16 నెలలుగా ప్రెగ్నెన్సీతో వరల్డ్ రికార్డు క్రియేట్ చేశాను: తన ప్రెగ్నెన్సీ పుకార్లపై బాలీవుడ్ నటి కౌంటర్

బాలీవుడ్ నటి సోనాక్షి సిన్హా తాను ప్రెగ్నెంట్ అని వస్తున్న పుకార్లకు గట్టి కౌంటరే ఇచ్చింది. 16 నెలలుగా ప్రెగ్నెన్సీతో వరల్డ్ రికార్డు క్రియేట్ చేశానంటూ ఓ సెటైరికల్ పోస్ట్ చేసింది. అందులో ఏముందో చూడండి.

బాలీవుడ్ నటి సోనాక్షి సిన్హా ఇటీవల ముంబైలో జరిగిన ఒక కార్యక్రమానికి మెరిసిపోతున్న ఎరుపు రంగు దుస్తుల్లో వచ్చింది. అప్పుడు కొందరు సోషల్ మీడియాలో ఆమె ప్రెగ్నెంట్ అని, ఫోటోలకు పోజులిచ్చే సమయంలో చేత్తో కడుపును దాచడానికి ప్రయత్నిస్తోందని అనుకున్నారు. అయితే సోనాక్షి ఇప్పుడు ఆ పుకార్లను గట్టిగా తిప్పికొడుతూ ఓ సెటైరికల్ పోస్ట్ చేసింది.

16 నెలలుగా ప్రెగ్నెన్సీతో వరల్డ్ రికార్డు క్రియేట్ చేశాను: తన ప్రెగ్నెన్సీ పుకార్లపై బాలీవుడ్ నటి కౌంటర్

సోనాక్షి పోస్ట్ వైరల్

బాలీవుడ్ నటి సోనాక్షి సిన్హా గురువారం (అక్టోబర్ 16) తన భర్త జహీర్ ఇక్బాల్ తో కలిసి ముంబైలో రమేష్ తౌరానీ దీపావళి వేడుకకు వెళ్లిన ఫొటోలను ఇన్‌స్టాగ్రామ్‌లో షేర్ చేసింది. మొదటి కొన్ని ఫొటోల్లో ఆమె అనార్కలీ దుస్తుల్లో చాలా అందంగా కనిపించింది. చివరి ఫొటోలో మాత్రం సోనాక్షి, జహీర్ ఏదో విషయం చూసి పగలబడి నవ్వుతున్నారు. ఆ ఫొటోలను షేర్ చేస్తూ.. సోనాక్షి క్యాప్షన్‌లో ఇలా రాసింది..

"మా ప్రియమైన, అతి తెలివైన మీడియా ప్రకారం మనుషుల చరిత్రలోనే అత్యంత ఎక్కువ కాలం (16 నెలలు పైగా) గర్భవతిగా ఉన్నట్లు ప్రపంచ రికార్డు సాధించిన వ్యక్తిని. కేవలం నడుము చుట్టూ చేయి వేసుకుని ఫోటోకు నిలబడినందుకు ఇదంతా. మా రియాక్షన్ చూడాలంటే చివరి స్లైడ్ చూడండి.. ఆ తర్వాత మీరంతా ఈ దీపావళిని మరింత బాగా సెలబ్రేట్ చేసుకోండి" అని రాసింది. ఈ సెటైరికల్ పోస్టుతో సోనాక్షి తాను గర్భవతి కాను అని స్పష్టంగా చెప్పినట్లయింది.

నెటిజన్ల రియాక్షన్ ఇలా..

సోనాక్షి సిన్హా చేసిన ఈ పోస్ట్ వెంటనే వైరల్ అయింది. కామెంట్స్ సెక్షన్ లో పలువురు సెలబ్రిటీలతోపాటు అభిమానులు కూడా ఆమె రియాక్ట్ అయిన తీరును ప్రశంసిస్తూ కామెంట్స్ చేశారు. కుషా కపిల, శిల్పా శిరోద్కర్ లాంటి సెలబ్రిటీలు కామెంట్లలో లాఫింగ్ ఎమోజీలను పోస్ట్ చేశారు. ఫ్యాన్స్ కూడా సోనాక్షి సమాధానానికి మెచ్చుకున్నారు. ఒక కామెంట్ ఇలా ఉంది.. "సోనా.. నువ్వు ఇదే సమాధానం ఇవ్వాల్సింది.. మీరిద్దరూ ఎప్పుడూ లేనంత అద్భుతంగా కనిపిస్తున్నారు" అని అన్నారు. మరొకరు స్పందిస్తూ.. "చివరి స్లైడ్ చాలా ముద్దుగా ఉంది" అని రాశారు.

దీనికంటే ముందు రమేష్ తౌరానీ దీపావళి వేడుకలో జహీర్ కూడా ఈ పుకార్లను సరదాగా ఆట పట్టించాడు. ఫొటోగ్రాఫర్ల కోసం పోజులిచ్చే సమయంలో ఊరికే ఆమె కడుపు మీద చేయి వేసి ఆ పుకారును నిర్ధారిస్తున్నట్లు నటించాడు. ఆ తర్వాత సోనాక్షి ఫొటోల కోసం ముందుకు వెళ్తుంటే జాగ్రత్త అని అన్నాడు.

జహీర్ ఇక్బాల్, సోనాక్షి సిన్హా అనుబంధం

జహీర్, సోనాక్షి ఏడేళ్ల డేటింగ్ తర్వాత పెళ్లి చేసుకున్నారు. వీళ్ళిద్దరూ మొదట 2013లో సల్మాన్ ఖాన్ ఇచ్చిన విందులో కలుసుకున్నారు. అయితే 2017లో ట్యూబ్‌లైట్ చిత్రం విడుదల తరువాత జరిగిన వేడుకలోనే వాళ్ళిద్దరికీ ఆకర్షణ కలిగి, గంటల తరబడి మాట్లాడుకున్నారు.

2024లో ఈ జంట ముంబైలో సోనాక్షి ఇంట్లోనే ప్రత్యేక వివాహ చట్టం సివిల్ సెర్మనీ చేసుకున్నారు. దీనికి వాళ్ళ కుటుంబ సభ్యులు, దగ్గరి స్నేహితులు మాత్రమే వచ్చారు. తర్వాత చిత్ర పరిశ్రమ స్నేహితుల కోసం ఒక రిసెప్షన్ కూడా ఇచ్చారు.