ఈ మాటకు నన్ను పచ్చిబూతులు తిడతారు.. ఆ మలయాళం సినిమాను నేనే తెలుగులో రిలీజ్ చేశా.. తెలుగులో తీస్తే తిట్టేవాళ్లు: నాగవంశీ
మలయాళ బ్లాక్బస్టర్ మూవీ లోకా: ఛాప్టర్ 1 చంద్రపై ప్రొడ్యూసర్ నాగ వంశీ ఇంట్రెస్టింగ్ కామెంట్స్ చేశాడు. ఆ సినిమాను నేరుగా తెలుగులో తీసి ఉంటే అది బాలేదు, ఇది బాలేదు అని ఏదేదో అనేవాళ్లని అతడు అన్నాడు.
టాలీవుడ్ నిర్మాత నాగవంశీ, నటుడు రవితేజ కలిసి తమ రాబోయే మూవీ మాస్ జాతర ప్రమోషనల్ వీడియోను రిలీజ్ చేసిన విషయం తెలుసు కదా. ఈ సందర్భంగా వాళ్లు మలయాళ సూపర్ హీరో మూవీ లోకా: ఛాప్టర్ 1 – చంద్ర విజయం గురించి మాట్లాడారు. ఆ సినిమా నేరుగా తెలుగులో వచ్చి ఉంటే అంత విజయం సాధించేది కాదని షాకింగ్ కామెంట్స్ చేశారు.
పచ్చి బూతులు తిడతారు
నాగ వంశీ ప్రొడ్యూస్ చేసిన మాస్ జాతర మూవీ అక్టోబర్ 31న థియేటర్లలో విడుదల కానుంది. ఈ మూవీ ప్రమోషన్లలో వాళ్లు బిజీగా ఉన్నారు. ఇప్పటికే ఇందులో వార్ 2 మూవీ గురించి నాగ వంశీ చేసిన కామెంట్స్ వైరల్ కాగా.. మలయాళ బ్లాక్బస్టర్ లోకా గురించి కూడా అతడు ఇంట్రెస్టింగ్ కామెంట్స్ చేశాడు.
తెలుగు ఇండస్ట్రీలో మలయాళం లేదా తమిళ సినిమాల మాదిరిగా కంటెంట్ డ్రివెన్ మూవీస్ రావడం లేదనే అభిప్రాయంపై నాగవంశీని ఇంటర్వ్యూలో ప్రశ్నించారు. దానికి అతడు బదులిస్తూ.. "నేను మీకు ఒక విషయం చెప్పాలి. ఈ మాట చెబితే నన్ను బండ బూతులు తిడతారు. నేనే లోకా సినిమాను తెలుగులో విడుదల చేశాను. కానీ ఒకవేళ లోకా నేరుగా తెలుగులో వచ్చినట్టైతే, ప్రేక్షకులు దాని గురించి ఏదేదో అనేవారు. అది నాసిరకం సినిమా, క్వాలిటీ లేదు అని చెబుతుండేవారు. అలా జరగకపోతే నేను నా పేరు మార్చుకుంటాను" అని నాగవంశీ సవాల్ విసిరాడు.
లిటిల్ హార్ట్స్పై ఇలా..
తెలుగు ప్రేక్షకులు దేన్ని ఇష్టపడతారో అంచనా వేయడం కష్టంగా మారిందని ఈ నిర్మాత అన్నాడు. మౌళి నటించిన లిటిల్ హార్ట్స్ సినిమాను ఉదాహరణగా చూపించాడు. "తెలుగు ప్రేక్షకులు ఎలా తయారయ్యారంటే, మనం ఎప్పుడూ ఒక అంచున ఉన్నట్లు అనిపిస్తుంది. లిటిల్ హార్ట్స్ సినిమా చూడండి, దానిలో నటీనటులు, క్రూ ఎవరికీ తెలియదు. కానీ ప్రీమియర్లకు మంచి బుకింగ్స్ వచ్చాయి. ఇప్పుడు వారు ఏం చూడాలనుకుంటున్నారో ఎవరూ అంచనా వేయలేరు" అని నాగవంశీ అభిప్రాయపడ్డాడు.
నాగవంశీ అభిప్రాయంతో రవితేజ కూడా ఏకీభవించాడు. లోకా నేరుగా తెలుగు సినిమాగా వచ్చి ఉంటే నిలబడేదే కాదని అతడు అన్నాడు. "ఎవరూ చూసేవారు కాదు. అతను 100 శాతం కరెక్ట్. ఏం వర్కౌట్ అవుతుందో మనకు తెలియదు" అని రవితేజ వివరించాడు.
లోకా సినిమా గురించి..
ఈ సినిమా కొత్త లోక పేరుతో తెలుగులో రిలీజైంది. ఈ మూవీ ప్రపంచవ్యాప్తంగా రూ.300 కోట్లు వసూలు చేసిన మొదటి మలయాళ చిత్రంగా నిలిచింది. తెలుగులోనూ మంచి రెస్పాన్స్ వచ్చింది. ఇండియాలో లోకా మూవీకి రూ.156 కోట్ల నెట్ వసూళ్లు రాగా.. అందులో రూ.122.06 కోట్లు మలయాళ వెర్షన్ నుంచి, రూ.16.51 కోట్లు తమిళం నుంచి, రూ.13.76 కోట్లు తెలుగు నుంచి, రూ.3.75 కోట్లు హిందీ నుంచి వచ్చాయి.
డొమినిక్ అరుణ్ దర్శకత్వం వహించిన, దుల్కర్ సల్మాన్ నిర్మించిన ఈ మూవీ ఒక సినిమాటిక్ యూనివర్స్లో మొదటిది. కళ్యాణి ప్రియదర్శన్ ఈ సినిమాలో ఓ సూపర్ హీరో పాత్ర పోషించింది. టోవినో థామస్ అతిథి పాత్రలో కనిపించాడు.
