengrab)

బిగ్ బాస్ 9 తెలుగు నామినేషన్స్

బిగ్ బాస్ 9 తెలుగు ఏడో వారం నామినేషన్లలో 8 మంది ఉన్నారు. రీతు, శ్రీనివాస్, రాము, తనూజ, దివ్య, రమ్య, కల్యాణ్, సంజన నామినేట్ అయ్యారు. వీళ్లలో ఒకరు ఈ వారం హౌస్ నుంచి వెళ్లిపోనున్నారు. ఈ వారం బిగ్ బాస్ నామినేషన్ ప్రక్రియ రసవత్తరంగా సాగినట్లు తెలిసింది.

టాస్క్ లు పెట్టి

బిగ్ బాస్ హౌస్ లో ఏదీ ఊరికే రాదంటూ ఏడో వారం నామినేషన్ చేయడం కోసం హౌస్ మేట్స్ కు టాస్క్ లు పెడతాడు బిగ్ బాస్. ముందుగా ఇమ్మాన్యుయేల్, అయేషా బెలూన్ టాస్క్ ఆడతారు. ఇందులో వారికి నామినేషన్ పవర్ టికెట్స్ దొరుకుతాయి. ఆ తర్వాత అయేషా నేరుగా రీతు చౌదరీని నామినేట్ చేస్తుంది. ముఖానికి ఫోమ్ రాసి నామినేట్ చేస్తుంది. అయేషా తన పాయింట్ చెప్పబోతుంటే ఆగు ఫోమ్ తీసి మాట్లాడతానని రీతు అంటుంది.

లవ్ కంటెంట్ కోసం

రీతుపై అయేషా రెచ్చిపోతుంది. ‘‘నువ్వు, నీ ఓవర్ యాక్షన్ ఈ ఇంట్లో నాకు అసలు నచ్చలేదు. నువ్వు వచ్చిందే లవ్ కంటెంట్ కోసం’’ అని తీవ్ర వ్యాఖ్యలు చేస్తుంది అయేషా. ‘‘నేను చెప్పానా లవ్ చేస్తున్నాను, లవ్ చేసుకుని తిరుగుతున్నాను’’ అని రీతు కౌంటర్ ఇస్తుంది. ‘‘ఎందుకంత యాటిబ్యూడే నీకు, నీ యారగన్సీ, గేమ్ స్ట్రాటజీ నాకు నచ్చలేదు’’ అని అయేషా ఇచ్చిపడేస్తుంది.

రివర్స్ లో

రివర్స్ లో రీతు కూడా అయేషాను నామినేట్ చేస్తుంది. అయేషాను దివ్య కూడా నామినేట్ చేస్తుంది. రమ్య, సంజనను తనూజ.. కల్యాణ్ ను శ్రీనివాస్.. శ్రీనివాస్, సంజనను కల్యాణ్.. తనూజ, దివ్యను సంజన నామినేట్ చేస్తారు. నామినేషన్లలోకి రీతు, శ్రీనివాస్, రాము, తనూజ, దివ్య, రమ్య, కల్యాణ్, సంజన, అయేషా వస్తారు. అయితే బిగ్ బాస్ కెప్టెన్ గౌరవ్ కు పవర్ ఇచ్చి ఒకరిని సేవ్ చేయమంటాడు. అతను అయేషాను సేవ్ చేస్తాడు. దీంతో చివరకు 8 మంది నామినేషన్లలో ఉంటారు.