E-Paper
నెట్ఫ్లిక్స్లోకి నేరుగా వస్తున్న మిస్టరీ థ్రిల్లర్ మూవీ.. స్ట్రీమింగ్ తేదీ ఇదే.. భయపెడుతున్న ఫస్ట్ లుక్ పోస్టర్
నెట్ఫ్లిక్స్ లోకి నేరుగా మరో సూపర్ నేచురల్ మిస్టర్ థ్రిల్లర్ మూవీ స్ట్రీమింగ్ కు వస్తోంది. శుక్రవారం (అక్టోబర్ 17) ఈ కొత్త సినిమా స్ట్రీమింగ్ గురించి ఆ ఓటీటీ అనౌన్స్ చేసింది. మరి ఆ మూవీకి సంబంధించిన మరిన్ని వివరాలు తెలుసుకోండి.
నెట్ఫ్లిక్స్ వరుస పెట్టి ఒరిజినల్ మూవీస్, వెబ్ సిరీస్ అనౌన్స్ చేస్తోంది. ఈ మధ్యే రెండు తెలుగు, నాలుగు తమిళ మూవీస్, వెబ్ సిరీస్ గురించి చెప్పిన విషయం తెలుసు కదా. తాజాగా బారాముల్లా పేరుతో ఓ హిందీ సూపర్ నేచురల్ థ్రిల్లర్ మూవీని తీసుకొస్తోంది. ఈ సినిమా స్ట్రీమింగ్ తేదీని అనౌన్స్ చేసింది.
బారాముల్లా ఓటీటీ రిలీజ్ డేట్
నటుడు మానవ్ కౌల్ తన తదుపరి మూవీ 'బారాముల్లా'ను అనౌన్స్ చేశాడు. ఇది ఓ సూపర్ నేచురల్ మిస్టరీ థ్రిల్లర్ మూవీ. నేరుగా ఓటీటీలోనే రిలీజ్ కానుంది. ఈ మూవీ ఫస్ట్ లుక్ పోస్టర్ చూస్తే ఒళ్లు జలదరించడం ఖాయం. ఈ సినిమా నవంబర్ 7న నెట్ఫ్లిక్స్లో విడుదల కానుంది.
'బారాముల్లా' పోస్టర్లో అత్యంత స్పష్టంగా కనిపించే అంశం.. ఎన్నో ఆత్మలను తనలో బంధించుకున్న ఒక కన్ను. ఈ పోస్టర్ చూస్తుంటే, సహాయం కోసం అవి ఆర్తనాదం చేస్తున్నట్లుగా అనిపిస్తోంది. ఈ మొత్తం మిస్టరీని ఛేదించేందుకు ప్రయత్నించే ఒక వ్యక్తి.. డీఎస్పీ రిద్వాన్ సయ్యద్ (మానవ్ కౌల్) మాత్రమే పోస్టర్లో ఉన్నాడు. అతడు కశ్మీర్కు కొత్తగా బదిలీ అయిన పోలీస్ ఆఫీసర్. అతని ముందు ఉన్న ఏకైక ఆధారం మంచు పర్వతాలలో ఉన్న ఒక పాడుబడిన భవనం. అంతేకాకుండా తీవ్రమైన అనారోగ్యంతో బాధపడుతున్న ఒక మనిషి కూడా ఈ కేసుతో ముడిపడి ఉన్నట్లు తెలుస్తోంది.
'బారాముల్లా' విశేషాలు
కథలు, పురాణాలు, వాస్తవాలతో ముడిపడే 'బారాముల్లా' అనే నగరం పేరునే ఈ సినిమాకు పెట్టారు. ఒక చిన్న పిల్లాడు అదృశ్యమవడంతో ఈ చిత్ర కథ మొదలవుతుంది. ఈ అతీంద్రియ మిస్టరీ సినిమాకు ఆదిత్య జంభాలే దర్శకత్వం వహించాడు. ఉరి సినిమాతో ప్రఖ్యాతి గాంచిన ఆదిత్య ధర్ ఈ సినిమాకు నిర్మాతగా వ్యవహరిస్తున్నాడు.
గతంలో యామీ గౌతమ్, ప్రతీక్ గాంధీ కలిసి నటించిన 'ధూమ్ ధామ్' సినిమాకు కూడా ఈ దర్శక-నిర్మాత ద్వయం కలిసి పనిచేశారు. అంతేకాకుండా నటీనటులు, ఇతర సాంకేతిక వివరాలపై త్వరలోనే పూర్తి స్పష్టత వచ్చే అవకాశం ఉంది.
ఇదే కాకుండా నెట్ఫ్లిక్స్ ఓ తెలుగు మూవీ, మరో వెబ్ సిరీస్ ను కూడా నేరుగా తీసుకురానున్నట్లు ఈ మధ్యే అనౌన్స్ చేసిన విషయం తెలిసిందే. సందీప్ కిషన్ నటించిన సూపర్ సుబ్బు అనే వెబ్ సిరీస్ తోపాటు ఆనంద్ దేవరకొండ నటించిన తక్షకుడు మూవీ కూడా త్వరలోనే నెట్ఫ్లిక్స్ లోకి రానున్నాయి.
