తెలంగాణలో సద్దుల బతుకమ్మ సంబురాలు.. ట్యాంక్‌బండ్‌పై వేడుకల్లో విజయ్ దేవరకొండ - రష్మిక

తెలంగాణవ్యాప్తంగా సద్దుల బతుకమ్మ వేడుకలు ఘనంగా జరిగాయి. హైదరాబాద్ ట్యాంక్‌బండ్‌పై ఈ సంబురాల్లో విజయ్ దేవరకొండ - రష్మిక దంపతులు పాల్గొన్నారు.

తెలంగాణ సంస్కృతి, సంప్రదాయాలకు ప్రతీక అయిన సద్దుల బతుకమ్మ పండుగ రాష్ట్రవ్యాప్తంగా అంబరాన్నంటింది. తెలంగాణ భాషా సాంస్కృతిక శాఖ ఆధ్వర్యంలో హైదరాబాద్‌లోని హుస్సేన్ సాగర్ తీరం ట్యాంక్‌బండ్ వద్ద ఈ వేడుకలు కన్నుల పండువగా సాగాయి. రంగురంగుల పూలతో పేర్చిన బతుకమ్మలు, మహిళల ఆటపాటలు, సాంస్కృతిక ప్రదర్శనలతో ట్యాంక్‌బండ్ పరిసర ప్రాంతాలన్నీ పండుగ శోభతో విలసిల్లాయి.

సద్దుల బతుకమ్మ సంబరాల్లో విజయ్-రష్మిక

వేడుకల్లో భాగంగా ట్యాంక్‌బండ్ అమరవీరుల స్మారక చిహ్నం నుంచి భారీ మహా బతుకమ్మ ర్యాలీ తీశారు. ఈ ర్యాలీలో సుమారు 700 మంది జానపద కళాకారులు తమ అద్భుత ప్రదర్శనలతో ఆకట్టుకోగా, 600 మందికి పైగా మహిళలు సాంప్రదాయ దుస్తుల్లో బతుకమ్మలతో ఊరేగింపుగా తరలివచ్చారు.

ట్యాంక్‌బండ్ వేదికగా నిర్వహించిన బతుకమ్మ ఆటలు, కోలాటాలు, జానపద గేయాలు విశేషంగా అలరించాయి. ఈ సద్దుల బతుకమ్మ సంబరాలకు ముఖ్య అతిథులుగా రాష్ట్ర మంత్రులు జూపల్లి కృష్ణారావు, సీతక్క హాజరయ్యారు. వీరితో పాటు టాలీవుడ్ ప్రముఖ నటుడు విజయ్ దేవరకొండ, రష్మిక మందన్న దంపతులు ప్రత్యేక ఆకర్షణగా నిలిచారు. వారిని మంత్రి జూపల్లి శాలువతో సత్కరించారు.

నూతన దంపతులుగా ఈ వేడుకల్లో పాల్గొన్న విజయ్-రష్మిక జంట మహిళలతో కలిసి బతుకమ్మ సంబురాల్లో ఉత్సాహంగా పాలుపంచుకున్నారు. వారి రాక ట్యాంక్‌బండ్ వద్ద కోలాహలంగా మారింది. హుస్సేన్ సాగర్ తీరాన బతుకమ్మ వేడుకల్లో నిర్వహించిన లేజర్ షో, రంగురంగుల బాణసంచా ప్రత్యేక ఆకర్షణగా నిలిచాయి.