E-Paper
OTT Crime Thriller: ఓటీటీలోకి రోజా నటించిన తమిళ క్రైమ్ థ్రిల్లర్ మూవీ.. పోలీస్ వ్యవస్థపై సంచలన సినిమా.. 9 రేటింగ్
OTT Crime Thriller: ఓటీటీలోకి విమర్శకుల ప్రశంసలు అందుకున్న తమిళ సోషల్ క్రైమ్ థ్రిల్లర్ మూవీ లెనిన్ పాండియన్ స్ట్రీమింగ్ కు వస్తోంది. మరికొన్ని గంటల్లో అమెజాన్ ప్రైమ్ వీడియోలో స్ట్రీమింగ్ కానుంది. ఈ మూవీ స్టోరీ ఏంటి? ఐఎండీబీలో 9 రేటింగ్ ఉండటానికి కారణమేంటో చూడండి.
Prefer HTon Google
OTT Crime Thriller: ఓటీటీలో ఈవారం వచ్చిన, వస్తున్న క్రైమ్ థ్రిల్లర్ల సినిమాల జాబితాలో మరో మూవీ చేరింది. తెలుగు నటి రోజా నటించిన తమిళ సోషల్ క్రైమ్ థ్రిల్లర్ మూవీ లెనిన్ పాండియన్ ప్రైమ్ వీడియోలో శుక్రవారం నుంచి అంటే అక్టోబర్ 16 నుంచి స్ట్రీమింగ్ కు రాబోతోంది. ఇసుక మాఫియా, ఓ సాధారణ పోలీస్ కానిస్టేబుల్, ఓ రైతు చుట్టూ తిరిగే స్టోరీ ఇది.
లెనిన్ పాండియన్ మూవీ స్టోరీ ఇలా
పోలీస్ వ్యవస్థలో జరిగే అణచివేత, అధికారాన్ని అడ్డుపెట్టుకుని చేసే అరాచకాలు, సామాన్యుల జీవితాలపై జరిగే దోపిడీని కళ్లకు కట్టినట్లు చూపే మరో ప్రయత్నమే 'లెనిన్ పాండియన్' (Lenin Pandiyan). డీడీ బాలచంద్రన్ (DD Balachandran) దర్శకత్వంలో తెరకెక్కిన ఈ సోషల్ క్రైమ్ డ్రామా మూవీలో నటీనటుల సహజమైన నటన, బలమైన కథాంశం ప్రేక్షకులను ఆలోచింపజేసేలా ఉన్నాయి. చట్టాన్ని రక్షించాల్సిన వ్యవస్థే కొందరి చేతుల్లో కీలుబొమ్మగా ఎలా మారుతుందనే అంశాన్ని ఈ సినిమాలో చాలా స్పష్టంగా చూపించారు.
ఇసుక అక్రమ తవ్వకాలు, దాని చుట్టూ తిరిగే రాజకీయాలు, ఒక సామాన్య కానిస్టేబుల్ ఫైట్, వృద్ధ రైతు జీవితాలపై ఎలాంటి ప్రభావం చూపాయనేదే ఈ చిత్ర ప్రధాన కథాంశం. సెప్టెంబర్ 24న థియేటర్లలో రిలీజైన ఈ సినిమాకు విమర్శకుల ప్రశంసలు దక్కాయి. ఇప్పుడు నెల రోజుల్లోపే ప్రైమ్ వీడియోలోకి వస్తోంది.
ఎవరెలా చేశారంటే?
ఈ లెనిన్ పాండియన్ మూవీలో శిక్షణ పొందిన యువ కానిస్టేబుల్ మారవర్మన్ సుందరపాండియన్‌గా దర్శన్ గణేశన్ (Dhaarshan Ganesan) మంచి డెబ్యూ ఇచ్చారు. ఎలాంటి కమర్షియల్ హంగులు లేకుండా, ఎంతో రియలిస్టిక్‌గా ఉండే ఈ పాత్రలో దర్శన్ తన సహజమైన నటనతో ఆకట్టుకున్నారు. ముఖ్యంగా సెన్సిటివ్ సీన్లలో ఆయన పరిణతి ప్రదర్శించారు.
ఇక సినిమాలో మేజర్ హైలైట్‌గా నిలిచిన నటుడు జార్జ్ మరియన్. జడ్జ్ భీమారావు పాత్రలో ఆయన అద్భుతమైన నటన కనబరిచారు. సామాజిక అసమానతలపై ఆయన చెప్పే డైలాగులు, నటన సినిమాకే హైలైట్‌గా నిలిచాయి.
మరోవైపు గంగై అమరన్, రోజా మధ్య వచ్చే సన్నివేశాలు సినిమాలో కాస్త ఉద్వేగాన్ని, నవ్వులను పంచుతాయి. అయితే కొన్ని చోట్ల డబ్బింగ్ సరిగా సింక్ కాకపోవడం చిన్న మైనస్‌గా అనిపిస్తుంది. అలాగే ఇళయరాజా అందించిన బ్యాక్‌గ్రౌండ్ మ్యూజిక్ సినిమా స్థాయిని నెక్స్ట్ లెవెల్‌కి తీసుకెళ్లింది. ముఖ్యంగా ప్రీ-ఇంటర్వెల్ బ్లాక్‌లో ఇళయరాజా ఇచ్చిన బ్యాక్‌గ్రౌండ్ స్కోర్ గూస్‌బంప్స్ తెప్పిస్తుంది.
మైనస్‌లూ ఉన్నాయ్
దర్శకుడు డీడీ బాలచంద్రన్ కమర్షియల్ ఫార్ములాకు దూరంగా ఉంటూ చాలా వరకు రియలిస్టిక్ అప్రోచ్‌ను ఫాలో అయ్యారు. కథనం పరంగా కొన్ని చోట్ల స్క్రీన్ ప్లే మరింత గ్రిప్పింగ్‌గా ఉండాల్సింది. ముఖ్యంగా సెకండ్ హాఫ్‌లో వచ్చే కొన్ని సీన్లు ముందే ఊహించేలా ఉంటాయి.
క్లైమాక్స్ ఎపిసోడ్ మరింత ఎమోషనల్‌గా ఉండి ఉంటే సినిమా ఫలితం మరోలా ఉండేది. అయినప్పటికీ దర్శకుడు ఎంచుకున్న పాయింట్, దానికి తగ్గట్టుగా రాసుకున్న సన్నివేశాలు సినిమాను నిలబెట్టాయి.
సమాజంలో జరుగుతున్న అన్యాయాలను, అధికార దుర్వినియోగాన్ని ప్రశ్నించే ఈ సంచలన డ్రామాను సినిమా ప్రేమికులు కచ్చితంగా చూడాల్సిందే. కమర్షియల్ హంగులకు దూరంగా నిజాయితీతో కూడిన కథాంశాన్ని ఇష్టపడేవారికి 'లెనిన్ పాండియన్' ఒక మంచి అనుభూతిని ఇస్తుంది.
