ఇప్పుడు చిరంజీవి, తర్వాత బాలకృష్ణ.. నాలుగోసారి బాలయ్యతో జత కట్టనున్న నయనతార.. డైరెక్టర్ అతడే..

నయనతార తెలుగులో వరుసగా పెద్ద సినిమాల ఆఫర్లను సంపాదించేస్తోంది. ప్రస్తుతం చిరంజీవితో కలిసి మన శంకర వరప్రసాద్ గారు మూవీ చేస్తున్న ఆమె.. ఆ తర్వాత బాలకృష్ణతో కలిసి నాలుగోసారి జత కట్టనున్నట్లు వార్తలు వస్తున్నాయి.

నయనతార సినిమా ఇండస్ట్రీలోకి వచ్చి రెండు దశాబ్దాలకుపైనే అయింది. అటు తమిళంతోపాటు తెలుగులోనూ ఎన్నో హిట్స్ అందుకొని లేడీ సూపర్ స్టార్ గా ఎదిగింది. ఇప్పుడు చాలా రోజుల తర్వాత చిరంజీవితో కలిసి మన శంకర వరప్రసాద్ గారులో నటిస్తున్న ఆమె.. ఆ వెంటనే మరో తెలుగు మూవీ చేయబోతోంది. అది కూడా బాలకృష్ణతో కావడం విశేషం.

ఇప్పుడు చిరంజీవి, తర్వాత బాలకృష్ణ.. నాలుగోసారి బాలయ్యతో జత కట్టనున్న నయనతార.. డైరెక్టర్ అతడే..

నాలుగోసారి బాలయ్యతో..

బాలకృష్ణ, గోపీచంద్ మలినేని కాంబినేషన్ లో రాబోతున్న ఓ పీరియడ్ యాక్షన్ మూవీలో నయనతార నటించబోతున్నట్లు వార్తలు వస్తున్నాయి. అదే జరిగితే బాలయ్యతో ఆమె జత కట్టడం ఇది నాలుగోసారి అవుతుంది. ఇప్పటికే అతనితో కలిసి సింహా, శ్రీరామ రాజ్యం, జై సింహా సినిమాలను ఆమె చేసింది.

ఇవన్నీ బాక్సాఫీస్ దగ్గర మంచి హిట్ కొట్టాయి. ఇక ఇప్పుడు మరో సినిమా చేస్తుందన్న వార్తలు ఆసక్తి రేపుతున్నాయి. 2023లో బాలయ్యతో వీర సింహారెడ్డి మూవీ తీసి హిట్ కొట్టిన గోపీచంద్ మలినేని.. ఇప్పుడు రెండోసారి చేతులు కలపబోతున్నాడు. అటు నయనతారకు ఈ డైరెక్టర్ తో ఇదే తొలి సినిమా కానుంది.

ఇప్పటికే గోపీచంద్.. చిరంజీవి మూవీ సెట్ లో నయనతారను కలిసి కథ వినిపించినట్లు సమాచారం. ఈ స్టోరీ, తన పాత్ర బాగా నచ్చడంతో నయన్ వెంటనే మూవీకి అంగీకరించినట్లు వార్తలు వస్తున్నాయి. ప్రస్తుతం రెమ్యునరేషన్ పై చర్చలు జరుగుతున్నాయి. అటు గోపీచంద్ చివరిగా సన్నీ డియోల్ తో కలిసి జాట్ మూవీ చేసిన విషయం తెలిసిందే. అతనికి ఇదే తొలి హిందీ మూవీ.

నయనతార జోరు

నయనతార 2006లో లక్ష్మీ మూవీతో నేరుగా టాలీవుడ్ లోకి అడుగుపెట్టింది. అప్పటికే ఆమె చంద్రముఖి, గజినీలాంటి సినిమాలతో తెలుగు ప్రేక్షకులకు పరిచయమైంది. చివరికి 2022లో చిరంజీవితోనే తెలుగులో గాడ్ ఫాదర్ మూవీ చేసిన ఆమె.. మూడేళ్ల తర్వాత మళ్లీ చిరుతోనే మన శంకర వరప్రసాద్ గారు చేస్తోంది. ఈ సినిమా షూటింగ్ శరవేగంగా జరుగుతోంది.

సంక్రాంతి సందర్భంగా జనవరి 12న రిలీజ్ కానుంది. ఇదే కాకుండా తమిళంలో 4, కన్నడ, మలయాళంలలో ఒక్కో మూవీ చేస్తోంది. పెళ్లి తర్వాత కూడా నయనతార డిమాండ్ ఏమాత్రం తగ్గకపోగా.. ఈ మధ్యకాలంలో మరింత పెరిగింది. ఇప్పుడు బాలకృష్ణతో మరో సినిమా నిజంగా ఆసక్తి రేపుతోంది.