E-Paper
Brahmamudi April 29th Episode: బ్రహ్మముడి.. రాజుకు సాహు 24 గంటల డెడ్లైన్.. కేక్ కట్ చేసి మరీ వార్నింగ్.. ఇందుని చూసి..
Brahmamudi April 29th Episode: బ్రహ్మముడి సీరియల్ ఏప్రిల్ 29 ఎపిసోడ్ లో రాజుకు 24 గంటల గండం ముంచుకొస్తుంది. సాహు ఇంటికి వచ్చి మరీ వార్నింగ్ ఇస్తాడు. దీంతో ఇందు విషయంలో ఏం చేయాలో తెలియని పరిస్థితిలో రాజు పడిపోతాడు.
Brahmamudi April 29th Episode: బ్రహ్మముడి సీరియల్ ఈరోజు ఎపిసోడ్ లో చలపతి, లక్ష్మి 25వ పెళ్లి రోజును అందరూ కలిసి గ్రాండ్ గా సెలబ్రేట్ చేస్తారు. అయితే సాహు రూపంలో రాజుకు మరోసారి గండం ముంచుకొస్తుంది. ఇప్పుడిప్పుడే దగ్గరవుతున్న ఇందుని చూసి రాజు బాధపడుతుంటాడు.
చికెన్ కోసం అలిగిన లక్కీ
బ్రహ్మముడి సీరియల్ బుధవారం (ఏప్రిల్ 29) ఎపిసోడ్ చికెన్ కోసం లక్కీ అలిగే సీన్ తో మొదలవుతుంది. వచ్చిన వాళ్లకే చికెన్ సరిపోదని, నీకు లేదని ఇందు అంటుంది. దీంతో తాను వెళ్లిపోతానని లక్కీ అంటాడు. ఎవరూ వద్దని అనకపోవడంతో తనకు తానుగా ఉండిపోతాడు. నువ్వు వెళ్లవని తెలుసు లేరా అని రాజు అనడంతో ఇందు, నందు నవ్వుతారు.
దండలు మార్చుకున్న చలపతి, లక్ష్మి
ఆ తర్వాత వెంకీ దండలు తీసుకొస్తాడు. ఇందు వాటిని ఇచ్చి మార్చుకోమని చలపతి, లక్ష్మికి చెబుతుంది. ఇద్దరూ దండలు మార్చుకుంటారు. అందరూ అక్షింతలు వేస్తారు. ఆ తర్వాత తమ 25 ఏళ్ల దాంపత్య జీవితం గురించి మాట్లాడమని వాళ్లను ఇందు కోరుతుంది.
ఎమోషనల్ అయిన చలపతి, లక్ష్మి
అప్పుడు చలపతి ఎమోషనల్ అవుతాడు. తాను ఎంతో గొప్పవాడిని కావాలని కలలు కన్నానని, తన భార్య కూడా అదే అనుకుందని, అయితే పిల్లలు పుట్టిన తర్వాత వాళ్లే తమ లోకమయ్యారని అంటాడు. వాళ్లకు ఏ కష్టం రాకుండా పెంచాలనే తాము అనుకున్నామని, అందుకే ఇలా మిగిలిపోయామని చెబుతాడు.
అటు లక్ష్మి కూడా చలపతి గురించి గొప్పగా చెబుతుంది. నాన్న ఎప్పుడూ కఠినంగా ఉంటారని పిల్లలు అనుకుంటారు కానీ.. అది వాళ్లు ఎక్కడ తప్పటడుగులు వేస్తారో అన్న భయం మాత్రమే అని, ఆయన వల్లే తాము ఈ రోజు ఈ స్థితిలో ఉన్నామని అంటుంది.
రాజు గురించి గొప్పగా చెప్పిన చలపతి
ఆ తర్వాత రాజు గురించి చలపతి గొప్పగా చెబుతాడు. పిల్లలిద్దరినీ ప్రైవేట్ స్కూల్లో చదివించాలని అనుకునేవాడినని, కానీ స్థోమత లేకపోవడంతో నా పెద్ద కొడుకు రాజు తాను గవర్నమెంట్ స్కూలుకు వెళ్లి, తమ్ముడిని ప్రైవేట్ స్కూలుకు పంపేలా చేశాడని అంటాడు. ఎప్పుడూ తిట్టే నాన్న తన గురించి అలా మాట్లాడటంతో రాజు సంతోషంతో ఉప్పొంగిపోతాడు. చూశావా మా నాన్న ఎలా పొగుడుతున్నాడో అని ఇందుతో అంటాడు.
అమ్మానాన్నను తలచుకొని బాధపడిన ఇందు, నందు
రాజు, వెంకీలను చలపతి, లక్ష్మీ ప్రేమగా చూసుకోవడం చూసి ఇందు, నందు బాధపడతారు. తన అమ్మానాన్న ఉండి ఉంటే ఇలాగే చేసి ఉండేదాన్నని ఇందు అంటుంది. తాను కూడా అని నందు అనుకుంటుంది. వాళ్లు లేరా అని అడుగుతుంది. వాళ్లు చనిపోయారని ఇందు చెబుతుంది. నందు కూడా తనకూ తల్లిదండ్రులు లేరని అంటుంది. ఇద్దరూ ఒకరినొకరు ఓదార్చుకుంటారు.
ఇందు ఇంటి కోడలు కావాలని ఆశపడ్డ చలపతి
ఆ తర్వాత అందరికీ భోజనాలు వడ్డిస్తారు. ఇందు, నందు, రాజు, లక్కీ కలిసి భోజనాలు పెడతారు. వంటన్నీ అదిరిపోయానని వాళ్లు అంటారు. అవి చేసింది ఈ అమ్మాయే అని ఇందుని చూపిస్తాడు చలపతి. ఆమె మీ ఇంటికి కాబోయే కోడలా? ఇంకా ఆలోచించాల్సిన అవసరం లేదు రాజుకి ఇచ్చి పెళ్లి చేయండని అనడంతో రాజు, ఇందు షాక్ తింటారు. చలపతి, లక్ష్మీ ఏమో తాము కూడా అదే కోరుకుంటున్నట్లు చెబుతారు.
చదివింపులకు ఆశపడిన రాజు, లక్కీ
అటు చికెన్ కోసం అయిన డబ్బులను చదివింపుల రూపంలో తీసుకోవాలని రాజు, లక్కీ ప్లాన్ చేస్తారు. భోజనాలు అయిపోగానే ఓ కౌంటర్ ఏర్పాటు చేస్తారు. వచ్చిన అతిథుల నుంచి చదివింపులు వసూలు చేయడానికి ప్రయత్నిస్తే.. ఇందు వాళ్లకు క్లాస్ పీకి అడ్డుకుంటుంది.
ఆ తర్వాత సాహు తన మనషులతో కలిసి రాజు ఇంటికి వస్తాడు. చలపతి, లక్ష్మీ పెళ్లి రోజును కేక్ కట్ చేసి సెలబ్రేట్ చేస్తాడు. తర్వాత రాజుకు 24 గంటల టైమ్ ఇస్తాడు. డబ్బు ఇవ్వకపోతే మీ వాళ్లు మిగలరు అని వార్నింగ్ ఇస్తాడు. దీంతో ఏం చేయాలో తెలియక రాజు ఎంతో బాధతో ఇందు వైపు చూస్తాడు. అక్కడితో బ్రహ్మముడి సీరియల్ ఈరోజు ఎపిసోడ్ ముగుస్తుంది.
