E-Paper
Chiranjeevi: చిరంజీవి కామెంట్స్ దుమారం.. 'అవార్డుకు ఎన్నో దారులు' అర్థమేంటి? సోషల్ మీడియాలో విమర్శలు
Chiranjeevi: మెగాస్టార్ చిరంజీవి ఇప్పుడో వింత వివాదంలో చిక్కుకున్నారు. పెద్ది మెగా బ్లాక్బస్టర్ ఈవెంట్ కు ముఖ్య అతిథిగా హాజరై అవార్డు తెచ్చుకోవడానికి ఎన్నో దారులు ఉంటాయని ఆయన చేసిన కామెంట్స్ దుమారం రేపుతున్నాయి.
Chiranjeevi: గ్లోబల్ స్టార్ రామ్ చరణ్ లేటెస్ట్ రూరల్ స్పోర్ట్స్ డ్రామా 'పెద్ది' (Peddi) బాక్సాఫీస్ దగ్గర రూ.400 కోట్లకు పైగా గ్రాస్ కలెక్షన్స్ సాధించి సూపర్ హిట్ టాక్తో దూసుకుపోతోంది. ఈ సందర్భంగా హైదరాబాద్లోని శిల్పకళా వేదికలో గ్రాండ్గా నిర్వహించిన సక్సెస్ మీట్లో మెగాస్టార్ చిరంజీవి చేసిన స్పీచ్ ఇప్పుడు ఫిల్మ్ ఇండస్ట్రీతో పాటు సోషల్ మీడియాలో ఒక రేంజ్ హల్చల్ సృష్టిస్తోంది.
ఈ పెద్ది సినిమాలో రామ్ చరణ్ పెర్ఫార్మెన్స్ చూసి చాలామంది నేషనల్ అవార్డు గ్యారెంటీ అని కామెంట్స్ చేస్తుండటంపై చిరు స్పందించిన తీరు తీవ్ర చర్చకు దారితీసింది.
అవార్డు రావడానికి ఎన్నో దారులు ఉంటాయి..
ఒక తండ్రిగా రామ్ చరణ్ పడ్డ కష్టం, బాడీ ట్రాన్స్ఫార్మేషన్ చూసి ఎంతో గర్వపడుతున్నానని చిరంజీవి ఎమోషనల్ అయ్యారు. 'రంగస్థలం', 'ఆర్ఆర్ఆర్' సినిమాల తర్వాత చరణ్ కెరీర్లోనే ఇదొక బెస్ట్ మైల్స్టోన్ మూవీ అని కొనియాడారు.
నేషనల్ అవార్డు గురించి మాట్లాడుతున్నప్పుడు చిరంజీవి నోటి నుంచి వచ్చిన ఒక మాట ఇప్పుడు ఇండస్ట్రీ వర్గాల్లో హాట్ టాపిక్గా మారింది.
"పెద్ది సినిమాలో నటనకుగాను చరణ్కి నేషనల్ అవార్డు వస్తుందని అంటున్నారు. నిజానికి రంగస్థలం మూవీకే ఆ అవార్డు రావాలని నేను, సుకుమార్ అనుకున్నాం. ఇప్పుడూ అవార్డు రావచ్చు. రాకపోవచ్చు. అవార్డు రావడానికి ఎన్నో దారులు ఉంటాయి. కానీ జనాల నుంచి వచ్చే ప్రేమాభిమానాలే ఒక నటుడికి దక్కే అతిపెద్ద అవార్డు" అని చిరంజీవి వ్యాఖ్యానించారు.
చిరు అన్న ఈ ఒక్క మాట "అవార్డు రావడానికి ఎన్నో దారులు ఉంటాయి" అనేది సోషల్ మీడియాలో ఒక పెద్ద డిబేట్కు తెరలేపింది. అవార్డుల వెనుక లాబీయింగ్, మనీ పవర్ లాంటి వేరే మార్గాలు ఉంటాయనే ఉద్దేశంతోనే మెగాస్టార్ ఇలా అన్నారా అనే వైపుగా విశ్లేషణలు మొదలయ్యాయి.
అల్లు అర్జున్ను టార్గెట్ చేశారా? నెటిజన్ల మధ్య ఫ్యాన్ వార్
చిరంజీవి చేసిన ఈ కామెంట్స్ పరోక్షంగా ఐకాన్ స్టార్ అల్లు అర్జున్ను ఉద్దేశించి చేసినవే అంటూ నెటిజన్లు రకరకాల థియరీలను స్క్రీన్ పైకి తెస్తున్నారు. 'పుష్ప' సినిమాకు గానూ అల్లు అర్జున్కు బెస్ట్ యాక్టర్ నేషనల్ అవార్డు వచ్చిన సంగతి తెలిసిందే.
చరణ్కు రాని అవార్డు బన్నీకి రావడంపై మెగా ఫ్యామిలీలో లోపల ఏదో అసంతృప్తి ఉందనే రూమర్స్ గతంలోనే వచ్చాయి. ఇప్పుడు చిరు ఈ రకమైన కామెంట్స్ చేయడంతో, అల్లు అర్జున్ లాబీయింగ్ చేసి అవార్డు తెచ్చుకున్నాడనే అర్థం వచ్చేలా మాట్లాడారంటూ కొందరు సోషల్ మీడియాలో పోస్టులు పెడుతున్నారు.
నిజానికి చిరంజీవి మనసులో ఆ ఉద్దేశం ఉందో లేదో ఎవరికీ తెలియదు. మన దేశంలో అవార్డుల ఎంపికలో లాబీయింగ్, రికమండేషన్స్ చాలా కామన్గా జరుగుతుంటాయనే నమ్మకం అందరిలోనూ ఉంది. చిరు కేవలం క్యాజువల్గా ఆ మాట అని ఉండొచ్చు. కానీ మెగా వర్సెస్ అల్లు ఫ్యాన్స్ మధ్య ఆల్రెడీ నడుస్తున్న కోల్డ్ వార్ కారణంగా, ఈ చిన్న కామెంట్ కాస్తా ఇప్పుడు పెద్ద సెన్సేషన్గా మారి టాలీవుడ్ వర్గాల్లో హీట్ పెంచుతోంది.
