Prakash Raj: ఇది మరో స్వతంత్ర పోరాటం.. వాళ్లకు నేను అండగా నిలబడతా: ప్రకాష్ రాజ్ ట్వీట్

Prakash Raj: ప్రకాష్ రాజ్ మరోసారి సంచలన కామెంట్స్ చేశాడు. ఢిల్లీలో జరుగుతున్న సీజేపీ నిరసనను అతడు మరో స్వతంత్ర పోరాటంతో పోల్చడం గమనార్హం. ఈ పోరాటంలో వాళ్లకు తాను అండగా ఉంటానని స్పష్టం చేశాడు.

Prakash Raj: విలక్షణ నటుడు ప్రకాష్ రాజ్ ఢిల్లీ వీధుల్లోకి దిగి కేంద్ర ప్రభుత్వంపై తీవ్రస్థాయిలో విరుచుకుపడ్డారు. నీట్ (NEET) పరీక్షల్లో జరిగిన అక్రమాలపై కాక్రోచ్ జనతా పార్టీ (CJP), విద్యార్థి సంఘాలు చేపట్టిన నిరసనకు మద్దతుగా ఆయన జంతర్ మంతర్ వద్ద సంచలన వ్యాఖ్యలు చేశారు. దేశంలో మరో స్వాతంత్య్ర పోరాటం లాంటి ఉద్యమం మొదలైందంటూ ప్రకాష్ రాజ్ చేసిన వ్యాఖ్యలు ఇప్పుడు సోషల్ మీడియాను ఊపేస్తున్నాయి.

Prakash Raj: ఇది మరో స్వతంత్ర పోరాటం.. వాళ్లకు నేను అండగా నిలబడతా: ప్రకాష్ రాజ్ ట్వీట్ (PTI)

జులై 20న ఢిల్లీలోని జంతర్ మంతర్ వద్ద జరిగిన 'చలో సంసద్' మార్చ్‌ లో ప్రకాష్ రాజ్ ప్రత్యక్షంగా పాల్గొన్నారు. అంతకుముందు జూన్‌లో బెంగళూరులో జరిగిన నిరసనలో కూడా పాల్గొన్న ఆయన.. నీట్ పేపర్ లీక్ వ్యవహారంలో కేంద్ర విద్యాశాఖ మంత్రి ధర్మేంద్ర ప్రధాన్ వెంటనే రాజీనామా చేయాలని డిమాండ్ చేశారు. దానికి సంబంధించిన వీడియో మోంటేజ్‌ను తన ఎక్స్ ఖాతాలో షేర్ చేస్తూ ఎమోషనల్ పోస్ట్ పెట్టారు.

"దేశ యువత భవిష్యత్తు కోసం మళ్లీ స్వాతంత్ర్య పోరాటం!"

"నా దేశ యువత తమ భవిష్యత్తు కోసం అద్భుతంగా పోరాడుతోంది. మళ్లీ స్వాతంత్య్ర పోరాటం లాంటి ఒక గొప్ప ఉద్యమం ఇక్కడ రూపుదిద్దుకుంటోంది. ఈ మార్పుకు నేను నిరంతరం మద్దతుగా నిలుస్తాను. విద్యార్థుల చేతులు పట్టుకుని, నా శక్తిని వారికి అందిస్తూ వారి ఉజ్జ్వల భవిష్యత్తు కోసం తోడుగా ఉంటాను" అని ప్రకాష్ రాజ్ పోస్ట్‌లో రాసుకొచ్చారు. తన పాపులర్ ప్రమోషనల్ హ్యాష్ టాగ్ `#justasking` ను కూడా ఈ పోస్ట్‌కు జత చేశారు.

సామాజిక సమస్యలపై ఎప్పుడూ నిలదీసే ప్రకాష్ రాజ్.. ఈ నీట్ పరీక్షల వివాదాన్ని చాలా సీరియస్‌గా తీసుకున్నారు. వేలమంది విద్యార్థుల భవిష్యత్తుతో ఆడుకోవద్దని, బాధ్యులపై కఠిన చర్యలు తీసుకోవాలని ప్రభుత్వంపై ఒత్తిడి తెస్తున్నారు.

బాలీవుడ్ స్టార్స్ సైలెన్స్‌పై తీవ్ర అసంతృప్తి

ఈ నిరసన సందర్భంగా మీడియా ప్రతినిధులు బాలీవుడ్ టాప్ స్టార్ల మౌనం గురించి ప్రశ్నించగా ప్రకాష్ రాజ్ సంచలన కామెంట్స్ చేశారు. ప్రజల పక్షాన ఎవరు నిలబడుతున్నారో ప్రపంచం మొత్తం చూస్తోందని ఆయన అన్నారు. సినిమా ఇండస్ట్రీలోని పెద్ద నటులు తమ పవర్‌ఫుల్ గళాన్ని ప్రజల సమస్యలపై ఉపయోగించాలని తాను కోరుకుంటున్నట్లు చెప్పారు.

"రేపు చరిత్ర రాసేటప్పుడు తప్పు చేసిన వారిని ఆ ప్రజలు క్షమిస్తారేమో గానీ, సమాజంలో అన్యాయం జరుగుతున్నప్పుడు నోరుమూసుకుని మౌనంగా ఉన్న వారిని ఎప్పటికీ క్షమించరు. ఎవరు ఎలాంటి వారో ఇలాంటి ఉద్యమాలే నిరూపిస్తాయి. ప్రజల కోసం నిలబడే నైతికత ఎవరికి ఉందో ఇప్పుడు అందరికీ అర్థమవుతోంది" అంటూ బాలీవుడ్ ప్రముఖులకు గట్టి కౌంటర్ ఇచ్చారు.

ఇతర సినీ ప్రముఖుల మద్దతు.. వాంగ్చుక్‌తో భేటీ

ఢిల్లీలో జరిగిన ఈ సుదీర్ఘ పోరాటంలో ప్రకాష్ రాజ్‌తో పాటు ప్రముఖ నటి షబానా అజ్మీ, పూనమ్ పాండే కూడా రోడ్డెక్కి విద్యార్థులకు మద్దతు తెలిపారు. అంతేకాకుండా హాలీవుడ్, బాలీవుడ్ స్థాయిలో గుర్తింపు ఉన్న హృతిక్ రోషన్, సోనాక్షి సిన్హా, మ్యూజిక్ డైరెక్టర్ విశాల్ దద్లానీ, గాయని చిన్మయి శ్రీపాద లాంటి ప్రముఖులు సోషల్ మీడియా వేదికగా ఈ ఉద్యమానికి మద్దతు పలికారు.

ప్రముఖ సామాజిక వేత్త సోనమ్ వాంగ్చుక్‌ను స్వయంగా కలిసి మాట్లాడిన ప్రకాష్ రాజ్, ఆ ఫొటోలను కూడా ఇంటర్నెట్‌లో షేర్ చేశారు. దక్షిణాది, ఉత్తరాది భాషల్లో వందలాది విలక్షణమైన పాత్రలతో అలరించిన ప్రకాష్ రాజ్, సామాజిక అంశాలపై నిలదీయడంలో ఎప్పుడూ ముందుంటారు. గతంలో ఆయన ప్రారంభించిన 'జస్ట్ ఆస్కింగ్' క్యాంపెయిన్ కూడా నేషనల్ వైడ్‌గా పెద్ద చర్చకు దారితీసింది. ముఖ్యంగా కేంద్రంలో మోదీ సర్కార్ వచ్చినప్పటి నుంచే ప్రకాష్ రాజ్ తన దాడిని తీవ్రం చేశారు. ప్రతి అంశంలోనూ ప్రభుత్వాన్ని విమర్శిస్తూ, ప్రశ్నిస్తూ సోషల్ మీడియాలో పోస్టులు చేస్తున్నారు.