ప్రభాస్ ఇండియాలో బిగ్గెస్ట్ సూపర్ స్టార్ అంటూ పెద్ద చర్చకే తెరలేపిన సందీప్ రెడ్డి వంగా..

ప్రభాస్ ఇండియాలోనే బిగ్గెస్ట్ సూపర్ స్టార్ అంటూ సందీప్ రెడ్డి వంగా టైటిల్ కార్డ్ వేయడంపై పెద్ద చర్చే మొదలైంది. స్పిరిట్ గ్లింప్స్ వీడియోలో అతడు చేసిన పనిపై షారుక్ ఖాన్ ఫ్యాన్స్ మండిపడుతున్నారు.

ప్రభాస్ పుట్టినరోజు సందర్భంగా దర్శకుడు సందీప్ రెడ్డి వంగా తమ రాబోయే మూవీ 'స్పిరిట్' నుండి ఒక ప్రత్యేకమైన 'సౌండ్ స్టోరీ'ని విడుదల చేసిన విషయం తెలుసు కదా. ఇది రెబల్ స్టార్ అభిమానులకు గొప్ప ట్రీట్ అని చెప్పొచ్చు. ఎంతో ఆసక్తిగా ఎదురుచూస్తున్న ఈ సినిమా నుంచి వచ్చిన మొదటి గ్లింప్స్ కావడంతో అభిమానుల ఉత్సాహం తారాస్థాయికి చేరుకుంది.

ప్రభాస్ ఇండియాలో బిగ్గెస్ట్ సూపర్ స్టార్ అంటూ పెద్ద చర్చకే తెరలేపిన సందీప్ రెడ్డి వంగా..

అయితే ఈ వీడియోలో చాలా మంది అభిమానుల దృష్టిని ఆకర్షించింది ఏంటంటే.. ఇందులో ప్రభాస్‌ను పరిచయం చేసిన తీరు. రెబల్ స్టార్ అని కాకుండా ఇండియాలో బిగ్గెస్ట్ సూపర్ స్టార్ అని అనడం విశేషం. దీనిపై సోషల్ మీడియాలో పెద్ద చర్చే మొదలైంది. ఇది ప్రభాస్ అభిమానులను ఎంతగానో సంతోషపరిచినప్పటికీ.. షారుక్ ఖాన్, సల్మాన్ ఖాన్ వంటి ఇతర పెద్ద స్టార్ల అభిమానులు దీనిని అవమానకరమని పేర్కొంటూ వాదనకు దిగారు.

షారుక్ ఖాన్ ఫ్యాన్స్ మండిపాటు

'ఇండియాస్ బిగ్గెస్ట్ సూపర్ స్టార్ ప్రభాస్' అని ఉన్న స్పిరిట్ టైటిల్ కార్డుపై స్పందిస్తూ.. ఒక షారుక్ ఖాన్ అభిమాని స్పందించారు. "ఇండియాస్ బిగ్గెస్ట్ సూపర్ స్టార్? మంచి ప్రయత్నం.. కానీ ముంబై నుండి మొరాకో వరకు హృదయాలను పాలించే బాద్‌షా ఒక్కడే - షారుక్ ఖాన్.

లెగసీని పోస్టర్‌లలో ప్రకటించరు. అది దశాబ్దాల మ్యాజిక్, చార్మ్, ప్రపంచవ్యాప్త ప్రేమ ద్వారా వస్తుంది" అని అన్నారు. మరికొందరు అభిమానులు కూడా ఈ టైటిల్ కార్డును తప్పుబట్టారు. కొందరు ప్రభాస్ ను తక్కువ చేస్తూ కూడా పోస్టులు చేశారు.

సమర్థించుకున్న ప్రభాస్ అభిమానులు

అయితే ప్రభాస్ అభిమానులు చాలా మంది ఈ ట్యాగ్ సరైందేనని అభిప్రాయపడ్డారు. "సందీప్ రెడ్డి వంగా సరైన ట్యాగ్‌నే ఇచ్చారని నేను అనుకుంటున్నాను. ప్రభాస్ నిజంగానే ఇండియాస్ బిగ్గెస్ట్ సూపర్ స్టార్. ఆయన ఎక్స్‌ట్రార్డినరీ విజన్స్‌ను తెరపైకి తీసుకురావడానికి దర్శకులు బలంగా నిలబడాలని కోరుకుంటూ మరిన్ని పుట్టినరోజులు జరుపుకోవాలని ఆశిస్తున్నాను" అని ఒక అభిమాని రాశారు. మరొకరు స్పందిస్తూ.. "బాక్సాఫీస్ కలెక్షన్లే వంగా చెప్పింది నిజమని నిరూపిస్తున్నాయి" అని వాదించారు.

ప్రభాస్ పాన్ ఇండియా స్టార్

ఎస్.ఎస్.రాజమౌళి బాహుబలి ఫ్రాంచైజీతో ప్రభాస్ దేశవ్యాప్తంగా పేరు సంపాదించాడు. ఈ రెండు సినిమాలు ప్రపంచవ్యాప్తంగా కలిపి రూ.2400 కోట్లకు పైగా వసూలు చేశాయి. ఆ తర్వాత అతడు పాన్-ఇండియా స్టార్‌గా స్థిరపడ్డాడు. అయితే తర్వాత వచ్చిన సాహో, రాధే శ్యామ్, ఆదిపురుష్ వంటి కొన్ని సినిమాలు బాక్సాఫీస్ వద్ద విఫలమయ్యాయి. అయితే గత రెండు సంవత్సరాలుగా సలార్, కల్కి 2898 ఏడీ విజయాలతో ఈ నటుడు మళ్లీ పుంజుకున్నాడు. కల్కి ప్రపంచవ్యాప్తంగా రూ.1000 కోట్లకు పైగా వసూలు చేసింది.

ఈ బాక్సాఫీస్ దూకుడు కారణంగా చాలా మంది బాలీవుడ్ స్టార్లు ప్రభాస్ పాన్-ఇండియా పాపులారిటీ పట్ల 'అభద్రతా భావంతో' ఉన్నారనే చర్చకు దారితీసింది. ఒక ట్వీట్‌లో "ముంబైలోని కొంతమందికి ఈ పోస్టర్ చూసి రాత్రి నిద్ర పట్టదు" అని అనడం విశేషం.

ప్రభాస్ రాబోయే సినిమాలు

సందీప్ రెడ్డి వంగా దర్శకత్వం వహిస్తున్న స్పిరిట్ సినిమాలో వివేక్ ఒబెరాయ్, త్రిప్తి డిమ్రి కూడా ముఖ్య పాత్రల్లో నటిస్తున్నారు. అయితే అంతకుముందే ప్రభాస్ ఫాంటసీ హారర్ మూవీ ది రాజాసాబ్ లో కనిపించనున్నాడు. మారుతి దర్శకత్వం వహించిన ఈ సినిమాలో సంజయ్ దత్, మాళవికా మోహనన్, నిధి అగర్వాల్ కూడా నటిస్తున్నారు. ఈ సినిమా వచ్చే ఏడాది జనవరి 9న థియేటర్లలో విడుదల కానుంది.